1 Samuele 13 - Mawu a Mulluku

Aisraele enawana ni Afilisti

¹ Saulo avollowille omwene ari ni miyakha 30 nave aalamulelle Aisraele miyakha 42.

² Enthawi emodda olliye ahaatthoolla Aisraele 3,000. Mwa athu yaalla, 2,000 yakhalla ni Saulo o Mikimashi ni o ellapo yamiyaango o Betele nave 1,000 yaari ni Yonatani o Gibea echigawo ya Benjamini. Athu amodda attheene oohallaayo ahaahokollosella owaniwa.

³ Yonatani aamwiipha akhoto muullupalli a Afilisti oyo aari o Geba nave Afilisti yahiiwa ddenndda. Saulo ahaaruma athu wi yiipe nipallapata ellapo ettheene waallella Aheberi wi yiiwe yeereyilleeyo nave eye okhotoni.

⁴ Aisraele attheene yahiiwa wi Saulo oomwiipha akhoto muullupalli a Afilisti nave Afilisti ahaashella murima Aisraele. Athu yahiithaniwa wi eye wa Saulo o Giligala.

⁵ Vano Afilisti yaatthukumana wi ewaneke ni Aisraele. Yahaatthukumaniha magareta akhoto 30,000, oowella va akavalo 6,000 ni akhoto awaata wonanko mihava dda mukhwipi mwa enyanja. Yaaya yamakaka misasa ddiwa o Mikimashi, wookhuma nndduwa wa Betaveni.

⁶ Aisraele yoonilliiwa wi aapaneya vawi yaananyingallelliwa wunchichi, yaaya yiipittha m'makhunguni, m'mallitini, m'mallukuni, m'mitthipiddani ni mwiihimeni.

⁷ Amodda yaallapuwa muhinje wa Yordani yaphiya o echigawo ya Gadi ni ya Giliyadi. Saulo aari o Giligala wenko nave athu yaari ni olliye yaatthukumella ni woova.

⁸ Saulooyo aatiyerella mallapo matthanu ni meelli moollikana ni mmo allotelle Samuele. Koma Samuele khaaphiyallewo o Giligalanko nave athu yahaamba opallalleya omuhiya Sauloolle.

⁹ Sika Saulo aallota wi, “Wannani wuno mukutho wooshellelliha ni mukutho wa eyaattano,” Nave Saulo aavelleella mukutho wooshellellihoolle.

¹⁰ Amallihalle ovelleella mukuthoolle, Samuele aaphiya. Vano Saulo aaya akumanana ni omullochella.

¹¹ Samuele aamukoha wi, “Ella weerilleewe tti tini?” Olliye ahaakhulla wi, “Koonilleemi wi athu enimapallalleya okihiya nave vawi khamwaaphiyalle enthawi mwallotilleenyu wi muneerophiya navettho wi Afilisti aatthukumana o Mikimashi,

¹² kaaganiza wi, ‘Afilisti eneeroowa wi ewane ekhoto ni miyaano weewuno o Giligala kihinaallapelle Apwiya wi ekikavihere.’ Sika kahiiwatihera wi kivelleelle mukuthoolla.”

¹³ Samuele aamulleella wi, “Moheerathi ddookarangeya, khamuthwarihalle nnddo Apwiya Mullukwaanyu, yuulamulalleniiwa. Mwathwarihalleke, yeerokeraatthiha omwenaanyu wi mwaalamulelle Aisraele enthawi yoohimalla.

¹⁴ Koma vano omwenaanyu khollekella. Apwiya aaddaashella weekhiiwa muthu a vamurimani viwa wi akhalle mwene owaahoollella athwiiwa ekaamba yawi khamwaathwanre nnddo Apwiya yuulamulalleniiwa.”

¹⁵ Samuele aavenyawo o Giligala aya o Gibea, echigawo ya Benjamini. Athu ayo yahanlle yamuthwara Saulo okhotoni. Aweerengille aphwannye wi eri 600.

Saulo anakhozekella ekhoto

¹⁶ Vano olliye ni mwanaye Yonatani ni athu ayo aariiyena, yamaka misasa ddiwa o Geba echigawo ya Benjamini. Koma Afilisti yatthipenlle misasa ddiwa o Mikimashi.

¹⁷ Awoononga a Afilisti yaakhuma omisasani wiwa ekawaneyille milloko miraru. Mulloko mmodda wayiille o Ofura, echigawo ya Shuwala.

¹⁸ Mulloko mmodda wakusalle ettilla yooya o Betehoroni nave mmoddooyo ettilla yooya omalireni moowehana ni va ntapo na Zeboimu muchipululuni.

¹⁹ Enthawi yeeyo mu Israele mutthemwene khamwaari naari muthu mmodda eeruso yoohana kaambiiwa Afilisti yaallota wi, “Nihinawaakhullella Aheberi wi yiihanelleke yeekhiwa masupada ni mavaka.”

²⁰ Vano arive muthu mu Israele aapaallaka waandusiha epulawo, ehipa, kottokwa apaalle echikwakwaaye aya wa Afilisti.

²¹ Mutengo wootthokollella ddekonndda waari woowallamella.

²² Vano nllapo nakhotonno khaavo naari mmodda a Aisraele ayo yamuthwara Saulo ni Yonatani, akusalle nsupada apaalle nivaka. Saulo ni mwanaye sika yakusalle.

²³ Vano Afilisti yaaruma mulloko wakhoto wi wawehereke vampatani wa o Mikimashi.