1 Mamwene 8 - Mawu a Mulluku

Nibokosi na echipangano ninakuselliwa mu enyumba ya Apwiya

¹ Vano mwene Solomoni aawiithana attekweene a o Israele, oohoollella attheene a malloko ni attekweene a mabanja Aisraele wi ewe wa olliye o Yerusalemu wi yakuse nibokosi na echipangano na Apwiya mu Ziyoni, muzinda wa Davide.

² Nave attheene yaatthukumana vamiitthoni va Solomoni vamachellelloni mu mweeri wa Etaimu, mweeri waneetthanu ni piilli.

³ Vano attekweene attheene a o Israele yaawa nave allupa mukutho yaatukhulla nibokosi na echipangano.

⁴ Allupa mukutho ni Alevi sika yawiillena nibokosi na echipangano na Apwiya vamodda ni musasa wamutthukumano ni eziwiya ddittheddene ddoopatuleya nnddo ddaari m'musasanimmo.

⁵ Nave mwene Solomoni ni Aisraele attheene ayo yatthukumanne vamiitthoni vaye, yiimenlle vahoollo va nibokosi na echipanganonno yaanavelleella mikutho dda enkhosa ni dda eng'ombe ddooheerengeya.

⁶ Vano allupa mukutho yaatukhulla nibokosi na echipanganonno eyaana mu enyumba ya Apwiya enihiya mu echipinda yoopatuleyesesa, vatthi va muuphello a akerubi.*

⁷ Sika akerubaayo yaanattaphurusa muuphellwiiwa vaddullu va nibokosi na echipanganonno mwawi yaanakhuneella ni ekopo ddiwa ddootukhullella.

⁸ Ekoponnddo ddaari ddoorekama wawi etthoka ddiwa ddaanooneya muthu akhalla mu echipinda yoopatuleya, vahoollo va echipinda ya muwari yoopatuleyesesa. Koma wakhalla otte khaddooneyella nave ddookhallawo ophiyera ollello.

⁹ Mu nibokosimmo khamwaari ello koma mallukuve meelli ayo Mose aahiyalleeyemo o Horebu nko Apwiya yakeraatthihalliiwa ni Aisraele attheene yakhumiiwa o Iguputo.

¹⁰ Nave allupa mukutho yakhumalliiwa mu echipinda yoopatuleya, murapo waaddalla mu enyumba ya Apwiya.

¹¹ Nave allupa mukutho kheyaawora orumeyella ekaamba ya murapooyo vawi ntitimiho na Apwiya naaddalla mu enyumbiiwa.

¹² Vano Solomoni aavekella wi, “Nyu Apwiya, moohiya nndduwa muddullu koma munakhalla mu epiphi yoottikana.

¹³ Koma kohuumakellani enyumba yooriiheya, nipuro nno munaakhallekeenyumo enthawi yoohimalla.”

Mawu a Solomoni wa athwaaye

¹⁴ Vano mwene aarukunuwa adalisa mutthukumano muttheene wa Aisraele, attheenaayo yiimenlle.

¹⁵ Nave aallota wi, “Etitimihiwe Apwiya Mulluku a Aisraele, ayo ekwakhwanihalle ni masiviiwa nnddo yalonjezilliiwa wa Davide attiitthaaka.

¹⁶ Yaallota wi, ‘Ovenyera nllapo nno kaakhumihalleemi Aisraele, athwaaka mu Iguputo, ngawuutthoonlle orive muzinda variyari va malloko mattheene a Aisraele wi mumakiwe enyumba yoollapellamo nnddina naka. Koma kaamutthoolla Davide wi aalamulelleke athwaaka Aisraele.’ ”

¹⁷ Nave Solomoni aavirellella wi, “Attiitthaaka Davide yaaganiza ddoomaka enyumba ya Apwiya mowaallapellellamo Apwiya Mulluku a Aisraele.

¹⁸ Koma Apwiya yahaalleella attiitthaaka Davide wi, ‘Waaganiza phaama voomakellani enyumba nnddina naka.

¹⁹ Vano weyaano khomaka enyumbeeyo koma mwanawo sika anaamake enyumbaakeeyo.’ ”

²⁰ Solomoni aallota wi, “Vano Apwiya aakwakhwaniha nnddo yalonjezilliiwa vawi koovollowa omwene wa attiitthaaka Davide nave kiri mwene a Aisraele. Nave koomaka enyumba yoollapellellamo nnddina na Apwiya Mulluku a Aisraele.

²¹ Nave kookhoza nipuro noohiyavo nibokosi na echipangano mmo muri mabukhu a mawu a echipangano eyo Apwiya yakeraatthihalliiwa ni makhollwaahu vawaakhumihani o Iguputo.”

Nivekello na Solomoni

²² Vano Solomoni ahiimella vahoollo va nikuwa na Apwiya, mutthukumano wa Aisraele attheene woonaka nave aatukhullella mattaaye muddullu.

²³ Aavekella wi, “Nyu Apwiya Mulluku a Israele, khaavo Mulluku oophwanaphwana ni nyuwaano, oddullu apaalle va ellapo yavatthi. Munnasunga echipangano ni wooniha echikondi yoohisintheya wa oorumeyellaanyu ayo eneeta vamiitthoni vanyu ni murimiiwa muttheene.

²⁴ Moosunga lonjezo mweerilleenyu ni attiitthaaka Davide. Ollello mookwakhwaniha echipangano mweerilleenyu ni alliwa.

²⁵ Sika vano nyu Apwiya Mulluku a Aisraele, upuwellani nndde mwalonjezilleenyu wa Davide oorumeyellaanyu voollotani wi, ‘Khaviwa virama edduullu va nibanja nawo ookhalla vamiitthoni vaka va mpando woomwene wa Israele, vaavove anaawo yaapwathaka makhallellwiiwa ni weeta vamiitthoni vaka monga weyaano weetelleewe.’

²⁶ Sika vano, nyu Mulluku a Israele, akhullellani wi nnddo mwaalonjezilleenyu attiitthaaka Davide oorumeyellaayu, ddikwakhwanihelliwe.

²⁷ “Ethiyo Mulluku ttuukhalla va ellapo yavatthi? Vawi oddullu khonuukwanellani, ddinaaworeye mwawiidde wi mukhalle mu enyumba kimakilleemeella?

²⁸ Nyu Apwiya Mullukwaaka, mi tti oorumeyellaanyu, iwani nivekello naka ni okhuwa waka vamiitthoni vanyu ollello.

²⁹ Weherakani enyumbeella otthaana ni mahiiyu, nipuro nno mwaanithoollilleenyu wi nnddina nanyu nikhalleke mwemmo wi mwiiwe nivekello nno anaavekelle oorumeyellaanyu onipuroni wuno.

³⁰ Iwani nivekello na oorumeyellaanyu ni na athwaanyu Aisraele yaavekellaka va nipuro nenna. Ddawoona, mwiiwe oddullunko munakhalleenyu nave mwiiwa mukhululuke.

³¹ “Vano muthu amuchimwella mukhwaaye, yamullupelliha, allupelle vahoollo va nikuwani nanyu mu enyumbeella,

³² vaavo nyu mwiiwe oddullunko nave mweerevo ello ni oweeruza oorumeyellaanywaayo. Oochimwa mukamulle wi tti oolakwa nave mumullake moollikana ni ddoolakwa ddaye. Koma oohichimooyo mukamulle wi khanna mullatu nave mumuvahe oolungama moollikana ni echilungamwaaye.

³³ “Athwaanyu Aisraele yagonjihiwa ni adaniiwa ekaamba yawi ahuuchimwellani nave yahokollweella wa nyuwaano, yalapa mu nnddina nanyu, yavekella ni wuullapellani nyuwaano mu enyumbeella,

³⁴ mwiiwe oddullunko ni waakhululukella machimo athwaanyu Aisraele. Vatulli viwa, mwaahokolloselle o ellapo eyo mwaavahilleenyu makhollwiiwa.

³⁵ “Oddullu wawalleya, murimu ahirupa kaambiiwa athwaanyu ahuuchimwellani nave yavekella va enyumbaanyu, elapa mu nnddina nanyu ni orukunuwa murima vawaallakani nyuwaano,

³⁶ vano mwiiweke oddullunko ni okhululukella machimo a oorumeyellaanyu, Aisraele attheene. Nyuwaano mwaahuddiheke makhallello aphaama awi yeereke nave mumurupihe murimu mu ellapo eyo mwaavahilleenyu wi ekhalle yoohallaniiwa.

³⁷ “Mu ellapweeyo mwakhalla ettalla, mullilli, enkhuwawe, nazombe, miingu, athwaanyu yaapheelliiwa ni adaniiwa apaalle vakhalla ereta ni orive ovoriiwa,

³⁸ mwiiwe mavekellwiiwa. Arive muthu apaalle athwaanyu a Israele yadduwella ddookatamiha m'murimani mwiwa nave yavekella wa nyuwaano mootukhullella mattiiwa muddullu o enyumbeella,

³⁹ mwiiwe mavekellwiiwa oddullu munakhalleenyuwo, mwaakhululukelle ni waakavihera. Mumweerelleke arive muthu moollikana ni makhallellwaaye vawi nyuwaano munnadduwella murima wa arive muthu.

⁴⁰ Mwawi ddiidda athwaanyu eneerekowiiwellellani mallapo mattheene enaakhalliiwa mu ellapo eyo mwaavahilleenyu makhollwaahu.

⁴¹ “Emoddamoddave yeeyo alleto ayo ehiri a athwaanyu o Israele ttuuwa ovenyera o ellapo ddimodda ddawuuteete ekaamba ya nnddina nanyu.

⁴² Ddawoona athu eneerewiiwa dda nnddina nanyu noovuwa navettho nnatta nanyu namasiva ni naweera dduullupalli yawa ovekella mu enyumbeella,

⁴³ nyu mwiiwe oddullu munakhalleenyuwo nave mweere nnddo mulletooyo uuvekilleeyeni. Mweere ddenndda wi athu attheene a va ellapo yavatthi edduwelle nnddina nanyu nave ewoovekeni monga eneerella Aisraele athwaanyu nave edduwelle wi enyumba ella kiyimankeemi enadduwanyeya ni nnddina nanyu.

⁴⁴ “Athwaanyu yaayaaka okhotoni woowana ni adaniiwa orive weko munaarumiheenyuwo nave yavekella wa nyu Apwiya, ewehaka o muzinda oyo muwutthoonlleenyu navettho o enyumba eyo kimakenlleemi nnddina nanyu.

⁴⁵ Mwiiwe oddullunko nivekello niwa ni okhuwa wiwa nave mwaapambanihe.

⁴⁶ “Athwaanyu ttuuwuuchimwellani vawi khaavo muthu oohichimwa, sika ttuuwaashella murima ni waavelleella wa adaniiwa wi yaaphare okaporo waayaana o ellapo ya adaniiwa, ellapo yawoorekama apaalle yavakhuviru.

⁴⁷ Vano eri wuukaporoninko yaadduwella ochimwa wiwa erukunuwa murima ni oveka wa nyuwaano mwawiiyeviha mu ellapo ya athu ayo yaaphanre okaporo, voollotani wi, ‘Noochimwa, noohollowa, noheera ddoonanara.’

⁴⁸ Athwaayo yaahokollweella wa nyuwaano ni murimiiwa muttheene ni okumiiwa muttheene mu ellapo ya adaniiwa nko yapharelliwiiwawo okaporo, yavekella wa nyuwaano moowehani o ellapwiiwa eyo mwaavahilleenyu makhollwiiwa, o muzinda oyo mwawutthoollilleenyu navettho o enyumba eyo kimakenlleemi nnddina nanyu

⁴⁹ mwiiwe oddullunko munakhalleenyu nivekello niwa ni okhuwa wiwa nave muweerelle ddoolungama.

⁵⁰ Mwaakhululukelle machimwiiwa mattheene ni wuuwukilani wiwa. Nave muweerihe wi adaniiwa eweerelleke echifundo.

⁵¹ Alliwa tti athwaanyu, yoohallanaanyu eyo mwayikhumihalleenyu o Iguputo, owaapulla mu eng'anjo yooviha.”

⁵² “Miitthwaanyu yoone ovekella ni ollapella wa oorumeyellaanyu ni wa athwaanyu Aisraele nave muwaapelle maaru yaawiithanakani.

⁵³ Nyu Apwiya Mulluku mwahaapatula alliwa variyari va athu attheene wi ekhalle yoohallanaanyu, moollikana ni mmo mwallotelleenyu ni oorumeyellaanyu Mose mwaakhumiheenyu makhollwaahu mu Iguputo.”

Solomoni anaadalisa Aisraele

⁵⁴ Solomoni amallihalle ovekella wa Apwiya aavenyawo o nikuwa wulle akokhorilleeye atukhullalle muddullu mattaaye.

⁵⁵ Nave ahiimella adalisa mutthukumano muttheene wa Aisraele moowelliha mawu wi,

⁵⁶ “Apwiya etitimiheye, ayo yaavahille athwiiwa wiithuuwa moollikana ni mmo yalonjezilliiwa. Kheyiivo mawu naari amodda yakukureyille va ddeko ddaphaama ddittheddene yalonjezilliiwa voollotani oweella mwa oorumeyellaaye Mose.

⁵⁷ Apwiya Mullukwaahu ekhalle ni hiyaano wonanko yakhallelliiwa ni makhollwaahu, ahinihiye apaalle onitathilla.

⁵⁸ Erukunuse mirima ddahu wa alliwa wi neeteke mu ettilla ddiwa ni osunga mawiiwa, malamulwiiwa ni malangizwiiwa yaavahilliiwa makhollwaahu.

⁵⁹ Apwiya Mullukwaahu yuupuwelle nivekello nakanna otthaana ni mahiiyu. Apwiya Mullukwaahu ekipambanihe mi oorumeyelliiwa navettho yaakavihere Aisraele athwiiwa vawaavahani ddoopaalleya ddiwa nllapo ni nllapo.

⁶⁰ Sika athu attheene a va ellapo yavatthi edduwelle wi Apwiya tti Mulluku, khaavottho mmodda.

⁶¹ Sika mirima ddanyu ddikhalle ddawiivelleella wa Apwiya Mullukwaahu nave mwiiwellelleke mawiiwa ni othwara malamulwiiwa monga muneerelleenyu ollellova.”

Ovelleelliwa wa enyumba ya Apwiya

⁶² Vano mwene vamodda ni Aisraele attheene yaavelleella mikutho vamiitthoni va Apwiya.

⁶³ Nave Solomoni aavelleella mikutho ddeeyaattano wa Apwiya dda eng'ombe 22,000 ni dda enkhosa 120,000. Sika mwenoolle ni Aisraele attheene yaayivelleella enyumba ya Apwiya.

⁶⁴ Nllapo nenno mwene aapatulattho nipuro na variyari va nthato namillatu nno naari vahoollo va enyumba ya Apwiya. Vawi tti wenko avelleelleeyewo mukutho wooshellelliha ni mukutho wa othu navettho makhura a mikutho ddeeyaattano. Aheera ddiidda kaambiiwa nikuwa na mukutho namukuwa nno naari va nipuro noopatuleya na Apwiya naayeva sika mikutho dda ddeko ddittheddenenndda kheddaakwakhwanella ovelleellavo.

⁶⁵ Sika enthawi yeeyo Solomoni aakeraatthiha ehakallallo vamodda ni Aisraele attheene. Waari mutthukumano muullupalli ovenyera woovollowella wa Hamati ophiya o ntapo na Iguputo. Ehakallallweella yaari yowaatitimiha Apwiya Mullukwaahu mallapo matthanu ni meelli.

⁶⁶ Va nllapo naneetthanu ni raru, Solomoni ahaalleella athwaayo wi eroweke. Yaamuthokoza mwenooyo nave yaarowa ni murima woohakallalla ni woothapella ekaamba ya ddaphaama ddittheddene nnddo Apwiya yamweerelliiwa Davide oorumeyelliiwa ni athwiiwa Aisraele.