1 Samuele 15 - Mawu a Mulluku

Saulo anawana ni Amaleke

¹ Nllapo nimodda Samuele aamulleella Saulo wi, “Apwiya yaakiruma wi kuuzozeni wi mukhalle mwene a athwiiwa Aisraele. Vano iwellani othenga woovenyera wa Apwiya.”

² Apwiya Amasiva Mattheene enallota wi, “Kineerewaallaka Aamaleke kaambiiwa yaawana ni Aisraele ottilla, Aisraelaayo evenyeraka o Iguputo.

³ Khaweni vano mwawanena ekhoto Aamalekaayo, moononge ddeko ddiwa ddittheddene oohihiya naari mmodda. Mwawiiphe allopwana, atthiyana, anamwani ni akantcheweene. Mwiiphettho eng'ombe, enkhosa ni abulu attheene.”

⁴ Vano Saulo aawiithaniha akhotwaaye attheene, aweerenga o Telaimu. Akhoto aweeta muthaani yaari 200,000, akhoto a o Yuda yaari 10,000 vamodda.

⁵ Saulo aphiyalle o muzinda wa Aamaleke, aawiipitthella m'mutthipiddani.

⁶ Vano ahaalleella Akeni wi, “Muvenyewo wa Aamaleke, kinaawe kiwoonongelleni nimodda. Vawi nyuwaano mwaaweerella echifundo Aisraele evenyeraka o Iguputo.” Akeni yaavenyawo wa Aamaleke.

⁷ Saulo ahaagonjiha Aamaleke ovenyera o Havila ophiya o Shuri, wookhuma nndduwa wa Iguputo.

⁸ Yaamukusa Agagi, mwene Aamaleke, ari mukumi koma athu amodda attheene yaawiipha.

⁹ Koma Saulo ni athu ayo aariiyena, kheyaamwiiphalle mwene Agagi. Kheyaawiiphallettho enkhosa ni eng'ombe ddooreeresesa, asaanaang'ombe ni asaana a enkhosa ayo yaari ooneneva ni ddeko ddittheddene nnddo ddaari ddaphaama. Yoonongille ddennddove ddaari ddoohikhalla ni mutteko ni ddoohitthopoowa.

Apwiya enamukhoota Saulo

¹⁰ Vano Apwiya yaamulleella Samuele wi,

¹¹ “Kinamoriwa ethakaraka vawi kaamuvaha omwene Saulo. Oohokollweella mutulli ohiya okithwara miyaano vohiiwellellani malamulwaaka.” Samuele aasha murima nave ahinllella wa Apwiya mahiiyu mattheene.

¹² Ohinase, Samuele aavenya wi akumane ni Saulo. Athu yaamulleella wi, “Saulo aaya o Karimele nko imakenlleeye opoto awuupuwelliha, vano ookhwaranyella o Giligala.”

¹³ Samuele aphiyalle wa Saulo, Saulooyo aallota wi, “Apwiya yuudaliseni. Koheera erive ello Apwiya yakilamulalliiwa.”

¹⁴ Koma Samuele aallota wi, “Vano eziweto kiniiweemi ddinllakannddo tti dda tini?”

¹⁵ Saulo ahaakhulla wi, “Ddennddo kaddikusalle wa Aamaleke vawi athu yaasunga enkhosa ni eng'ombe ddaphaama wunchichi wi yavelleelle mukutho wa Apwiya Mullukwaanyu. Koma ddimodda ddittheddene naaddoononga”

¹⁶ Samuele aamulleella wi, “Maallani kuulleelleni nnddo Apwiya ekilleelliiwa mahiiyu.” Vano Saulo allota wi, “Llotani.”

¹⁷ Samuele aallota wi, “Naari muddoonaka wi muri oohipaalleya wunchichi vamiitthoni va athu koma muri oohoollella malloko mattheene a Aisraele. Apwiya yahuuzozani wi mukhalle mwene owaalamulella Aisraele.

¹⁸ Nave Apwiya yahuurumani wi, ‘Khawe wawoononge Aamaleke, athu oonanara murimaalle nave wawanena ekhoto ophiyera waatthollosille attheene.’

¹⁹ Kaambiiwa tini muhiiwellelleenyu mawu a Apwiya? Kaambiiwa tini mwathamakenlleenyu ddawaakha okhotoni ni weera ddoonanara vamiitthoni va Apwiya?”

²⁰ Saulo aallota ni Samuele wi, “Iyaayi, miyaano kahaathwara mawu a Apwiya, kaayaawo keera nnddo Apwiya yakirumalliiwa. Kaamuphara Agagi mwene Aamaleke ni owiipha Aamaleke attheene.

²¹ Koma athu yahaakhawo enkhosa ni eng'ombe ddoophwanella woonongiwa wi yaavelleellelle mukutho Apwiya Mullukwaanyu, o Giligala.”

²² Koma Samuele aallota wi, “Ethiyo Apwiya enahakallalla ni tini, mukutho wooshellelliha ni mikutho ddimodda, apaalle wiiwellella mawaaye? Wiiwellella ni ovelleella mukutho, waphaama tti wiiwellella. Waapella maaru ni ovelleella makhura a enkhosa, waphaama tti waapella maaru.

²³ Owukila tti ochimwa wonanko woombesa makhanga. Wiitukhulla tti ochimwa wonanko ollapella milluku ddooromolliwa terafimu. Vawi wookhoota weera nnddo Apwiya yuulleelliiwa, aaganizattho wi weyaano ohikhalle mwene.”

²⁴ Saulo aamulleella Samuele wi, “Koochimwa, ngaawiiwellelle Apwiya ni nyuwaano vawi kawoova athu ni owiiwellella alliwaayo.

²⁵ Kinimuupepesani, mukikhululukelle nichimo naka. Nave mwaarowaka nikhalle attheene wi kaallapelle Apwiya.”

²⁶ Koma Samuele aamwaakhulla Saulo wi, “Khanithaanana vawi mwaakhoota wiiwellella mawu a Apwiya, alliwattho ahuukhootani wi muhikhalle mwene owaalamulella Aisraele.”

²⁷ Samuele arukunuwaka wi aroweke, Saulo aaphara mukhwipi mwa mukanjo wa Samuele nave mukanjooyo wahaahuwa.

²⁸ Samuele aamulleella wi, “Apwiya ahaahulla omwene wa Aisraele ovenyera wa nyuwaano ollello ewuuvelleella wa mukhwiinyu aphaama wuukhwaranyani nyuwaano.

²⁹ Mulluku antitimiho a Aisraele, khanoottha apaalle osintha maganizo. Vawi olliye khe muthu wi ttuusintha maganizo.”

³⁰ Vano Saulo aallota wi, “Mi koochimwa komave mukivahe olemu vamiitthoni va owaahoollella athwaaka ni vamiitthoni va Aisraele attheene nave mwaarowaka nithaanane wi kaallapelle Apwiya Mullukwaanyu.”

³¹ Sika Samuele aahokollowa athaanana ni Saulo nave Saulooyo ahaallapella Apwiya.

³² Vano Samuele aallota wi, “Wannani wuno Agagi, mwene Aamaleke.” Nave Agagi aaphiya wa Samuele moohakallalla allota mwa yeekhaaye wi, “Ovoreya wa okhwa woovira!”

³³ Koma Samuele aallota wi, “Nsupada nawo nooweeriha atthiyana wi ehikhalle ni anamwani. Emoddamoddave yeeyo amaayo khekhalla ni anamwani, moophwanaphwana ni atthiyana amoddaayo.” Vano Samuele aamwiipha Agagi amuphadda enthuli enthuli vamiitthoni va Apwiya o Giligala.

³⁴ Vano Samuele aaya o Rama koma mwene Saulo ayiille owaniwa o Gibea.

³⁵ Ovenyera vaavo Samuele khaamoonillettho Saulo ophiyera okhwa waye koma aanamwinllellave. Nave Apwiya yaamoriwa ethakaraka vawi yaamweeriha Saulo wi akhalle mwene a Aisraele.