1 Petro 4 - Mawu a Mulluku

Makhallello oohiyana

¹ Vawi Khrisitu mwiillaaye waahoosiwa, nyuwaanottho mwiillipiheke weekhiinyu ni maganizo amoddamoddave yaayo aariiyena kaambiiwa oyo mwiillaaye wahoosiwe oohiya ochimwa.

² Vano waambeella enthawi yeella ophiyera muhoollo, okhalla wanyu wa va ellapo yavatthimva onaphwanella ohoollelliweke ni opaalla wa Mulluku ohiri ni minkhella dda omuthu.

³ Mootathilla enthawi yinchichi khalle vaweerani nnddo eneera athu oohimullapella Mulluku. Okhalla wanyu waari wa oraruwa, minkhella ddoonanara, olezela, machellello ni olezela nave ollapella mafano moonanariha.

⁴ Nave athu oohimullapella Mulluku ennoona ddeelleto mwaahikhalla ni alliwa vaweerani ddoonanara, sika ennuullotellani epewe.

⁵ Nave eneerewaakhulla mullatu vamiitthoni va Mulluku, oyo akhozekille oweeruza athu ookumi ni ookhweene.

⁶ Ella sika ekaambiiwa othenga waphaama waallalleyiwattho wa athu ookhwa, sika wi naari yeeruziwe khalle ni athu yaariiwa vatthimva, eneerowora okhalla nimodda ni Mulluku m'munepani.

⁷ Omalla wa ddeko ddittheddene wohaatamella. Munaphwanella mwiihiiheeke nave muchenjere sika wi muworeke ovekella.

⁸ Yuullupalli ya yeella tti ya wi mukondaneke mmodda ni mukhwaaye mwawoona kaambiiwa echikondi sika enavuhellella machimo.

⁹ Mwaakhellaneke mu enyumba ddanyu moohiwinya.

¹⁰ Arive muthu moollikana ni mmo ariiye kapitawo a emphaso dda Mulluku, amurumeyelleke mukhwaaye ni emphaso eyo aavahiweeye ni Mulluku.

¹¹ Arive muthu anallalleya, allalleyeke othenga wa Mulluku, arive muthu anarumeyella, arumeyelleke ni masiva oovenyera wa Mulluku wi mu ddeko ddittheddene ntitimiho niyeeke wa Mulluku oweella mwa Yesu Khrisitu. Wa olliye okhalle ntitimiho ni masiva wa enthawi yoohimalla. Amen.

Ohoosiwa wonanko Khrisitu

¹² Akhwaaka ookondiwa, muhittikhineke ni ohoosiwa woovoreya nko muneesiweenyuna wonanko tti ello yeelleto eneereya wa nyuwaano.

¹³ Koma hakallallani mwaahoosiwaka wonanko Khrisitu. Sika wi muhakallalle wunchichi ntitimiho naye nuupullulliwa.

¹⁴ Oodalisiwa tti nyuwaano mwaallotelliwa epewe kaambiiwa nyuwaano tti oomuthwarellella Khrisitu. Ella enattaphullella wi Munepa wa ntitimiho, Munepa a Mulluku, onnakhalla va nyuwaano.

¹⁵ Mmodda a nyuwaano aahoosiwaka, ehikhalleke ekaamba yawi tti awiipha apaalle mullupaawiiya apaalle aweera ddoonanara apaalle awaambiha owukila.

¹⁶ Koma mwaahoosiwaka ekaamba yawi nyuwaano tti akhrisitu, muhiwulliweke muru nave mumuthokozeke Mulluku kaambiiwa mookhalla ni nnddina na Khrisitu.

¹⁷ Enthawi yookwakhwana wi echiweruzo yaambe nave athu a Mulluku sika enaambe weeruziwa. Yaamba ni hiyaano, enaamalle mwawiidde wa ayo ehinakhulupilila othenga waphaama wa Mulluku?

¹⁸ Moollikana ni mawu a Mulluku awi, “Tti wookatamiha wi athu oolungama evullusiwe. Ethiyo ddinaakhalle mwawiidde wa athu oochimwa oohimwiiwellella Mulluku?”

¹⁹ Sika vano ayo enahoosiwa ekaamba ya opaalla wa Mulluku va alliwa, enaphwanella yiivelleelleke weekhiiwa wa Oophatusiiwa oyo ari oororomelleya nave evirellelle weera ddaphaama.