1 Samuele 20 - Mawu a Mulluku

Yonatani aamukavihera Davide wi athawe

¹ Vano Davide aathawawo o Nayoti mu Rama awa wa Yonatani. Nave aamukoha Yonatani wi, “Kaambiiwa tini attiittho enapaalliiwa okiipha? Yoonanara kiweerelleemi ttiivi?”

² Yonatani aamwaakhulla wi, “Khokhwa iyaayi, attiitthaaka kheni ewiiphe weyaano ehinakilleelle miyaano vawi kheneera erive ello, eng'onong'ono apaalle yuullupalli, ehinakilleelle miyaano. Enaavitthelle tini ella oohikilleella? Khe ddawoona ddennddo.”

³ Koma Davide aallupellattho wi, “Kinimallupella vamiitthoni va Mulluku! Attiittho ennadduwella wi onnakeerella echifundo sika yaaganiza wi, ‘Yonatani ahidduwelle ddenndda woova wi ttuumoriwa ethakaraka.’ Koma vamiitthoni va Apwiya nave vamiitthoni vawo variyari va miyaano ni okhwa viri wonanko nnyallo nimodda.”

⁴ Vano Yonatani aamulleella Davide wi, “Erive ello onaalloteewe kineeroweerella.”

⁵ Davide aamwaakhulla Yonatani wi, “Osiisello tti nllapo na Ehakallallo ya Wooneya wa Mweeri nave kinaphwanella wi kache ni amwene. Koma okaakhullelle wi kiipitthe m'matani ophiyera omuroto misikuwa.

⁶ Attiittho yaakohaka dda miyaano waalleelle wi, ‘Davide aakiveka miyaano wi kimwaakhullelle aye o etawoni yoowaniwa, Betelehemu wi aheraatthi mukutho wa vamuyakhani ni nibanja naye nittheene.’

⁷ Attiitthwaayo yaakhullella, ddeko ddineerokeetella phaama miyaano kaporwaawo. Koma yananariwa odduwelle wi enapaalla okeerella yoonanara.

⁸ Okeerelle ddaphaama miyaano kaporwaawo, valle waakeraatthiha echipangano ni miyaano vamiitthoni va Apwiya. Kaarimi kuulakwenlle okiiphe weyaano weekhawo koma woohikhalla wi wakivelleelle m'mattani mwa attiittho wi kiiphiwe.”

⁹ Yonatani ahaakhulla wi, “Iyaayi mukhwaaka, ohinakhupanyaka. Koona wi attiitthaaka enapaalla owiipha kineerewuulleella.”

¹⁰ Davide aamukoha Yonatani wi, “Ttaani anaakilleelle miyaano attiittho yaawaakhulla moowalli?”

¹¹ Yonatani aamwaakhulla Davide wi, “Hanko niye omata nngu.” Attheene yaayaawo.

¹² Omata wulle Yonatani aamulleella Davide wi, “Apwiya Mulluku Aisraele ekhalle mbonaahu. Kaakoha attiitthaaka osiisello apaalle omuroto enthawi yawi ddiidda nave koona wi enapaalla oweerella ddeko ddaphaama, Kineerewuurumihella mawu wi odduwelle.

¹³ Koma yaapaallaka owiipha, kinalonjeza wi kineerewuuwululella ni wuukavihera wi ovulluwe. Nave Apwiya ekillake kaahikwakhwaniha nnddo kinalonjezeemi. Apwiya eneerewuudalisa wonanko yaadaliselliiwa attiitthaaka.

¹⁴ Kakhalla ni okumi okikondeke wonanko Apwiya enuukondelliiwa. Koma kakhwa, ohihiye weerella echifundo nibanja naka mallapo mattheene.

¹⁵ Apwiya yaawiiphaka adani attheene a Davide va ellapo yavatthi,

¹⁶ nibanja naka miyaano Yonatani nihinatthollowa. Apwiya yaahokolloselle ddoonanara adani attheene a Davide.”

¹⁷ Yonatani aamullupellihattho Davide wi ahinahiya omukonda vawi Yonatani aanamukonda Davide wonanko iikondelleeye yeekhaaye.

¹⁸ Vano Yonatani aallotattho wi, “Osiisello tti nllapo na Ehakallallo ya Wooneya wa Mweeri nave va ehakallallweeyo eneerodduwella wi weyaano khawiivo vawi vampandoni vawo khavikhalla muthu.

¹⁹ Omuroto eneerowaasha wunchichi. Vano oye wiipitthe va nipuro wiipitthalleewe valle, okhalle vakhwipi va malluku yuukelliwe vaallaalle.

²⁰ Miyaano kineerovokha mipaamba miraru okhwipi wa mallukwaayo wonanko yookhallavo eyo kinookollelleemi.

²¹ Vano kineeromuruma mullupa muttekwaaka wi atote mipaambannddo kallota wi, ‘Ngatota mipaamba nnddo ddiri okhwipinko’ Vano weyaano okhume. Kinimallupella vamiitthoni va Apwiya wi murendelle wookhallawo nave ngaakhullella wi weyaano okumane ni ddawoopiha

²² Koma kamulleella musombooyo wi, ‘Mipaamba nnddo ddiri muhoollo mwawommo!’ Enthawi yeeyo ovenyevo vawi Apwiya sika ellotille wi ovenyevo.

²³ Vano va ddittheddene nipanganilleehu nndda Apwiya sika ambonaahu variyari va weyaano ni miyaano mallapo mattheene.”

²⁴ Sika Davide aaya iipittha omata. Nave va wooneya wa mweeri mwene Saulo aawa wi ache yoocha.

²⁵ Mwene aakeraatthi vampandoni vaye vakhuviru ni esiri mwa mallapo mattheene. Yonatani akeraatthille moowehana ni attiitthinnya nave Abinere akeraatthille vakhwipi mwawaatamana ni Saulo koma vampandoni va Davide khevaari muthu.

²⁶ Koma Saulo khaallotille erive ello nllapo nenno. Aganiza wi, “Yookhallavo eyo emweereyelle Davide apaalle khaphwanelle okhalla ni va ehakallallweella kaambiiwa khari aweella moollikana ni malamulo a Mose.”

²⁷ Koma nllapo naneepiilli na ehakallallweelle, vampandoni va Davide khavaarittho muthu. Sika Saulo aamukoha Yonatani wi, “Kaambiiwa tini Davide mwaana a Yese ahiphiyalleeye va yoocha, oddillo ni ollello?”

²⁸ Yonatani aamwaakhulla Saulo wi, “Davide aakiveka mookiwatihera wi kimwaakhullelle aye o Betelehemu.

²⁹ Olliyooyo aallota wi, ‘Okaakhullelle wi kiyeewo vawi nibanja nahu nittheene ninaheraatthi mukutho m'muzindanimmo nave abalaaka aakiwatihera wi kakhalle wenko. Okeerelle echifundo, okaakhullelle wi kawoone abalaaka.’ Ella sika ekaambiiwa ahiwilleeye wi ache ni nyuwaano, amwene.”

³⁰ Vaavo Saulo aamushella murima Yonatani nave amusimwella wi, “We mwaana oowukila ni oohiroromelleya wonanko amaayo. Ethiyo oneesa wi miyaano nginadduwella wi weyaano onniiwanana wunchichi ni Davide, mwaana a Yese. Khonadduwella wi anapaalla wuuwulliha muru weyaano ni amaaywaalla.

³¹ Ethiyo khonadduwella wi mwaana a Yese aahikhwa weyaano khokhalla mwene? Vano arume athu wi yamukuse eweena wuno wi iiphiwe.”

³² Yonatani ahaakoha attiitthinnyaalle wi, “Kaambiiwa tini munapaalleenyu omwiipha Davide? Achimwalle tini?”

³³ Iiwalle ddenndda aamuvokhella nivaka Yonatani wi amwiiphe. Vano Yonatani aadduwella wi attiitthinnya enapaalla emwiiphe Davide.

³⁴ Vano Yonatani aavenyavo vatebulonimvo ashille murima wunchichi nave nllapo naneepiillinno khaachille. Murima waamuvoreya wunchichi ekaamba yawi attiitthinnya yaamweerella Davide epewe.

³⁵ Osaka wene Yonatani aaya omata va enthawi apanganilleeye ni Davide ari ni musombwe.

³⁶ Aamulleella mullupa muttekwaayooyo wi, “Othamake oye watote mipaamba nnddo kinaavokheemi.” Mullupa muttekoolle aathamaka nave Yonatani aavokha mpaamba muhoollo mwaye.

³⁷ Nave mullupa muttekoolle aphiyalle mvo vamorelle mpaamboolle, Yonatani aallota mookhuwa wi, “Mpaamba ori vahoollo vawomvo!”

³⁸ Yonatani aamulleella mullupa muttekooyo wi, “Akuvaka, ohiniimella.” Mullupa muttekoolle aatota mpaamboolle awaana wa apwinnya.

³⁹ Mullupa muttekoolle khaadduwella eyo yeereya, Yonatani ni Davideve sika yadduwella.

⁴⁰ Yonatani aamwinnya ezipangizo ddaye mullupa muttekoolle amulleella wi, “Khawe waddihiye o etawoni”

⁴¹ Vano mullupa muttekoolle arowille, Davide aakhumellella okhwipi wa malluku yuukelliwaalle avelleella olemu voopopheyani ekhovaaye vatthi oraru. Yaakhupaarellana attheene yaamba winlla koma Davide ahinlla moollipiha.

⁴² Yonatani aamulleella Davide wi, “Eta phaama vawi noollupella vamiitthoni va Apwiya wi ekhalle mboni variyari va miyaano ni weyaano owaakattho edduullu ddaka ni edduullu ddawo mallapo mattheene.” Davide aatimulla nave Yonatani aahokollweella o etawoni.