1 Petro 1 - Mawu a Mulluku

¹ Ovenyera wa miyaano Petro, murummwa a Yesu Khrisitu. Kinalembella wa athu ootthoolliwa a Mulluku ayo enakhalla wonanko athu oothawa owaniwa ayo epallalleyelle mu echigawo dda Ponto, Galatiya, Kapadokiya, Asiya* ni Bitiniya.

² Mwaatthoolliwa moollikana ni yoolinga ya Mulluku Attiitthaanyu nave mwaheeriwa athu aweella ni munepaaye wi mumwiiwellelle Yesu Khrisitu ni weellihiwa ni nikhame naye. Echisomo yawaata ni murendelle munchichi ddikhalle ni nyuwaano.

Etiyerello yoororomelleya

³ Nimuthokoze Mulluku Attiitthiiwa a Apwiihu Yesu Khrisitu! Ekaamba ya echifundwaaye yuullupalli aanivaha okumi wanaanweene ni otiyerella wookumi voomuvenyihani Yesu Khrisitu wa ookhwa.

⁴ Sika vano ninatiyera waakhella madaliso ayo Mulluku anaasungelleeye athwaaye. Anuusungellani nyuwaano oddullu, wenko khenuunta apaalle woonongeya apaalle omalla.

⁵ Yaayo tti aanyu, ayo enasungiwa ni masiva a Mulluku oweella mu echikhulupililo wi mwaakhelle ovullusa nko onatiyera wi wuupullulliwe va enthawi yoomallihella.

⁶ Hakallallani ni nnddo Mulluku eerilleeye naari vano mukhallaka ookhupanya enthawi yooyeva ekaamba ya ohoosiwa ni weesiwa woohiyanahiyana.

⁷ Ddoolinga ddiwa tti ddawi ddisimikize wi echikhulupilwaanyu tti yawoona. Naari golide, oyo anaworeya woonongeya, anneesiwa ni munllo. Nave vano echikhulupilwaanyu eyo eri yoowallamella wunchichi omukhwaranya golide, enaphwanellattho weesiwa wi evillelle. Sika muneerewaakhella ntitimiho va nllapo nawuupullulliwa Yesu Khrisitu.

⁸ Munnamukonda naari muhimonne nave munnakhulupilila mwa yooyo naari vano muhimonne. Sika munnahakallalla wuullupalli ni murimaanyu muttheene,

⁹ kaambiiwa munnaakhella ovullusa wa okumaanyu, eyo eri yoolinga ya echikhulupilwaanyu mwa yooyo.

¹⁰ Anamallotella yahaashaasha ni okoha phaama dda ovullusa wonngu nave yaallotella dda echisomo eyo Mulluku aneereeye uuvaheni.

¹¹ Yaheesa okoha wi enthawi enaakwakhwane niini nave enaawe mwawiidde. Ella yaari enthawi eyo Munepa wa Khrisitu waakiiwa, voollohellani ddoohoosa nnddo Khrisitu eereeye avillelle nave ntitimiho neeriiwa nithwarellelle.

¹² Mulluku ahuupullulla wa anamallotella yaalla wi muttekwiiwa khawaari wawi epindulevo weekhiiwa koma nyuwaano. Vawi yaallota dda ddeko ddennddo mwiiwalleenyu vano ovenyera wa murummwa ayo yavuwihalle othenga waphaama ni masiva a Munepa Waweella woorumihiwa ovenyera oddullu. Nndda tti ddeko ddawi naari angelo yaapaalla wiiwesesa.

Mulluku ananiveka wi nikhalle aweella

¹³ Sika vano, maganizwaanyu ekhalle ookhozeka. Chenjerani nave mutiyerelle wunchichi va echisomo eyo enaavahiwe wa nyuwaano Yesu Khrisitu uupullulliwa.

¹⁴ Mumwiiwellelleke Mulluku, okumaanyu ohilamulelliweke ni minkhella mwathwareenyu khalle moohidduwella.

¹⁵ Nave mukhalleke aweella murima mu ddeko ddittheddene muneereenyu vawi Mulluku oyo awiithanilleni tti aweella.

¹⁶ Mawu a Mulluku eni, “Khallani aweella kaambiiwa miyaano tti aweella.”

¹⁷ Munamuromolla wi Attiitthiihu, mwaavekellaka wa Mulluku, oyo anaweeruza athu attheene moollikana ni ddaweera ddiwa moohiweha ekhove. Sika vano mu okumaanyu muttheene va ellapo yavatthi mumooveke olliyooyo.

¹⁸ Vawi munnadduwella eyo yaallivelliwe wi moopolliwe ovenyera o makhallello oonanara ayo mwaamwenlleenyu wa makhollwaanyu. Kheyaari ello yawoonongeya, wonanko siliva apaalle golide.

¹⁹ Koma mwahoopolliwa ni nikhame noowallamella na Khrisitu oyo aari wonanko mwaanaankhosa oohikhalla ni nipamba naari oohirakalla.

²⁰ Mulluku aamutthoolla ellapo yavatthi ehinaphatusiwe nave ahuupullulliwa mu mallapo oomallihaalla ekaamba ya nyuwaano.

²¹ Oweella mwa olliyooyo, munnamukhulupilila Mulluku oyo aamuvenyihalle wa ookhwa nave amuvaha ntitimiho sika vano echikhulupilwaanyu ni otiyera wanyu tti dda va Mulluku.

²² Vano mwaaddeelliha vawiiwellellani yawoona wi mukhalle ni echikondi yawoona va ookhulupilila akhwiinyu. Mukondaneke mwawoona ni murimaanyu muttheene.

²³ Vawi oweella mwa mawu a Mulluku Ookumi ni oohimalla, mooyariwa wiilli wonanko anamwani a nikhollo noohikhwa ohiri nookhwa.

²⁴ Mawu a Mulluku eni, “Athu attheene tti wonanko manasi, oreera wiwa tti wonanko malluwa oohakani. Manasi ennanyaalla, malluwa ennavakareya,

²⁵ koma mawu a Apwiya tti oohimalla.” Mawu yaalla tti othenga waphaama oyo waallalleyiwe wa nyuwaano.