1 Petro 5 - Mawu a Mulluku

Mpingo wa Mulluku

¹ Miyaano, muttekweene, kinaaveka attekweene a mipingo ddanyu. Mi tti mboni a ohoosiwa wa Khrisitu nave kineerewaakhellana ntitimiho nno nnuupullulliwe. Kinuuvekani wi

² muwehereke phaama mpingo wa Mulluku wonanko mbusa anachihelleeye mulloko wa enkhosa. Woohikhalla moowatiheriwa koma moopaalla. Pharani muttekwaanyu ohiri ekaamba yookonda makobiri koma ekaamba ya murima woopaalla ophara mutteko.

³ Muhaalamuleke mwawiitukhulla ayo muvahiweenyu wi mwaawehereke koma mukhalleke echisanzo ya mulloko yooyo.

⁴ Nave mbusa muullupalli ooneya, muneerewaakhella emphaso yantitimiho yoohinyaalla.

⁵ Emoddamoddave yeeyo asombwe nyu, munaphwanella muwiiwellelleke attekweenaanyu. Nave attheenenyu munaphwanella mwiiyeviheke wi murumeyellaneke vawi mawu a Mulluku eni, “Mulluku annaahiiha awiitukhulla koma annaweerella echifundo awiiyeviha.”

⁶ Sika, vano, mwiiyeviheke vatthi va nnattanatta namasiva na Mulluku wi awunnuwiheni mu enthawaaye yakwakhwana.

⁷ Muhiyereni ddookhupanya ddanyu ddittheddene kaambiiwa olliye annuuweherani.

⁸ Chenjerani, wehesesani! Mudanaanyu, Satana, aneeteeta wonanko mukango onathuruma, anamwaashaasha muthu wi ammirye.

⁹ Muhitikheye mu echikhulupilwaanyu nave mumurapelleke kaambiiwa munnadduwella wi ookhulupilila akhwiinyu mu ellapo yavatthi ettheene ennoona ddoohoosa ddoophwanaphwana ni ddenndda.

¹⁰ Nave mwahoosiwalle wa enthawi yooyeva, Mulluku a echisomo ettheene, oyo awiithanilleni wi mukawanena mu ntitimiho naye noohimalla mu eyaattano ni Khrisitu, olliye yeekhaaye aneerewuuhokollosellani masivaanyu, aneerewuullipihani navettho aneerewuukeraatthihani.

¹¹ Wa olliye okhalle masiva wa enthawi yoohimalla! Amen.

Ollaanya

¹² Kuulembelleni kalata ookhuveyoolla mookaviherana ni Silivano oyo kinamweereemi mukhwaaka oororomelleya. Kinapaalla kuullipiheni murima voovelleellani ombonaaka wi ella sika echisomo ya Mulluku yawoona. Mwiimelle mwa yeeyo moohitikheya.

¹³ Akhwiinyu a mumpingoni wa o Babiloni ootthoolliwattho ni Mulluku navettho Mariko oyo ari wonanko mwanaka, ennuuvahani mooni.

¹⁴ Muvahaneke mooni mwa echikondi ya ookhulupilila. Murendelle okhalle ni attheene nyu muri mu eyaattano mwa Khrisitu.