1 Samuele 17 - Mawu a Mulluku

Goliati anaavevulla a Aisraele

¹ Afilisti yaatthukumaniha milloko ddiwa dda akhoto o Soko ellapo ya Yuda. Yaamaka misasa ddiwa variyari va Soko ni Azeka o Efesi Damimu.

² Saulo ahaatthukumaniha Aisraele, emaka misasa ddiwa va ntapo na Ela, aatthatta akhoto wi ewane ni Afilistaayo.

³ Afilisti yahaatthatta akhotwiiwa moowehana ni Aisraele. Amodda mwaangoolla amodda mwaangoolle, variyarimva ntapo.

⁴ Vano omisasani wa Afilisti waakhuma muthu mmodda amasiva oovenyera o Gati, nnddina naye Goliati. Ari oorekama vakhuviru mamita mararu.

⁵ Awaresa echipewa ya mukuwa ni malaya amukoko, ayo yallemella vakhuviru makilogaramu 57.

⁶ Aanawara ddeko dda mukuwa ddookhuneella meto ddaye. Nave aanatukhulla nivaka na mukuwa vanthurini vaye.

⁷ Yoomuteteza yaari wonanko ekopo yuullupalli yawoopella ekuwo. Muru wa nivakanno wallemella vakhuviru makilogaramu matthanu ni meelli a mukoko. Vahoollo vaye vaanakhalla muthu ootukhulla yoomuteteza.

⁸ Goliyatooyo ahiimella anakhuwella wa akhoto a Aisraelaayo wi, “Kaambiiwa tini mukhozekelleenyu ekhoto mwawi ddiidda? Miyaano ngihiyo Mufilisti nave nyuwaano khamuhiyo akaporo a Saulo? Mutthoolleni muthu nyookha wi akitthelle muntaponimmu.

⁹ Awora okiipha, Afilisti attheene enaakhalle akaporwaanyu. Koma kamwiipha, nyu Aisraele attheene munaakhalle akaporwaahu ni onirumeyella hiyaano

¹⁰ Nave Mufilistooyo aallota wi, kinnaavevulla akhoto a Israele ollello! Kirumihelleni muthu wi kiwanena.”

¹¹ Saulo ni Aisraele attheene yiiwalle mawu a Mufilistooyo yaallakallakeya nave yahoova.

Davide omisasani dda Saulo

¹² Davide aari mwaana a Yese, mu Efurati, o Betelehemu a o Yuda. Oyo aari ni anamwani aallopwana atthanu ni araru. Va enthawi ya mwene Saulo, Yese aari uulluvanlle wunchichi.

¹³ Anaaye araru aallopwana a Yese ayo yamuthwanre Saulo okhotoni yaari Eliyabu mwaana awaamba, Abinadabu mwaana aneepiilli ni Shama mwaana aneeraru.

¹⁴ Davide aari ethwako. Anamwani uullupalli ararwaayo sika yamuthwanre Saulo okhotoni.

¹⁵ Koma Davide aanaya omisasani dda Saulo eeddiiddo aanahokollweella o Betelehemu woochiha enkhosa dda attiitthinnya.

¹⁶ Mallapo 40 ohinase ni misikuwa Goliati aanakhuma anaddoonihella wa Aisraele.

¹⁷ Nllapo nimodda Yese aamulleella Davide wi, “Mukuse tirigu awaarika makilogaramu khumi ni mitthi khumi ddabuledi, oye wawinnye asinnawo omisasani ddiwa ddakhoto.

¹⁸ Okusettho mukaka wawumma waweeriwa tchiizi wookwakhwana khumi oyeena wa akhoto muullupalli. Nave woone mmo asinnawo enakhallelliiwa nave waweenawo echizindikiro emodda yawooniha wi ennakhallawo phaama.

¹⁹ Mwene Saulo, asinnawo ni Aisraele amodda, enawana ekhoto ni Afilisti va ntapo na Ela.”

²⁰ Vano Davide aatimulla ohinase, amuhiyera muthu mmodda enkhosa ddaye wi addichiheke. Aakusa ddoochannddo moollikana ni mmo yamulleellelliiwa attiitthinnya. Aphiyalle omisasaninko enthawi eyo akhotwaayo yatthattanniiwa enakhuwella dda ekhoto.

²¹ Aisraele ni Afilisti yaatthatta mizere ddakhoto moowehana.

²² Vano Davide aamuhiyera ddoochanndde muthu oyo asunga ddoocha athamakella nko waari akhotwaayo, aallochella asinnaayo.

²³ Allotaka ni asinnaayo, aamoona Goliati a o Gati, muthu amasiva, akhumaka mu mulloko wakhoto wa Afilisti, allotaka ddoovevullanndde nave Davide ahiiwa ddenndda.

²⁴ Aisraele emonne muthooyo yaathawa kaambiiwa yaanamoova wunchichi.

²⁵ Yaanallota muthu ni mukhwaaye wi, “Ngamooneni muthoolle! Anaweellesa oninyaambusa hiyaano. Vano amwene yaallota wi oyo anaamwiiphe muthu yoolle, eneeromwinnya eyuuma yinchichi, eneeromwinnya mwaniwa aamutthiyana wi amutthelle nave nibanja na attiitthinnya khaniwa nikhoma musonkho.”

²⁶ Vano Davide ahaakoha akhoto ayo yaari vakhuviru ni olliyooyo wi, “Ethiyo muthu anaamwiiphe Mufilistoolla ni waavenyiha owulliwa muru Aisraelaalla enaamwinnye tini? Mufilisti oohiphaddiwoolla ttaani wi aavevulleke akhoto a Mulluku Ookumi.”

²⁷ Akhotwaayo yaamulleella Davide wi awiiphooyo aneeromweerella yawi yooriyoori.

²⁸ Eliyabu, mwanamunne muullupalli a Davide, amwiiwalleeye Davide allotaka ni akhotwaayo aamushella murima allota wi, “Waweella tini wuno? Ethiyo enkhosa vang'ononndde ddihanlle ni aani ochipululuni wulle? Kinnadduwella wi weyaano tti awiitukhulla ni oonanara murima vawi waweella woona ekhotweella!”

²⁹ Davide aallota wi, “Kichimwalle tini? Kihikoheke erive ello?”

³⁰ Vano aarukunuwa anamukoha akhoto mmodda nndde aakohilleeye amoddaalle nave yaamwaakhulla emoddamoddave yeeyo.

³¹ Mawu allota Davide yiiweyille, yaamulleella Saulo nave aamwiithana Davide.

³² Vano Davide aamulleella Saulo wi, “Athu ehimukhupanyeke Mufilistoolla, miyaano kineerooya kawanena.”

³³ Saulo aamulleella Davide wi, “Khokwakhwaniha owana ni Mufilistoolla vawi weyaano tti mwaana, olliyoolla tti muthu ooddollweella owana ekhoto ovenyera enamwanaaye.”

³⁴ Davide aallota wa Saulo wi, “Mi kaachihaka enkhosa dda attiitthaaka nave mukango waphiya apaalle echimbalangondo yaphiya ni omuphara mwaanaankhosa variyari va enkhosannddo,

³⁵ kaanayithwara ni omuvullusa mwaanaankhosooyo muwano mwiwa. Enameeyo yakhalla ya makani opaalla okilluma, kaanayiphara ereru ddaye ni oyiipha.

³⁶ Miyaano kaporwaanyu kohiiphavo mikango ni ezimbalangondo ddene. Vano Mufilisti oohiphaddiwoolla, kineeromwiipha wonanko kiiphelleemi enamanndde vawi anavevulla milloko dda akhoto a Mulluku Ookumi.

³⁷ Apwiya ayo yakivullusalle omikangoni ni o ezimbalangondo, aneerokivullusa wa Mufilistoolla.” Vano Saulo aamulleella Davide wi, “Khawe, Apwiya ekhalle ni weyaano.”

³⁸ Vano Saulo aamuwariha Davide ddoowara ddaye ddakhoto, aamuwariha echipewa ya mukuwa ni malaya amukoko.

³⁹ Vano Davide aamakellella muyuununi mwaye nsupada. Eesille weetana, aalephela weetana vawi khaaddollweelle. Aamulleella Saulooyo wi, “Ngiwora weetana vawi ngiddollweelle.” Sika aarulla ddoowarannddo.

⁴⁰ Vano aakusa ekopo m'mattani mwaye, atota malluku aphaama a m'muhinjeni matthanu aasunga munthumbani naye na obusani. Vano akhozekille aakusa yoovokhella malluku aya wookumana ni Mufilistooyo.

Davide anamwiipha Goliati

⁴¹ Vano Mufilistooyo aaya amwaatamella Davide, muthu ootukhulla yoomuteteza ari vahoollo vaye.

⁴² Nave Mufilisti amuwehille Davidooyo ahaamba omuvevulla vawi aari musombwe a mwiilli woofiira nave ekhove yooreera.

⁴³ Vano Mufilistooyo aamukoha Davidooyo wi, “Onawa ni ekopo ethiyo miyaano onakeesa mwanapwa?” Vano ahaamba omutembelela Davidooyo vooromollani milluku ddaye

⁴⁴ Vano Mufilistooyo aamulleella Davide wi, “Ngawa wuno, muhehaawo kinaavahelle epallame ddamuddullu ni enama ddamuhakani.”

⁴⁵ Koma Davide aamulleella Mufilistooyo wi, “Owiille wa miyaano okusalle nsupada ni nivaka. Koma miyaano kinawa wa weyaano mu nnddina na Apwiya Amasiva Mattheene, Mulluku a akhoto a Aisraele, oyo onamuvevulleewe.

⁴⁶ Ollello vaava Apwiya eneerokikavihera wi kuugonjihe. Kineerewuukuha ni wuuphadda murwaawo. Mitembo dda akhoto a Afilisti, kineeroddivahella epallame ddamuddullu ni enama ddamuhakani wi athu a ellapo ettheene edduwelle wi wookhalla Mulluku o Israele.

⁴⁷ Nave athu attheene etthukumannaalla eneerodduwella wi Apwiya khenavullusa ni nsupada apaalle nivaka. Apwiya sika mwaneena ekhoto nave eneerewuuvelleellani m'mattani mwahu.”

⁴⁸ Vano Mufilistooyo avenyille aasusella nko waari Davide nave Davide ahaakuva athamakella o mulloko wakhoto wi akumane ni Mufilistooyo.

⁴⁹ Vano Davide aakusa nlluku munthumbani mwaye, ahiya mu yoovokhella amuvokhella Goliati. Nllukunno naamumorella vayuuchini vaye nipwesa ekharakadda ya murwaaye nave ahiikuha moopopheya ekhovaaye.

⁵⁰ Vano Davide aamugonjiha Goliyatooyo ni nlluku na mu yoovokhella nlluku, amwiipha Mufilistooyo ahinna nsupada m'mattani mwaye.

⁵¹ Enthawi yeeyo Davide aathamaka iimella vatulli va Mufilistooyo ahullulla nsupada na Mufilistooyo munigonelani mwiwa amukokholla vomuphaddani muru. Vano Afilisti yoonilliiwa wi muthu amasiva eeruso vakhotoni ookhwa, yaathawa.

⁵² Vano akhoto a o Israele ni a o Yuda yahaamba okhuwa ewiikarihaka Afilistaalle ophiya o Gati ni omillakoni dda Ekeroni. Vano Afilisti oophoreya yaamiddamiddeya m'musewuni mutthemwene waambeella o Shaaraimu ophiya o Gati ni o Ekeroni.

⁵³ Vano akhoto a Aisraelaalle yaawaawo woowiikara Afilisti wulle, eya omisasani ddakhoto dda Afilisti yaakha ddeko dda m'misasani.

⁵⁴ Vano Davide aakusa muru wa Goliyatooyo ayaana o Yerusalemu. Koma ezida ddakhoto dda Mufilistooyo ahiyalle omisasani waye.

Davide aakuselliwa wa Saulo

⁵⁵ Saulo amonne Davide ayaaka woowana ekhoto ni Mufilistoolle, aamukoha Abinere, akhoto muullupalli wi, “Ethiyo weyaano Abinere, musomboolla tti mwaana awani?” Abinere ahaakhulla wi, “Pepaani amwene, nginamudduwella”

⁵⁶ Mwenoolle aallota wi, “Khawe wakohesese dda musomboolla wi tti mwaana awani?.”

⁵⁷ Vano Davide aweeye woomwiipha Goliati wulle, Abinere aamukusa ayaana wa Saulo muru wa Goliyatoolle ori m'mattani mwaye.

⁵⁸ Saulo aamukoha Davide wi, “Ethiyo we musombwe, ori mwaana awani valle?” Davide ahaakhulla wi, “Mi tti mwaana a mullupa muttekwaanyu Yese a o Betelehemu.”