1 Samuele 14 - Mawu a Mulluku

Yonatani anaagonjiha Afilisti

¹ Nllapo nimodda Yonatani mwaana a Saulo, aamulleella musombwe oyo atukhulla ezipangizo ddaye ddakhoto wi, “Hanko nillapuwe niye omisasani dda akhoto a Afilisti okhopella wulle.” Koma khaawaalleelle attiitthinnya.

² Saulo akeraatthesa m'malireni a Gibea, vatthi va muteekho wa makangaza o migironi. Athu yaari ni olliye yaari 600.

³ Vaakhallattho Ahiya, mullupa mukutho oyo awara yoowara yoopangiwa ni ekuwo yaweella wunchichi yookhalla ni efodi.* Olliyoolla aari mwaana a Ahitubi, mwanamunne a Ikabodi mwaana a Finehasi. Finehasooyo aari mwaana a Eli, mullupa mukutho muullupalli a o Shilo. Vano athu kheyaadduwella wi Yonatani oovenyavo.

⁴ Vampatanimvo Yonatani apaalleeye wi aweellevo wi aphiye omisasani dda akhoto a Afilisti, vaakhalla malluku muullupalli meelli. Nimodda noottherereyella embali emodda nave nimodda noottherereyella embali emodda. Nnddina na nlluku nimodda yaneera Bozezi nimoddanno yaneera Shene.

⁵ Nlluku nimodda naari ompoto moowehana ni Mikimashi nave nimodda naari omwera noowehana ni Geba.

⁶ Yonatani aamulleella musombwaayoolle wi, “Hanko nillapuwe niye omisasani dda akhoto a Afilisti oohiphaddiwaalla. Apaalle Apwiya ttuunikavihera. Vawi kheyiivo yowaavaanyiha Apwiya onikavihera wi naagonjihe naari nihaatille.”

⁷ Musomboolle aallota wi, “Mweere ddittheddene moollikana ni mmo murimaanyu onapaallelliiwa. Miyaano kiri ni nyuwaano, mmo munaganizereenyu miyaanottho kinaganiza ddiiddo.”

⁸ Vano Yonatani aallota wi, “Hanko nillapuwelle wa athwaalle naddoonihelle wa alliwaayo.

⁹ Yanilleella wi, ‘Munitiyere ophiyera nuuphwanyilleni,’ Niimelle, nihiye wa alliwaayo.

¹⁰ Koma yallota wi, ‘Waani wuno,’ hiyaano niyeewo vawi Apwiya ahaahiya athwaayo m'mattani mwahu, yeella enaakhalle echizindikiro wa hiyaano.”

¹¹ Sika athu eellaalla yahiimella vaweella wi akhoto Aafilistaalle ewoone. Vano Afilisti yaallota wi, “Aheberi ahaamba okhuma m'mallitini yiipitthalliiwa.”

¹² Vano akhotwaayo yaamukhuwella Yonatani ni musombwaayooyo wi, “Ngawani wuno, niwooniheni!” Yonatani aamulleella musombwaayooyo wi, “Okithwareke, Apwiya aanivaha ekari wi athwaalle naagonjihe.”

¹³ Yonatani aawella mwawaapadda, musomboolle amuthwaraka mutulli. Vano Yonatani aawana ni Afilistaalle, anaakomolla, musomboolle anaakokholla mutulli mwaye.

¹⁴ Athu ayo Yonatani ni musomboolle yawiiphalliiwa vawaamba valle yaakwakhwana 20, yawiiphelle vanipuroni nooyeva wonanko hafu a ekala.

¹⁵ Vano Afilisti attheene yahaapheella miru ni woova wuullupalli. Akhoto a omisasani wulle ni awoononga yaatthukumella wunchichi. Ellapo yaatikheya nave otikheyanko wahoonjerera woova wa Afilistaalle.

Ogonjihiwa wa Afilisti

¹⁶ Alonda a Saulo a o Gibea, echigawo ya Benjamini yahoona mulloko wa adanaalle opallalleyellaka nngu ni nngu.

¹⁷ Vano Saulo ahaalleella athu aariiyenaalle wi, “Weerengeni athu wi muwoone evennyevo.” Eweerengille, yaaphwanya wi Yonatani ni Musombwaaye, kheyiivo.

¹⁸ Saulo amulleella Ahiya wi, “Waana wuno efodooyo.” Enthawi yeeyo efodi aari ni Ahiya vamiitthoni va Aisraele.

¹⁹ Saulo allotaka ni mullupa mukuthooyo, onyakulla wahaata omisasani dda Afilisti. Vano Saulo aamulleella mullupa mukuthoolle wi, “Hiya, ohinoombesa!”

²⁰ Saulo ni athu aariiyena yaatthukumana wi eye yawanake ni Afilisti nave yaawoona Afilisti yiiphananaka anayaayove mwawaanganyereya.

²¹ Aheberi amodda ayo khalle yaari ni Afilistaayo nave yaari eri omisasaninko, naalliwanittho yahaarukunuwella Afilistaayo ekhalla embali ya Aisraele enamukavihera Saulo ni Yonatani.

²² Emoddamoddave yeeyo Aisraele ayo yiipitthalle mu ellapo yamiyaango ya Efuremu, yiiwalle wi Afilisti enimathawa, naalliwanittho yahaamba owiikariha Afilistaayo.

²³ Nave ekhotweeyo yaawaniwa ophiyera yaakhwaranya muzinda wa Betaveni. Mmu sika Apwiya yaavulluselliiwa Aisraele nllapo nenno.

Saulo anaatembelela attheene enaache

²⁴ Koma akhoto Aisraele yaahoowa nllapo nenno vawi Saulo aawoopopiha voollotani wi, “Atembeleliwe muthu oyo anaache ohinasikuwe nave kihinamallihe waahokollosella ddoonanara adanaaka.” Khaavo naari mmodda allawihalle yoocha.

²⁵ Vano attheene evollowille muutthakoni yaaphwanya enwi endonyellaka vatthi.

²⁶ Ephiyalle muutthakoni mulle yahoona enwi yoorikella endonyaka. Koma khaavo naari mmodda allanddille vawi yoova otembeleliwa wulle.

²⁷ Koma Yonatani khaawiiwalle mmo attiitthinnya yaallupellelliiwa athu. Aaronttha enwi yoorikelleeyo ni etthoka ya ekopo eyo yaari m'mattani mwaye. Ayichille owiitthoni waakamuwa.

²⁸ Vano mmodda a athwaayo aallota wi, “Attiitthaanyu aanoopopiha voollupellani wi, ‘Atembeleliwe oyo anaache ello ollello.’ Ella sika ekaambiiwa athwaalla enahalliiwa vang'ono okhwa ni ettalla.”

²⁹ Vano Yonatani aallota wi, “Attiitthaaka ahaahoosa athu. Miyaanothi owiitthoni wookamuwa killawihalleemi vang'ono enwi yoorikelleella.

³⁰ Waphaama athu yachilleke opaalla wiiwa ddoocha nndde yaddaakhilliiwa wa adaniiwa. Ddaariki ddiiddo neerowiipha Afilisti anchichi.”

³¹ Nllapo nenno Aisraele yaawiipha Afilisti ovenyera o Mikimashi ophiya o Ayaloni. Koma Aisraelaayo yahanlle vang'ono okomowa ni ettalla.

³² Nave sika yaathamakella va nnddo yaakhilliiwa wa Afilisti. Yaakusa enkhosa, eng'ombe ni asaaniiwa, eddiipha. Nave yaaddicha ehaambille otathilla nikhame niwa vatthi.

³³ Koma amodda yaamulleella Saulo wi, “Athu enaachimwella Apwiya voochani enamannddo ehaambille otathilla nikhame niwa.” Saulo aallota wi, “Mohaarukunuwella Apwiya ollello! Ashani nlluku nuullupalli muniphikiriselle wuno.”

³⁴ Nave aallotattho wi, “Khaweni m'misasani mwaalleelle athu attheene wi, ‘Arive muthu aweena eng'ombaaye apaalle enkhosaaye ayiiphe ni oyichella vaava. Nave muhaachimwelle Apwiya voochani nimodda ni nikhame nene.’ ” Vano arive muthu aawaana eng'ombaaye mahiiyu vaavo ayiiphella wenko.

³⁵ Vano Saulo ahaamakella Apwiya nikuwa. Nna naari nikuwa naye nawaamba waamakella Apwiya.

Ochimwa wa Yonatani ni ovullusiwa waye

³⁶ Saulo aallota wi, “Hankoni niyeewo mahiiyu naathware Afilisti, nawiiphe athu attheene nave nawaakhe ddeko ddiwa ophiyera ohinase.” Athwaayo yaallota wi, “Mweere eyo munapaalleenyu.” Koma mullupa mukutho aallota wi, “Hankoni naambe oveka ezeru wa Mulluku.”

³⁷ Vano Saulo aamukoha Mulluku wi, “Ethiyo naathware Afilistaalla? Ethiyo moonivaha ekari wi niwiiphe?” Koma Mulluku khaamwaakhullalle nllapo nenno.

³⁸ Vano Saulo aallota wi, “Waani wuno nyu munaahoollella athu. Noone wi tti ochimwa wawiidde weereyille ollello

³⁹ Kinimallupella vamiitthoni va Apwiya, ayo enaavullusa Aisraele, oochimooyo naari akhalle mwanaka, iiphiwe.” Koma khaavo naari muthu mmodda amwaakhullalle.

⁴⁰ Vano ahaalleella Aisraelaayo wi, “Nyu mukhalle embali emodda nave miyaano ni mwanaka Yonatani nikhalle embali emodda.” Athwaayo yaamulleella Saulo wi, “Mweere eyo munapaalleenyu.”

⁴¹ Ella sika ekaambiiwa Saulo allotilleeye wi, “Nyu Apwiya Mulluku a Aisraele, kaambiiwa tini muhikaakhullalleenyu ollello mi oorumeyellaanyu? Tti miyaano apaalle mwanaka Yonatani achimwalle? Nyu Apwiya Mulluku a Aisraele, killeelleni.” Vano ddamumorelle Saulo ni Yonatani woohikhalla Aisraelaalle.

⁴² Vano Saulo aamulleella Ahiya wi, “Akohe Apwiya yuulleelle kaari miyaano kichimwalle apaalle Yonatani.” Vano Yonatani aaphariwa.

⁴³ Saulo amulleella mwanaye wi, “Ngakilleelle weerelle tini?” Yonatani ahaalleella attiitthinnyaalle wi, “Kaallawiha vang'ono enwi yoorikella ni etthoka ya ekopwaaka. Vano miyaano kiri okhozeka wi kiiphiwe.”

⁴⁴ Saulo aallota wi, “Kinimallupella wi Mulluku akillake weyaano waahiiphiwa.”

⁴⁵ Koma athu yaallota wa Saulo wi, “Iyaayi, Yonatani oophara mutteko wowaavullusa Aisraele okhotoni, vano khaniwaakhullellani wi mumwiiphe naari omuukutha. Eerilleeye ollellonndde amukavihere tti Mulluku.” Vano athu yaamuvullusa Yonatani nave khaawiiphiwe.

⁴⁶ Saulo aahiya waathwara Afilisti. Nave Afilistaayo yahokollweella owaniwa.

Dda olamulella wa Saulo ni nibanja naye

⁴⁷ Saulo aariiye mwene owaalamulella a Aisraele, aawana ekhoto ni adanaaye attheene. Aawana ni Amowabu, Aamoni, Aedomu, mamwene o Zoba owaakattho Afilisti. Orive weko ayeeyewo aanaagonjiha.

⁴⁸ Aheera ddamasiva nave ahaagonjiha Aamaleke. Ahaavullusa Aisraele wa ayo yawaakha ddeko ddiwa.

⁴⁹ Anamwani aallopwana a Saulo yaari Yonatani, Ishivi ni Malikishuwa. Aakhallattho ni anamwani aatthiyana eelli. Muullupalli aari Merabi, mung'onong'ono aari Mikala.

⁵⁰ Mwaara a Saulo aari Ahinowamu mwaana a Ahimaazi. Nave akhoto muullupalli a Saulo aari Abinere mwaana a Nere, mwanamunniwa a attiitthinnya Saulo.

⁵¹ Kishi attiitthinnya a Saulo ni Nere attiitthinnya a Abinere, yaari anamwani a Abiyele.

⁵² Okumaaye muttheene wa Saulo akhallella owanave ekhoto ni Afilisti. Vano amoona muthu amasiva apaalle oollipa murima aanamukusa wi akhalle mu mulloko wa akhotwaaye.