1 Samuele 11 - Mawu a Mulluku

Saulo anaagonjiha Aamoni

¹ Viviralle mweeri mmodda, Nahashi mwene Aamoni ahaakusa akhotwaaye aya aapheella muzinda wa Yabeshi echigawo ya Giliyadi. Vano athu attheene a m'muzindani wa Yabeshi yaamuveka Nahashooyo wi, “Hankoni nipangane nave hiyaano nineerekewuurumeyellani.”

² Koma Nahashi Mwaamoni ahaalleella wi, “Kineereweera echipangano ni nyuwaano mwakaakhullella wi arive muthu a nyuwaano kimutthorokolle niittho noonnattanatta wi kaawullihe muru Aisraele attheene.”

³ Attekweene o Yabeshi yaamwaakhulla wi, “Munitiyere mallapo matthanu ni meelli wi nirumihe othenga mu ellapo ettheene ya Aisraele. Vano vaahiphwanyeya mmodda onivullusa, nineerewiivelleella wa nyuwaano.”

⁴ Oorumiwaalle yaphiyalliiwa owaniwa wa Saulo o Gibea, yahaalleella athu dda mwahoolla, attheene yahaamba winlla ni murimiiwa muttheene.

⁵ Enthawi yeeyo Saulo aari avenyeraka omata attotthaka eng'ombe ddaye ddoophara mutteko. Vano aakoha wi, “Athwaalla eninllella tini?” Yaamulleella dda athu a o Yabeshaalle.

⁶ Saulo iiwalleeye ddenndda, Munepa a Mulluku aamuvollowa mwamasiva nave aasha murima.

⁷ Mwa eng'ombendde aakusavo piilli addiipha, addiphadda enthuli enthuli. Aawinnya oorumiwaalle wi yawoonihelleke athu attheene a mu Israele ni ollota wi, “Saulo ni Samuele erina waatthukumaniha akhoto, waawoni wi mwakhalle nimodda. Oyo ahinaawere ddiiddo eng'ombe ddaye ddoophara mutteko ddineerewiiphiwa ni ophaddiwa enthuli enthuli.” Vano athwaalle yaawoova Apwiya nave attheene yaatimulla wonanko muthu mmodda.

⁸ Saulo ahaatthukumaniha o Bezeki, aweerenga. Aisraele yaarivo 300,000, Ayuda yaarivo 30,000.

⁹ Ahaalleella athu a o Yabeshaalle wi, “Mwaalleelle athu oowaninyu wi osiisello otthaana, eneerovullusiwa.” Athu a o Yabeshi yiiwalliiwa othenga yoolla yaahakallalla wunchichi.

¹⁰ Ekaamba ya yeella yaamulleella Nahashi wi, “Osiisello nineerewiivelleella wa nyuwaano wi muneerelle eyo munapaalleenyu.”

¹¹ Mahiiyu, Saulo ahaakawa athwaalle milloko miraru nave oyaaka ni osa yaaya yaamba owana ni Aamoni. Yaawiipha Aamonaayo ovenyera enthawi yeeyo ophiyera otthaana. Vano ayo yavulluwalle yaapallalleya, arive muthu athawenlle wa yeekhaaye.

¹² Vano athu yaamukoha Samuele wi, “Ttaani allota wi, ‘Ethiyo Saulo ttuukhalla mwene a hiyaano?’ Wannani athwaayo wi niwiiphe.”

¹³ Koma Saulo aallota wi, “Khaavo ollellova muthu anaawiiphiwe vawi ollello Apwiya aaphara mutteko wowaavullusa Aisraele.”

¹⁴ Vano Samuele ahaalleella athwaayo wi, “Hankoni niye o Giligala wi nawukeraatthihettho omwene wa Saulo.”

¹⁵ Sika Aisraele attheene yaaya o Giligala. Yamwaakhullella Saulo vamiitthoni va Apwiya okhalla mwene. Athu yaavelleella mikutho ddeeyaattano wa Apwiya. Wenko Saulo ni Aisraele attheene yaahakallalla wunchichi.