1 Samuele 16 - Mawu a Mulluku

Davide anazoziwa wi akhalle mwene

¹ Apwiya yaallota wa Samuele wi, “Ethiyo onaakhalle omwinllellaka Saulo ophiyera niini vawi koomukhoota wi ahikhalle mwene owaalamulella Aisraele? Oddallihe makhura mu yookusellaaweeyo. Oye wa Yese o Betelehemu vawi kohiiphwanyella mwene variyari va anaaye aallopwana.”

² Samuele ahaakoha Apwiya wi, “Kinaawore mwawiidde oyaawo? Saulo iiwa ddenndda, aneerokiipha.” Apwiya yaallota wi, “Waayaakawo okuse eng'ombe yaamutthiyana nave wallote wi, ‘Kaweella waaheraatthella mukutho Apwiya.’

³ Omwiithane Yese omukuthoninko, vano kineerewuulleella yawi weere. Nave wakizozelle oyo kinaawuuromollelleemi nnddina naye.”

⁴ Samuele aheera nnddo Apwiya yamulamulalliiwa, aphiya o Betelehemu. Oohoollella a m'muzindanimmo yamuchingamella etthukumellaka nave yamukoha wi, “Ethiyo mwaweella waarera?”

⁵ Samuele ahaakhulla wi, “Ee, kaweella waarera. Kaweella waaheraatthella mukutho Apwiya. Muddeellihe nave niye naheraatthi mukutho.” Samuele aamupatula Yese ni anaaye aallopwana nave aamwiithana wi yavelleellena mukutho.

⁶ Attheenaalle ephiyalle, Samuele aamoona Eliyabu mwaana a Yese nave allota m'murimanimurimani wi, “Yoolla ttuukhalla oozoziwa* a Apwiya.”

⁷ Koma Apwiya yaamulleella Samuele wi ohinawehaka oreera apaalle orekama waye vawi yooyo koomukhoota. Apwiya khenoona wonanko athu enoonelliiwa. Athu enaweha dda otte koma Apwiya enaweha dda m'murimani.

⁸ Vano Yese aamwiithana Abinadabu amurumiha wa Samuele. Nave Samuele aallota wi, “Yoollattho Apwiya khemutthoonlle.”

⁹ Yese aamwiithana Shama wi aye wa Samuele. Koma Samuele aallota wi, “Yoollattho Apwiya khemutthoonlle.”

¹⁰ Yese ahaarumiha anaaye aallopwana atthanu ni eelli mmodda mmodda wa Samuele. Koma Samuele aallota wi, “Apwiya kheyaatthoonlle yaalla.”

¹¹ Vano Samuele aamukoha Yese wi, “Anaawo tti yaallave?” Yesooyo aallota wi, “Ookhallavo mmodda ethwako ahanlle koma olliyoolla anachiha enkhosa.” Samuele aamulleella Yese wi, “Murumeni muthu amukuse vawi khanivelleella mukutho ophiyera olliyooyo awiille.”

¹² Vano yaamuruma muthu amukusa, awaana. Aari oofiira ni mooneyellwaaye yaari ooreera mookusa murima. Apwiya yaallota wi, “Timulla wamuzoze.”

¹³ Samuele aakusa yookusellamo makhura, amuzoza vamiitthoni va asinne. Nave Munepa wa Apwiya waamuvollowa Davide mwamasiva waambeella nllapo nenno oya muhoollo. Vatulli viwa Samuele aatimulla oya o Rama.

Davide anamwiipella gitala Saulo

¹⁴ Enthawi yeeyo Munepa wa Apwiya waavenyamo mwa Saulo. Nave munepa woonanara, woovenyera wa Apwiya wahaamba omukatamiha.

¹⁵ Oomurumeyellaaye yaamulleella wi, “Vano munepa woonanara woorumiwa ni Mulluku onnukatamihani.

¹⁶ Nyu Apwiya, nilamulelleni hiyaano allupa muttekwaanyu wi namwaashe muthu eeruso yoomwiipa gitala. Munepa woonanaroolla wuuphiyerani muthooyo amwiipeke gitala nave muneerekophwanya phaama.”

¹⁷ Saulo ahaalleella wi, “Khaweni mwakaashelle muthu oomudduwella omwiipa phaama gitala nave muweena wuno.”

¹⁸ Mmodda mwa allupa muttekwaayo aallota wi, “Koomoona mwaana aamullopwana a Yese o Betelehemu oyo ari ni eruso yoomwiipa gitala, muthu oollipa murima, ooreera, akhoto ni oochenjera voollotani. Nave Apwiya eri ni olliye.”

¹⁹ Sika Saulo ahaaruma amithengaaye wa Yese yallota wi, “Kirumihelle Davide mwanawo, olle anachiha enkhosa.”

²⁰ Yese aamukusa bulu, amumakellellavo buledi, nthumba nooddalla ni vinyo owaaka musaanaapuri. Ddittheddenennddo aamwinnya Davide mwanaye wi avelleelle wa Saulo.

²¹ Davide aphiyalle wa Saulo ahaamba muttekwaaye woomurumeyella. Saulo aamukonda wunchichi vawi amutthattusa akhalla ootukhulla ezipangizo ddaye ddakhoto.

²² Saulo aarumiha mawu wa Yese wi, “Davide akhalle ookirumeyellaaka vawi koomweerella echifundo.”

²³ Vano erive enthawi munepa woonanara wamuphiyera Saulo, Davide aanamukusa gitalaaye anamwiipa. Eeddiiddo Saulo aanaphwanya phaama nave munepa woonanara waanamuhiya.