1 Samuele 22 - Mawu a Mulluku

Wiiphiwa wa allupa mukutho

¹ Davide aathawawo o Gati, iipittha onikhunguni na Adulamu. Asinne ni attheene a mu nibanja na attiitthinnya, yaaya nko waari Davide.

² Vano attheene ayo yaari ni ddookatamiha apaalle ekongoli apaalle ohihakallalla yaakwakhwana 400. Nave yaatthukumana wa Davide, akhalla awaahoolleelliiwa.

³ Vatulli viwa Davide aavenyawo wenko aya o etawoni ya Mizipa o Mowabu. Amuveka mwene a o Mowabu wi, “Pepaani, muwaakhullelle attiitthaaka ni amoowaaka ekhalleke ni nyuwaano ophiyera kidduwenlle eyo Mulluku anaakeerelleeye.”

⁴ Sika Davide ahaahiya makhollwaaye wa mwene a o Mowabu. Nave yaakhalla wenko enthawi ettheene eyo olliye aariiye wawiipittha.

⁵ Nllapo nimodda namallotella Gadi aamulleella Davide wi, “Muhinakhalla mumpandanimmu. Venyanimoni muye o ellapo ya Yuda.” Davide aavenyawo avollowa muutthakoni wa Hereti.

⁶ Vano Saulo ahiiwa wi athu amodda aamoona Davide ni athwaaye. Nllapo nenno Saulo aari akeraatthille vatthi va muteekho wa bwemba oyo wamenlle vaddullu va mwaango wa Gibea, nivaka niri m'mattani mwaye, oohoollella ekhoto etthukumanne moomwaapheella.

⁷ Saulo ahaalleella oohoollella ekhoto wi, “Ngiiwani nndda nyu Abenjamini akhwaaka! Mwaana a Yese, Muyudoolla akhalla mwene khawa awinnyani emata, khawa aweerani wi mukhalle akhoto awaahoollella akhoto 1,000 wonanko miyaano keerelleemi.

⁸ Koma nyuwaano munapaalla okiwukila miyaano! Khaavo naari mmodda a nyuwaano akilleelle mwanaka Yonatani iiwananeeye ni mwaana a Yese. Khaavo naari mmodda a nyuwaano anapwatha dda miyaano apaalle okinong'onella ddawi mwanaka aamullipiha murima Davide wi akiwukile monga mmu anakiwukilelleeye.”

⁹ Vaavo Doegi a o Edomu oyo iimenlle vakhuviru ni enduna dda Saulo aallota wi, “Mi kaamoona mwaana a Yese ayaaka o Nobu wa Ahimeleki, mwaana a Ahitubi.

¹⁰ Nave Ahimeleki ahaakoha Apwiya ddoophwanella wi Davide eere. Vano aamuvaha yoocha, amwinnyattho nsupada na Goliati, Mufilistoolle.”

¹¹ Vano mwene Saulo aamwiithaniha Ahimeleki, mwaana a Ahitubi ni attheene a munibanjani naattiitthinnya ayo yaari allupa mukutho o Nobu. Attheenaayo yaawa.

¹² Nave Saulo aallota wa Ahimeleki wi, “Okaapelle maaru, weyaano mwaana a Ahitubi.” Olliye ahaakhulla wi, “Ee, Apwiya.”

¹³ Saulo aamukoha wi, “Kaambiiwa tini okiwukilalleewe moowiiwanana ni mwaana a Yese? Waamwinnya yoocha ni nsupada nave wahaakoha Apwiya yawi Davide eere. Woomoona vano ookiwukila nave anapaalla okiipha!”

¹⁴ Koma Ahimeleki aamwaakhulla mwene wi, “Apwiya, ttaani mwa oohoollella ekhoto attheene oyo ari oororomelleya wonanko Davide? Olliyoolle tti mukamwenaanyu, oohoollella akhoto awuutetezani navettho muthu ooriiheya mwa athu attheene eri mu enyumbaanyu.

¹⁵ Ethiyo ella tti enthawi yawaamba okohera wa Apwiya dda olliyoolla? Iyaayi! Nyu amwene muhinallotella erive ello yoonanara wa mi oorumeyellaanyu apaalle wa arive muthu a mu nibanja naattiitthaaka vawi kheyiivo eyo kinadduwelleemi naari vang'ono va mwaha yoolla.”

¹⁶ Koma mwenoolle aallota wi, “We Ahimeleki ni attheene a munibanjani na attiittho, muneerokhwa attheene!”

¹⁷ Vano mwenoolle ahaalleella oohoollella ekhoto wi, “Muwiiphe allupa mukutho a Apwiyaalla kaambiiwa eniiwanana ni Davide. Yaadduwella wi Davidooyo aamathawa koma kheyaapanlle okilleella ddenndda.” Koma akhotwaayo kheyaawiiphalle allupa mukutho a Apwiyaayo.

¹⁸ Vano mwene aamulleella Doegi wi, “Khawe wawiiphe allupa mukutho.” Doegi a o Edomoolle aawiipha allupa mukuthwaayo. Athu yiiphiwaayo yaari 85 ayo yawara ekuwo ddabafuta ddookhalla ni efodi.*

¹⁹ Vano Saulo aalamula wi athu attheene a o Nobu, muzinda olle wakhalla allupa mukuthwaalle yiiphiwe. Sika allopwana ni atthiyana, anamwani ni akantchewa, eng'ombe, abulu ni enkhosa, ddittheddenndda ddahiiphiwa ni akhotwaaye.

²⁰ Koma Abiyatara mwaana a Ahimeleki sika avulluwalle, athawella wa Davide.

²¹ Nave Abiyatara aamulleella Davide wi Saulo oowiipha allupa mukutho a Apwiya.

²² Davide aamulleella Abiyatara wi, “Nllaponne kimoonille Doegi a o Edomoolle wi aari weewulle kaadduwella moohikayika wi aneeroya amulleelle Saulo. Vano miyaano sika kiwiiphihalle athu attheene a munibanjani na attiittho.

²³ Koma weyaano okhalleke ni miyaano, ohinoovaka vawi oyo anapaalla owiipha weyaano tti yooyo anapaalla okiipha miyaano. Waakhallaka ni miyaano kineerekewuuteteza.”