1 Mamwene 9 - Mawu a Mulluku

Mulluku anooneyattho wa Solomoni

¹ Mwene Solomoni amallihalleeye omaka enyumba ya Apwiya ni enyumba yoomwene ni ddeko ddittheddene apanlleeye omaka,

² Apwiya yaamooneyellattho wonanko yamooneyelliiwa o Gibiyoni.

³ Vano Apwiya yaamulleella wi, “Kohiiwa nivekello nawo ni okhuwa wawo weerilleewe vamiitthoni vaka. Kooyipatula enyumba oyimakilleeweella nave koohiyamo nnddina naka wi athu ekillapellekemo wa enthawi yoohimalla. Miitthwaaka ni murimaaka ddinaakhalle mwemmo enthawi ddittheddene.

⁴ Nave we, waaweetaka vamiitthoni vaka wonanko mmo attiittho Davide yeetelliiwa ni murima wawoona ni woolungama nave waaweeraka ddittheddene kuulamulalleemi ni osunga mawaaka ni malangizwaaka,

⁵ vaavo kineerokeraatthiha mpandwaawo woomwene wowaalamulella Aisraele wa enthawi yoohimalla monga kalonjezilleemi wa Davide attiittho wi, ‘Khaviwa virama muthu a mu nibanja nawo oyo anaakhalleke va mpando woomwene nave analamulella Israele.’

⁶ “Koma we apaalle anaawo mwahokollweella mutulli ohiya okithwara, ohisunga malamulwaaka ni malangizwaaka ayo kuuvahilleemini nave mwaamba orumeyella ni oddillapella milluku ddimodda,

⁷ sika kineerewaavenyihamo Aisraelaayo mu ellapo kaavahilleemi. Nave enyumba eyo kayipatulalleemi wi nnddina naka nillapellelliwekemo kineeroyikhoota nave kineeromutthattusa Israele ello yoottheyiha ni yoonyemulliwa variyari va athu attheene.

⁸ Nave enyumba yeella eneerokumuwa ni otthattuwa ntepe. Vano arive muthu oovira vaavo aneerekottikhina ni woopa musoonyo vookohani wi, ‘Kaambiiwa tini Apwiya yenriiwa ddenndda va enyumbeella?’

⁹ Vano athu eneerekowaakhulla wi, ‘Ekaambiiwa tti yawi athwaayo yahaahiya Apwiya Mullukwiiwa ayo yaakhumihalle makhollwiiwa mu Iguputo nave yaallapella ni orumeyella milluku ddimodda. Elle sika ekaambiiwa Apwiya eweerelliiwa yoonanareella.’ ”

Ddeko ddimodda eerille Davide

¹⁰ Mutteko woomaka enyumba ya Apwiya ni enyumba yoomwene yamukuselle miyakha makhumi meelli.

¹¹ Mwene Hiramu a o Tiro sika amuvaha matabwa amukunguza ni apaini ni golide moollikana ni mmo apaallelleeye. Nave Solomoni aamuvaha Hiramu mizinda 20 mu echigawo ya Galileya.

¹² Koma Hiramu awiilleeye ovenyera o Tiro wi oone mizinda nnddo Solomoni aamuvahilleeye, kheddaamuddivenlle.

¹³ Sika aallota wi, “Mukhwaaka, mizinda ddenndda khahiyo nnddo katiyereemi wi okivahe.” Sika mizindannddo ddinaromolliwa Kabule.

¹⁴ Hiramu aari amurumihelle mwene makobiri a golide manchichi.

Solomoni aneera ddeko ddimodda dduullupalli

¹⁵ Mwene Solomoni aalamula athu wi ephare mutteko wathangata voomakani enyumba ya Apwiya ni enyumbaaye, masitepe ooromolliwa Milo ni mpanda wawaapheella Yerusalemu. Aapharihattho mutteko wathangata voomakanittho mizinda dda Hazori, Megido ni Gezere.

¹⁶ Farao mwene a o Iguputo aari aakhille muzinda wa Gezere nave aawiipha Akanani ayo yaakhalla m'muzindanimmo ni wuuhella munllo. Aamuvaha mwanaye aamutthiyana muzinda yoolla wi ekhalle yoovahiwa ya okwataaye ni Solomoni.

¹⁷ Sika Solomoni aamakattho muzinda wa Gezere. Aamakattho mizinda dda Betehoroni Oohito,

¹⁸ Baalati, Tamara o echipululu ya Yuda,

¹⁹ mizinda ddittheddene ddoosungellamo eyuumaaye ni magaretaaye, mizinda dda athu aweetiha magareta ni ddeko ddittheddene apanlleeye wi amake mu Yerusalemu ni mu Lebanoni navettho orive weko mu omwenaaye.

²⁰ Athu a mitundu ddimodda ayo yahiri Aisraeli yahanlle yaari Aamori, Ahiti, Aperezi, Ahivi ni Ayebusi.

²¹ Alla yaari edduullu ddoohalla mu ellapweeyo ayo Aisraele yahiwonriiwa waatthollosa. Mwene Solomoni aanaaphariha mutteko wathangata nave athu yaalla ennapharave ophiyera ollellova.

²² Koma Aisraele attheene, Solomoni khaapharihalle mutteko wa okaporo. Yaalla yaari akhoto, enduna ddaye, akhoto uullupalli, oolamulella ekhoto, oolamulella magareta ni oowella va akavalo.

²³ Akapitawo uullupalli oowehera athu ayo yaphara mutteko wa Solomoni yaarivo 550.

²⁴ Enthawi yeeyo mwaana aamutthiyana a Farao aavenyawo o muzinda wa Davide aya o enyumbaaye eyo Solomoni ammakelleeye. Vatulli viwa Solomoni aamaka masitepe a Milo.

²⁵ Solomoni aanavelleella mukutho wooshellelliha ni mukutho wa eyaattano va nikuwa nno aamakelleeye Apwiya oraru vamuyakhani nave aanoosa lubani* Apwiya amallihalle enyumbeeyo.

²⁶ Mwene Solomoni aamakattho esitima ddinchichi o Eziyoni Gebere, waatamella o Elati mukhwipi mwa Enyanja Yoofiira, mu ellapo ya Edomu.

²⁷ Mwene Hiramu aarumiha esitima ddaye ni allupa muttekwaaye oodduwella dda mu enyanja wi yaphare mutteko nimodda ni oorumeyella a Solomoni.

²⁸ Vano yaaya o Ofiri nave yaamukusella Solomoni golide munchichi.