1 Samuele 12 - Mawu a Mulluku

Samuele anaallaanya athu

¹ Samuele aallota wa Aisraele attheene wi, “Koowinnyani mwene wi ulamulelleni moollikana ni mmo mwakivekelleenyu.

² Vano mwene sika anuuhoollellekeni. Miyaano kohuulluvalla, meehaaka tti alla eri ni embwi nave anaaka tti yaayo muriinyuna nimodda. Kookhalla kuuhollellakani waambeella kiri musombwe.

³ Kuukoheni apaalle yookhallavo eyo kichimwalleemi wa nyuwaano? Yaarivo kiivaanyiheni vamiitthoni va Apwiya ni va mwenaanyu oozoziwa.* Ethiyo ttaani kamwaakhillekeemivo eng'ombe? Ttaani kamwaakhillekeemivo bulu? Ttaani kamoottotthillekeemivo apaalle omuhoosa. Ethiyo kaakhenlle ddamukaphwani ddawani wi mullatwaaye weete phaama? Oyo anaavelleelle omboni wawoona, kineeromuhokollosella ddittheddene kakusalleemi.”

⁴ Athwaayo yaallota wi, “Khamwaanoottotthille apaalle oninyingallella. Khamwaakusalle erive ello ya muthu mmodda.”

⁵ Vaavo Samuele ahaalleella wi, “Apwiya sika amboni variyari va nyuwaano ni miyaano, nayeenettho oozoziwa a Apwiya sika mboni ollellova wi nginna machimo wa nyuwaano.” Nave athwaayo yaallota wi, “Ddawoona, Apwiya sika amboni.”

⁶ Samuele ahaalleella wi, “Apwiya sika yamutthoollille Mose ni Aroni wi aakhumihe makhollwaanyu mu ellapo ya Iguputo.

⁷ Vano mukhalle vaavo wi kuuvaanyiheni vamiitthoni va Apwiya voowuupusani dda mitteko ddittheddene nnddo yeerilliiwa vawuuvullusani nyuwaano ni makhollwaanyu.

⁸ Yakobo ni nibanja naye yayiilliiwa o Iguputo, Aiguputwaayo enaallaka, makhollwaanyu yaavekella wa Apwiya. Nave Apwiya yahaaruma Mose ni Aroni wi yaakhumihe o Iguputo ni oweeriha wi ekeraattheye o nipuro nenna.

⁹ Koma makhollwaanywaayo yahaatiwalla Apwiya Mullukwiiwa. Nave Apwiya yaamuvaha ekari Sisera, oohoollella a akhoto a muzinda wa Hazori wi awiiphe. Yahaavahattho ekari Afilisti ni mwene a o Mowabu wi ewiiphe. Adani attheenaayo yaawana ekhoto ni makhollwaanyu.

¹⁰ Vano alliwaayo yaavekella wa Apwiya wi, ‘Hiyaano noochimwa kaambiiwa nohuuhiyani nyu Apwiya, ninarumeyella mafano a Baala ni Ashitaroti. Koma vano nivulluseni wa adanaahu nave nineerewuurumeyellani.’

¹¹ Vano Apwiya yaamuruma Yerubaala, Balaki, Yefita ni miyaano Samuele. Arive muthu a hiyaano ahuuvullusani wa adanaanyu ayo yawaapheellani nave mwaakhalla vamurendelleni.

¹² Vano moonilleenyu wi Nahashi, mwene Aamoni aawa wi awane ni nyuwaano nave mwaakilleella wi ‘Iyaayi koma mwene sika anaanilamulelle.’ Koma ovenyera khalle amwenaanyu yaari Apwiya Mullukwaanyu.

¹³ “Vano olla sika mwene mwamutthoonlleenyu, oyo mwamvekilleenyu nave Apwiya yuuvahilleewani.

¹⁴ Mwaawoovaka Apwiya ni owiiwellella mawiiwa, mwaahiwukila malamulwiiwa nave attheenenyu ni mwenaanyu mwaawaathwaraka Apwiya Mullukwaanyu, ddineerekoweetellani phaama.

¹⁵ Koma mwaahiiwellellaka mawu a Apwiya, munawukila malamulwiiwa, mudduwelle wi eneerewuullakani nyuwaano ni mwenaanywiine.

¹⁶ Vano mwiimelle vaavo moone ello yuullupalli eyo Apwiya enapaalliiwa weera.

¹⁷ Ethiyo ella khehiyo ellimwe, enthawi yoomuhata tirigu? Koma kinapaalla kaaveke Apwiya wi emurupihe murimu oowa ni ogugudeya. Moona ddenndda mudduwelle wi ochimwa wanyu tti wuullupalli, voovekani wi mukhalle ni mwene.”

¹⁸ Vano Samuele aavekella wa Apwiya nave Apwiya yaamurumiha murimu oowa ni ogugudeya nllapo nenno. Athu attheene yahoova wuullupalli, owoova Apwiya ni Samuele.

¹⁹ Nave athu attheene yaawa wa Samuele ellota wi, “Pepaani, munivekelle hiyaano oorumeyellaanyu wa Apwiya Mullukwaanyu wi nihikhwe. Noodduwella wi nookhalla nichimwaka mutullimmu nave nohaanjereravo nichimo nimodda voovekani wi nikhalle ni mwene.”

²⁰ Samuele ahaalleella wi, “Muhoove, ochimwa moochimwa koma muhinahiya waathwara Apwiya. Mwaarumeyelleke ni murimaanyu muttheene.

²¹ Nave muhinathwaraka mafano mattheene ayo ehinna mutteko, ayo ehinawora ovullusa vawi khenna masiva.

²² Apwiya kheyaatathilla athwiiwa wi nnddina niwa nuullupalli nihivevuwe vawi yahuutthoollani nyuwaano wi mukhalle athwiiwa.

²³ Komattho miyaano nginapaalla waachimwella Apwiya voohiyani wuuvekellani nyuwaano, kineerewuuhuddihani nnddo ddiri ddaphaama ni ddawoona wi muddeereke.

²⁴ Muwooveke Apwiya nave mwaarumeyelleke mookhulupilileya ni murimaanyu muttheene. Enthawi ddittheddene muupuwelleke ddeko dduullupalli nnddo eweerelleewani.

²⁵ Koma mwaavirellellaka weera ddoonanara mudduwelle wi nyuwaano ni mwenaanyu muneerewoonongeya.”