1 Samuele 10 - Mawu a Mulluku

¹ Vano Samuele aakusa yookusella makhura, aahella makhuraayo va muru va Saulo amukhupaarella allota wi, “Apwiya ahuuzoza wi okhalle mwene a athwaaye, Aisraele. Oneerewaalamulella athu a Apwiya ni waavullusa wa adaniiwa attheene. Echizindikiro yawi Apwiya ahuuzoza wi okhalle mwene a yoohallanaaye tti yawi,

² ollellova nahiyana oneerokumana ni athu eelli va mahame a Rakele o Zeliza mu echigawo ya Benjamini. Alliwaayo eneerewuulleella wi abulu wawaashaawaalle aaphwanyeya. Nave attiittho aahiya ddawaakhupanya abulwaayo koma enakhupanya dda weyaano, enallota wi, ‘Kinaawere tini miyaano vawi mwanaka khanooneya?’

³ Vano wakhwaranya vaavo oneerophiya vamuteekhoni woovelleellella mukutho va Tabori mvo onaakumaneewe ni athu araru eyaaka woovelleella mukutho wa Mulluku va Betele. Muthu mmodda anaattottheke asaanaapuri araru, mmodda anaakuse mitthi miraru dda buledi navettho mmoddooyo anaamukuse vinyo ari mu yookusellamo mwaye oya woovelleella mukutho wa Mulluku o Betele.

⁴ Yuuvaha mooni, eneerewuuvahattho mitthi dda buledi miilli.

⁵ Mweeddiiddo muneerophiya o mwaango wa Mulluku o Gibea nko ori akhoto a Afilisti. Nave mwaawaatamellaka muzindooyo muneerokumana ni mulloko wa anamallotella ekitthaka ovenyera o nipuro noollapellamo yiipaka azeze, ekoma ni ezitoliro, ellotellaka.

⁶ Vaavo Munepa wa Apwiya oneerewuuvollowa moollipa nave naweenettho oneerewaamba ollotella wonanko alliwaayo. Oneerotthattuwa muthu mmodda.

⁷ Vano woona ezizindikiro ddenndda, weere eyo eri yaphaama wa weyaano vawi Mulluku ari ni weyaano.

⁸ Onaahoolle tti weyaano oya o Giligala. Okitiyere wa mallapo matthanu ni meelli vawi kineeroowa wi kivelleelle mukutho wooshellelliha ni wa eyaattano. Wenko kineerewuulangiza ddawi weere.”

Saulo anahokollweella owaniwa

⁹ Saulo arukunuweeye omuhiya Samuele, Mulluku aamuvaha murima mmodda nave ezizindikiro ddittheddenenndde ddaheereya nllapo nenno.

¹⁰ Saulo ni mullupa muttekwaaye ephiyalle o Gibea, yaakumana ni mulloko wa anamallotella. Vano Munepa a Mulluku aamuvollowa Saulooyo, aamba ollotella.

¹¹ Athu ayo yamudduwenlle ovenyera khalle, emonne wi anallotella nimodda ni anamallotella yaakohana wi, “Emweereyelle tti tini mwaana a Kishi? Saulo ttuukhalla mmodda mwa anamallotella?”

¹² Muthu mmodda a wenko ahaakhulla wi, “Vano amoddaalla attiitthiiwa ttaani?” Mva sika vaambeelle ollota wawi, “Saulo ttuukhalla mmodda mwa anamallotella?”

¹³ Saulo amallihalle ollotellanko aaya o nipuro noollapellamo.

¹⁴ Mwanamunniwa a attiitthinnya Saulo, amonne Saulo ni mullupa muttekwaayoolle, ahaakoha wi, “Mwaari wuuwi?” Saulo ahaakhulla wi, “Nawaashaasha abulu. Noonille wi khenaphwanyeya, naaya wa Samuele.”

¹⁵ Vaavo mwanamunniwa a attiitthinnya a Saulo aallota wi, “Killeelle nnddo uulleelle Samuele.”

¹⁶ Saulo aallota wi, “Samuele aakilleella wi abulwaayo aaphwanyeya.” Koma khaallonte ello dda omwene nndde Samuele amullenlleeye.

Saulo anatthoolliwa okhalla mwene

¹⁷ Vano Samuele aawiithana athu o mutthukumano wa mallapello o Mizipa.

¹⁸ Ahaalleella Aisraele attheene wi, “Apwiya Mulluku Aisraele, anallota wi, ‘Kahuukhumihani nyu Aisraele mu ellapo ya Iguputo nave kahuuvullusani wa Aiguputo ni wa mamwene mattheene yuuhoosani.’

¹⁹ Koma ollello, nyuwaano moomukhoota Mullukwaanyu oyo uuvullusalleni mu ddoohoosa ni ddookatamiha ddanyu. Munallota wi, ‘Iyaayi! Koma muninnye mwene oonilamulella.’ Vano mutthukumane vamiitthoni va Apwiya moollikana ni mallokwaanyu ni mabanjaanyu.”

²⁰ Vano Samuele aatthukumaniha malloko mattheene a Aisraele nave Apwiya yaatthoolla nlloko na Benjamini.

²¹ Samuele atthukumanihalle nlloko na Benjamini, nibanja ni nibanja nave nibanja na Matiri naatthoolliwa. Voomallihani ahaatthukumaniha athu a mu nibanja na Matiri mmoddammodda nave Saulo mwaana a Kishi sika atthoolliwe. Yaamwaashaasha koma kheyaamuphwanyille.

²² Vano athwaayo yahaakoha Apwiya wi, “Ethiyo Sauloolla ari weewuno?” Apwiya yahaakhulla wi, “Ee iipitthalle variyari va katundu.”

²³ Vano athu yaathamaka yamukusa iipitthalleeyenko. Iimenlle variyari va athu ahooneya wi aari oorekama omukhwaranya arive muthu. Athu amodda yamukomella m'mathurini.

²⁴ Vano Samuele ahaakoha wi, “Ethiyo munnamoona muthu oyo Apwiya emutthoonlliiwa? Khaavo mmodda oophwanaphwana ni yoolla variyari vanyu.” Sika athu attheene yaakhuwa wi, “Amwene ekhalle ni okumi woorekama!”

²⁵ Vano Samuele ahaatthopoollella athwaayo ddeko ddoomuphwanella mwene. Nave aaddilemba munibukhuni aya ahiya nibukhunno vanipuroni naweella mvo Apwiya yallapelliwiiwa. Samuele ahaalleella athu wi eroweke.

²⁶ Saulo nayeenettho aaya o enyumbaaye o Gibea. Athaanana ni athu amasiva ayo Mulluku awoollowihalleeye murima.

²⁷ Koma athu amodda oonanara murima yaallota wi, “Ethiyo muthu yoolla anaawore onivullusa mwawiidde?” Sika yahaamba omuvevulla Saulooyo vawi kheyaamwinnyattho emphaso ddaye. Koma Saulo khallota ello.