1 Samuele 18 - Mawu a Mulluku

¹ Davide amallihalle ollota ni Saulo, Yonatani ahaattana wunchichi ni Davide vawi Yonatani aamukonda Davide wonanko iikondelleeye yeekhaaye.

² Ovenyera nllapo nenno Saulo khaamwaakhullenlle Davide wi ahokollweelle owaniwa.

³ Yonatani aakeraatthiha echipangano ni Davide vawi aamukonda wonanko iikondelleeye yeekhaaye

⁴ Vano Yonatani aarulla mukanjo oyo awareeye amuvaha Davide ni ddoowara ddakhoto, nsupada naye muuraaye ni laambaaye.

⁵ Vano orive weko Davide arumiwaayewo ni Saulo wi awanewo ekhoto, aanaagonjiha adanaaye. Vawi Saulo aamutthoolla Davide wi akhalle oohoollella akhoto. Yeella yahaahakallalliha athu attheene naari oohoollella ekhoto a Saulo.

Saulo anamukhallella ehache Davide

⁶ Vano akhotwaalle yahokollweelliiwa owaniwa, Davide amwiiphalle Goliyatoolle, atthiyana yaakhuma ovenyera m'mizindani ddittheddene dda Aisraele yiipaka machipo ni wiina emuchingamellaka mwene Saulo. Yaaniipa ni wiina ekoma ni ezitoliro moohakallalla.

⁷ Atthiyanaayo yaaniipa moohimaana wi, “Ee Saulo oowiipha athu 1,000, koma Davide awiiphalle athu 10,000.”

⁸ Echipweella yaamushiha murima wunchichi Saulo. Vawi aaganiza wi, “Davide oowiipha athu anchichi miyaano kiwiiphalle athu ooyeva. Vano vaava ehanlle tti tini wi emutthoolle akhalle mwene?”

⁹ Ovenyera nllapo nenno Saulo aamutthattusa Davide mudanaaye.

¹⁰ Osaka wene Apwiya yaheeriha wi munepa woonanara omukitthelle Saulo nave ahaamba otokollolla yeekha mpa mwaye. Davide aawa anamwiipella gitala monga mwa mallapo mattheene koma Saulo aakhalla ni nivaka m'mattani mwaye.

¹¹ Saulo aaganiza wi, “Kimuhome mompataaniha ni esiri.” Aamuvokhella Davide nivakanno wookwakhwana wiilli Davide arapaka.

¹² Saulo aanamoova Davide vawi aadduwella wi Apwiya yaari ni Davide omuhiya olliye.

¹³ Sika Saulo aamuvenyihavo wi ahikhalle ni olliye amuruma wi aahoollelleke akhoto 1,000. Davide aanayaanawo anawaanawo.

¹⁴ Davide aanapambana va ddeko ddittheddene eereeye vawi Apwiya yaari ni olliye.

¹⁵ Vano Saulo vawoonani wi Davide aanapambana wunchichi aanamoova.

¹⁶ Koma athu attheene a o Israele ni a o Yuda yaanamukonda Davide kaambiiwa aanaahoollella ni opambana va ddittheddene.

Davide anamutthella mwaana a Saulo

¹⁷ Nllapo nimodda Saulo aamulleella Davide wi, “Waakirumeyellaka miyaano voowanani ekhoto ya Apwiya moollipihella, kineerowinnya Merabi, mwanaka awaamba wi omutthelle.” Saulo aganiza wi, “Kihimwiiphe Davide meekhaami koma iiphiwe ni Afilisti.”

¹⁸ Vano Davide aamukoha Saulo wi, “Mi kiri aani nave miyaano ni nibanja na makhollwaaka nineesiwa aani mu ellapo ya Israeleella wi miyaano kikhalle mukamwene a amwene?”

¹⁹ Koma enthawi ekwakhwanille yawi Davide amutthelle Merabi mwaana a Saulo, attiitthinnyaalle yaamutthelliha wa Adriyele Mumehola.

²⁰ Koma Mikala, mwaana aamutthiyana mmodda a Saulo aanamukonda Davide. Saulo iiwalle ddenndda aahakallallana.

²¹ Aaganiza wi, “Kimwinnye Davide amutthelle wi akhalle musampha wawi Afilisti emwiiphe.” Ella sika ekaambiiwa Saulo amulleelleeye Davide waneepiilli wi, “Vano oneerokhalla mukamwenaaka.”

²² Saulo aalamulella enduna ddaye wi, “Mumwiithanelle Davide vakhwipi mumulleelle wi, ‘Amwene ennuukonda navettho enduna ddaye ddinnuukonda, vano okhalle mukamwene a amwene.’ ”

²³ Enduna dda Saulo ddaamulleella Davide mawu yaalla. Koma olliye aallota wi, “Ethiyo muneesa mattheella okhalla mukamwene a amwene? Khamunoona wi miyaano kiri oohoowa ni oohivuwa?”

²⁴ Endunanndde ddaamulleella Saulo ddittheddene nnddo Davide allotilleeye.

²⁵ Vano Saulo aallota wi, “Khaweni mwamulleelle wi, ‘Miyaano mwene nginapaalla emphaso wi amutthelle mwanaka koma kinapaalleemi tti etthoka dda mattapara a mukabudulani mwa Afilisti 100 wi kaahokolloselle yoonanara adanaaka.’ ” Saulo aganiza wi Davide aneerewiiphiwa ni Afilisti.

²⁶ Sika endunanndde ddimulleelle Davide mawu yaalla ddaamuhakallalliha wi akhalle mukamwene a amwene. Nllapo na omutthella mutthiyanoolle nihinakwakhwane,

²⁷ Davide aaya okhotoni ni akhotwaaye nave aawiipha Afilisti 200. Vano aawaana etthoka dda mattapariiwa avelleella wa mwene Saulo wi akhalle mukamwene a mwene. Saulo aamwinnya Davidooyo mwanaye, Mikala wi amutthelle.

²⁸ Koma Saulo adduwenlleeye wi Apwiya yaakhalla ni Davide navettho mwanaye Mikala aanamukonda Davidooyo,

²⁹ aavirellellave omoova sika ahiitana ni Davide okumaaye muttheene.

³⁰ Vano Afilisti yaanakhuma enawana ekhoto ni Aisraele, Erive enthawi Davide aanapambana waakhwaranya oohoollella ekhoto attheene a Saulo. Sika nnddina na Davide naavuwa wunchichi.