1 Petro 3 - Mawu a Mulluku

Atthiyana ni allopwana mu nibanja

¹ Emoddamoddave yeeyo atthiyananyu munaphwanella mwaavaheke olemu amamuninyu wi makhallellwaanyu eweerihe ayo ehiniiwellella mawu a Mulluku okhulupilila. Khophwanellattho wa nyuwaano wi mullote mawu,

² kaambiiwa enaawoone makhallellwaanyu oolemu ni aweella.

³ Oreera wanyu ohikhalleke wa mooneyellove wonanko voolluwani meehi apaalle owara ddooreeriha dda golide apaalle ddoowara munawareenyu.

⁴ Koma oreera wanyu onaphwanella okhalleke wa muwari mwanyu, oreera wa murima, wawiithaalla ni woomaalleya vawi nndda sika ddoopaalleya wunchichi ni ddoohimalla vamiitthoni va Mulluku.

⁵ Vawi atthiyana aweella ekhalle ayo yamutiyerella Mulluku yaaniireeriha voowiiwellellani amamuniwa.

⁶ Sara aari awi ddiiddo, aamwiiwellella Abrahamu nave aamweera apwinnya. Nyuwaano muri anaaye aatthiyana a Sara mwaaweeraka ddaphaama ni oohoova erive ello.

⁷ Emoddamoddave yeeyo nyuwaano allopwana munaphwanella mukhalleke ni awarinyu voodduwellani wi yaayo tti ooyeva masiva ohiyana ni nyuwaano. Mwaavaheke olemu kaambiiwa nayiiwattho eneerewaakhellana emphaso ya okumi wa Mulluku vamodda ni nyuwaano. Erani yeella wi vihikhalle ello yoohiiha mavekellwaanyu.

Ohoosiwa ekaamba yaweera ddaphaama

⁸ Voomallihella, attheenenyu munapaalleya muhikanganeke koma mumorellaneke ethakaraka. Mukondaneke wonanko muthu ni mwanamunne apaalle ni murokoriye nave mukhalleke ooreera murima ni awiiyeviha.

⁹ Muhimuhokolloselleke mukhwiinyu yoonanara aweerellani yoonanara apaalle omutembelela olliye uutembelelani koma mumuhokolloselleke madaliso wi Mulluku uudaliseni wonanko alonjezilleeye awiithanneeyeni.

¹⁰ Mawu a Mulluku enallota wi, “Ayo enapaalla okhalla oohakallalla ni okhalla mallapo manchichi, nllumi niwa nihilloteke ddoonanara, vayanoni viwa vihikhumeke ddoolleka.

¹¹ Enaphwanella ohiya ddoonanara nave yeereke ddaphaama, enaphwanella yaashaashe murendelle ni murimiiwa muttheene.

¹² Miittho a Apwiya eri va oolungama, maarwiiwa ennaapella mavekellwiiwa koma ennaananariwella aweera ddoonanara.”

¹³ Ethiyo ttaani anuuvoreyeni mwapaallesesa weera ddoolungama?

¹⁴ Oodalisiwa tti nyu munahoosiwa ekaamba ya weera ddaphaama! Muhimooveke arive muthu nave muhikhupanyeke.

¹⁵ Koma mumuvaheke olemu Khrisitu m'mirimani mwanyu nave mumutitimiheke wonanko Apwiya. Enthawi ddittheddene mukhalleke ookhozeka omwaakhulla arive muthu anuukohani wi mutthopoolle otiyerella wa echikhulupililwaanyu.

¹⁶ Nave mweere yeella mwawiithaallella ni moolemu. Khallani ni yawuupusella murima yaphaama wi mwaallotelliwaka epewe, ayo enallota ddoonanara dda makhallellwaanyu aphaama oomuttakihera Khrisitu, ewulliwe muru ekaamba ya ddoollota ddiwannddo.

¹⁷ Vawi tti waphaama ohoosiwa ekaamba yaweera ddaphaama, ohiyana ni weera ddoonanara.

¹⁸ Vawi Khrisitu, muthu oolungama, aakhwa omoddave mu nipuro mwa oochimwa ekaamba ya ddoochimwa dda amodda wi uuhoollelleni wa Mulluku. Ahiiphiwa mwa mwiilli nave aakhalla mukumi mwa Munepa.

¹⁹ Va enthawi yeeyo aaya allalleya wa minepa ddoohiyiwa mundende.

²⁰ Ddenndda tti minepa dda ayo yahimwiiwellelle Mulluku atiyereeye mookhurumusa murima m'mallaponi ayo Nowa amakeeye ekallawaaye. Vano athu ooyeva atthanu ni araru, yaavullusiwa m'maaddini.

²¹ Maaddaayo yaari echizindikiro ya obatizo oyo onuuvullusani vano. Obatizo khe ovenyiha nihiryo na vamwiillini koma echipangano ni Mulluku ovenyera va yawuupusella murima yaphaama ekaamba yawi Yesu Khrisitu aavenyihiwa wa okhwa.

²² Olliye aarowa oddullu nave akhalla o nnattanatta na Mulluku, olamulella angelo ni masiva amodda mattheene ooddullu.