1 Petro 2 - Mawu a Mulluku

Nlluku nookumi ni mutundu waweella

¹ Vano hiyani ddoonanara ddittheddene, woottha, makhallello awoottha, ehache apaalle ollota ddoonanara.

² Mukhalleke wonanko anamwani awaamwa, enthawi ddittheddene mukhalleke ni nthona na mukaka waphaama wa Munepa wi mwawirya muneerewunnuwa nave muneerovullusiwa.

³ Mawu a Mulluku eni, “Esani nave muneerewoona wi Apwiya tti aphaama.”

⁴ Waani wa Apwiya, nlluku nookumi nno naakhootiwe ni athu wonanko noohikhalla ni mutteko koma naatthoolliwa ni Mulluku wonanko nookhalla ni mutteko.

⁵ Waani wonanko malluku ookumi wi nyuwaano mupharihiwe mutteko voomakani enyumba ya Munepa, nko munaarumeyelleke wonanko allupa mukutho aweella oheraatthi wa Mulluku mukutho wa Munepa ni wawaakhelliwa oweella mwa Yesu Khrisitu.

⁶ Vawi mawu a Mulluku eni, “Kaatthoolla nlluku nookhalla ni mutteko, nno kinakeraatthiheemi mu Ziyoni wonanko noopaalleya wunchichi, oyo anamuroromella olliye khawa awullihiwa muru.”

⁷ Nlluku nenna tti noopaalleya wunchichi wa nyuwaano ookhulupilila koma wa nyuwaano oohikhulupilila, “Nlluku nno nakhootiwe ni oomaka enyumba nenna naakhalla nlluku noopaalleya.”

⁸ Nave mawu a Mulluku amodda eni, “Nna sika nlluku ninaakwakwatuwihe athu, nlluku nno ninaakuhe.” Moollikana ni opaalla wa Mulluku, yaakwakwatuwa kaambiiwa kheyiiwellelle mawu a Mulluku.

⁹ Nave nyuwaano tti mutundu wootthoolliwa, allupa mukutho oomwene, mutundu woopatuleya, athu a mwaneena Mulluku, ootthoolliwa wi mullalleye ddaweera dda Mulluku ddoottikhiniha, oyo aawiithanneni ovenyera mwiipiphini oya mu owala waye woottikhiniha.

¹⁰ Khalle nyuwaano khamwaari athu a Mulluku koma vano nyuwaano tti athwaaye. Khalle nyuwaano khamwaadduwenlle echifundo ya Mulluku koma vano mohaakhella echifundo.

Akaporo a Mulluku

¹¹ Kinimuuvekani nyuwaano ookondiwaaka wi muhaakhullelleke minkhella dda mwiilli nnddo ddinawana ni Munepa vawi nyuwaano mu ellapweella muri wonanko alleto ni oothawa owaniwa.

¹² Makhallellwaanyu variyari va athu oohimullapella Mulluku enaphwanella ekhalleke aphaama. Yaawiipakani mullatu wi nyuwaano tti aweera ddoonanara, yoone ddaweera ddanyu ddaphaama wi emutitimihe Mulluku va nllapo na owa waye.

¹³ Mwiiwellelleke olamulello ottheene wa athu ekaamba ya Apwiya naari Kaisara,* oolamulella muullupalli.

¹⁴ Mwiiwellellekettho oolamulella ayo yatthoolliwe ni mwene a o Romooyo wi aallake aweera ddoonanara ni waathuva aweera ddaphaama.

¹⁵ Vawi Mulluku anapaalla wi nyuwaano mwaahiihe athu ollota mookarangeya moohidduwella vaweerani ddeko ddaphaama.

¹⁶ Mukhalleke athu oottaphulliwa, muhiphariheke ottaphuwa wonngu wi mukhuwekena erive yoonanara nave mukhalleke wonanko akaporo a Mulluku.

¹⁷ Mumuvaheke olemu arive muthu, mwaakondeke ookhulupilila akhwiinyu, mumooveke Mulluku nave mumuvaheke olemu Kaisara.

Echisanzo ya ohoosiwa wa Khrisitu

¹⁸ Allupa mutteko nyu, muwiiwellelleke apwiinyu nave mwaavaheke olemu wunchichi, ohiri wa yaayove ooreera murima ni oomaalleya komattho oowalli.

¹⁹ Mulluku aneeroweerellani echifundo mwavillella ohoosiwa woohiphwanellella kaambiiwa munnadduwella opaalla waye.

²⁰ Ethiyo munaaphurevo tini mwavillella wuukuthiwa woophwanellella ekaamba yoochimwa? Koma mwavillella ohoosiwa mweerille ddaphaama, Mulluku aneeroweerellani echifundo ekaamba ya yeella.

²¹ Mulluku aawiithanellani ohoosiwa vawi Khrisitu mwaneena aahoosiwa ekaamba ya nyuwaano nave ahuuhiyerani echisanzo wi muthware manyallwaaye.

²² Olliye kheerille nirive nichimo nave muwano mwaye khamwaavenyenre erive yawoottha.

²³ Allotelliweeye epewe, khaawaakhullalle epewe, ahoosiweeye khoopopihalle koma ahiivelleella wa Mulluku oyo aneeruza moolungama.

²⁴ Khrisitu mwaneena aatukhulla machimwaahu m'mwiillini mwaye oyaana vamutandani wi omuthwaahu woochimwa okhwe nave wi nikhalleke oolungama. Moochirihiwa ekaamba ya makhwataaye.

²⁵ Nyu mwaari wonanko enkhosa ddoohollowa koma vano moohokollosiwa wi mumuthware Mbusa ni Oowehera a okumaanyu.