1 Samuele 19 - Mawu a Mulluku

Saulo anapaalla omwiipha Davide

¹ Saulo aamulamula mwanaye Yonatani ni oohoollella ekhoto attheene wi emwiiphe Davide. Koma Yonatani aanamukonda wunchichi Davide.

² Vano Yonatani aamulleella Davide wi, “Attiitthaaka enapaalla owiipha weyaano. Sika ochenjere, osiisello ohinase oye wiipitthe m'matani.

³ Kineerokhalla ni attiitthaaka m'matani mmo oniipittheewe, vano kineerollota dda weyaano ni alliwaayo nave eyo kinaawiweemi kineerewuulleella.”

⁴ Vano Yonatani aallota ni attiitthinnya ddaphaama dda Davide vawaalleellani wi, “Amwene muhinamweerella ddoonanara oorumeyellaanyu Davide vawi olliye khuuchimwelleni ello koma annaweerellani ddaphaama.

⁵ Vallethi ahiivelleella wunchichi voomwiiphani Goliyatoolle. Apwiya yahaakavihera Aisraele nllapo nenne vawaapambanihani nave ddahuuhakallallihani. Kaambiiwa tini munapaalleenyu omweerella ddoonanara Davide muthu oohichimoolla.”

⁶ Saulo ahaapella maaru nnddo allotille Yonatani nave aallupella vamiitthoni va Apwiya wi Davide khiiphiwa.

⁷ Vano Yonatani aamwiithana Davide amulleella ddittheddenendda. Aamukusa ayaana wa Saulo nave Davide aamurumeyella mwene Saulo wonanko eerelleeye khalle.

⁸ Ekhoto emodda yahaambeyattho. Davide aaya awana ni Afilisti ni owiipha athu anchichi ophiyera wi Afilistaayo yaathawa.

⁹ Nllapo nimodda Saulo ari mpa mwaye, nivaka niri m'mattani mwaye nave Davide amwiipellaka gitala, munepa woonanara woovenyera wa Apwiya waamukitthella Saulo.

¹⁰ Saulo aapaalla omuhoma Davide moomupataaniha ni esiri. Koma Davide aarapa nivakanno nihoma esiri. Davide aakhuma athawa mahiiyu vaavo.

¹¹ Mahiiyu yaayo Saulo ahaaruma athu o enyumba ya Davide wi yamwiipitthelle wi emwiiphe ohinase. Koma Mikala aamulleella mamune Davide wi, “Mwaahithawa mahiiyu vaava osiisello munimiiphiwa.”

¹² Sika Mikala aamukhumihella Davide vaniwindoni athawa.

¹³ Mikala aamukusa mulluku a mpa amukonaatthiha vabedini. Aamuhameelliha yoohameella muru yamapururu a epuri omuruni waye amukhuneella ni ekuwo.

¹⁴ Saulo aarumalleeye athwaalle wi yamuphare Davide, Mikala ahaalleella wi, “Davide animavoriiwa.”

¹⁵ Koma Saulo ahaarumattho athwaalle aalleella wi, “Khaweni mwamutukhulle Davide ni bediine yooyo wi kimwiiphe.”

¹⁶ Athwaalle evollowille, vabedinimvo yamuphwannyevo mulluku a mpa owaaka yoohameella muru yamapururu a epuri omuruni waye.

¹⁷ Saulo iiwalle ddenndda aamukoha Mikala wi, “Kaambiiwa tini okillekilleewe mwawi ddiidda omwaakhullella mudanaaka wi athawe?” Mikala ahaakhulla wi, “Davide aakilleella wi, ‘Okikavihere wi kithawe, waaheera ddiiddo kinimawiipha.’ ”

¹⁸ Davide aathawella wa Samuele o Rama nave aamulleella nnddo eerille Saulo. Vano Samuele ni Davidooyo yaaya yakhalla o Nayoti mu Rama nko wakhalla anamallotella.

¹⁹ Saulo iiwalle wi Davide ari o Nayoti mu Rama,

²⁰ ahaarumiha athu wi yamuphare Davide eweena. Athwaayo yahoona mulloko wa anamallotella ellotellaka, Samuele aahoollellaka. Munepa a Mulluku ahaakitthella nave alliwa yahaamba ollotellattho.

²¹ Saulo iiwalle ddenndda ahaaruma amodda nave alliwattho yahaamba ollotella. Ahaarumattho amodda waneeraru naalliwanittho yahaamba ollotella.

²² Sika Saulo aayaawo o Ramanko yeekhaaye. Aphiyalle veehimeni yuullupalli eyo eri o Seku, aakoha wi, “Ethiyo Samuele ni Davide eri wuuwi?” Muthu mmodda aallota wi, “Eri o Nayoti mu Rama, nko onakhalla anamallotella.”

²³ Saulo aavenya aya o Nayoti mu Rama nayeenettho Munepa a Mulluku aamukitthella, aniina eetaka nngu allotellaka ophiyera aaphiya o Rama.

²⁴ Nayeenettho aarulla ddoowara ddaye anallotella vamiitthoni va Samuele. Aakonaatthi ahiwanre nndduwa nittheene, otthaana ni mahiiyu. Sika vahaambeya ollota wawi, “Ethiyo Saulo ari m'mullokoni wa anamallotella?”