1 Samuele 1 - Mawu a Mulluku

Elikana ni nibanja naye o Shilo

¹ Waakhalla muthu mmodda nnddina naye aari Elikana oovenyera mu nlloko na Efuremu o etawoni ya Rama eyo yaari mu ellapo yamiyaango ya Efuremu. Olliye aari mwaana a Yerohamu edduullu ya Elihu, edduullu ya Tohu, edduullu ya Zufu, a nlloko na Efuremu.

² Elikana aari ni awariye eelli, Hana ni Penina. Penina aanayara koma Hana khaayara.

³ Elikana aanaya o Shilo ovenyera o etawoni yoowaniwa omodda vamuyakhani. Ayeellawo waallapella ni ovelleella mukutho wa Apwiya Amasiva Mattheene. O Shilonko waakhalla Hofini ni Finehasi, anamwani eelli a Eli ayo yaari allupa mukutho a Apwiya.

⁴ Erive enthawi Elikana aavelleellaka mukutho aanaavahawo Penina ni anaaye echigawo emodda ya enama ya mukuthweeyo wi eche.

⁵ Aanamuvaha Hana enama yinchichi omukhwaranya arive muthu vawi aanamukonda. Naari Apwiya yamweerihalle wi ahiyareke.

⁶ Penina, mwaariye mmodda a Elikana, aaneera ddoomuvoriiha murima Hana vawi Hanooyo Apwiya yaamweeriha wi ahiyareke.

⁷ Ddenndda ddaanavirellella weereya orive muyakha yaya o enyumba ya Apwiya. Penina aanamuvoriiha murima wunchichi Hana ophiyera wi Hana aaninlla nave aanakhoota ocha.

⁸ Vano Elikana aamukoha Hana wi, “Oninllella tini? Ohinachella tini? Yuunananre tti tini? Ethiyo wa weyaano miyaano nginuukwakhwanella okhwaranya anamwani aallopwana khumi?”

Hana anaaveka Apwiya mwaana

⁹ Nllapo nimodda emallihalle ocha ni owirya o Shilo wulle, Hana aavenya aya woovekella. Eli, mullupa mukutho aari akeraatthille va mpando wa va mullako wa enyumba ya Apwiya.

¹⁰ Hana murima waanamuvoreya nave aavekella wa Apwiya inllaka moovoreyiwa murima.

¹¹ Hana aallupella wi, “Apwiya Amasiva Mattheene, miyaano kiri mullupa muttekwaanyu, moone ohoowa waka nave mukaakhullelle ovekella waka, kinallota ddawoona wi mwakivaha mwaana aamullopwana kineeromuvelleella wa nyuwaano, Apwiya, mallapo mattheene a okumaaye nave ngimuchema.”

¹² Hana aavekella mwawi ddiidda wa Apwiya enthawi yoorekama Eli amuwehaka vayanoni.

¹³ Hana allota ya m'murimanimurimani, moohikhumiha mawu, eyanove sika yatikheya. Eli oona otikheya wa eyanweeyo nave aganiza wi ari oolezela.

¹⁴ Eli aamukoha olliye wi, “Munaakhalle oolezela ophiyera niini? Khaweni olezelanko waambe owuukunuwani.”

¹⁵ Koma Hana aamwaakhulla wi, “Mi Apwiya ngimuwiryalle vinyo apaalle yoowirya yoowalli. Kinamoriwa ethakaraka yinchichi vawi kookhalla kinllellaka wa Apwiya ekaamba ya ethakaraka ddakanndda kivekellaka wa Apwiya waakuthullella ddookatamiha kiriimina.”

¹⁶ Muhikeese miyaano mutthiyana oohikhalla ni mutteko, kookhalla kivekellaka mwawi ddiidda kaambiiwa m'murimani mwaka mooddalla ethakaraka.

¹⁷ Vano Eli aamwaakhulla wi, “Rowani ni murendelle, Mulluku a Aisraele aweerelleni nnddo muddivekilleenyu.”

¹⁸ Vano Hana aallota wi, “Mukeerelleve echifundo mi mullupa muttekwaanyu aamutthiyana” Vano mutthiyanooyo aavenyavo aya acha yoochaaye. Ovenyera vaavo khaakhupanyattho.

¹⁹ Osaka wene ohinase Elikana ni nibanja naye yaavenya yaallapella Apwiya. Vano yaahokollweella owaniwa o Rama. Elikana aakhalla ni Hana nipuro nimodda nave Apwiya yaamuupuwella Hana.

²⁰ Hana aakhalla ni erukullu nave aamuyara mwaana mullopwana amuvaha nnddina nawi Samuele ottaphullella wi, “Kimuvekille olliye wa Apwiya.”

²¹ Vano Elikana ni nibanja naye nittheene yaahokollweellawottho woovelleella mukutho. Aakusa emphaso eyo allupenlleeye ovelleella wa Apwiya.

²² Koma Hana khaayiillewo nave aamulleella mamune wi, “Mi ni Samuele khaniyaawo ophiyera Samuele ahiyalle waamwa. Kinaayeenawo wi kamuvelleelle wa Apwiya nave aneerekokhalla wenko okumaaye muttheene.”

²³ Elikana aamwaakhulla wi, “Onnadduwella oneereewe halla ophiyera ohiyalle omwaamwiha. Apwiya eneerewuukavihera ophiyera okwakhwanihalle nnddo walonjezilleewe.” Hana khaayiillewo o Shilo ophiyera amuhiihalle waamwa Samuele.

²⁴ Amuhiihalle waamwa Hana ni mamune yaamukusa eyaana onyumbani ya Apwiya o Shilo naari aari mung'onong'ono. Yaamukusa nankhoro eeng'ombe a miyakha miraru, othu makilogaramu khumi ni nthumba na nttapara nooddalla ni vinyo.

²⁵ Eyiiphalle eng'ombeelle ni oyivelleella mukutho Hana amuvelleella mwaanoolle wa Eli.

²⁶ Hana aallota wi, “Apwiya miyaano tti mutthiyana olle iimenlle vamiitthoni vanyu avekellaka wa Apwiya.

²⁷ Mwaanoolla kaarimamuveka nave Apwiya yaakivaha eyo kavekilleemi.

²⁸ Ella sika ekaambiiwa kinamuvelleelleemi wa Apwiya. Anaakhalle a Apwiya okumaaye muttheene.” Vano yahaallapella Apwiya wenko.