1 Mamwene 7 - Mawu a Mulluku

Enyumba yoomwene ya Solomoni

¹ Solomoni amallihalle omaka enyumba yoomweneelle miyakha khumi ni miraru.

² Aamakattho Enyumba ya Otthako wa Lebanoni. Esiri ddiwa ddaari ddoorekama mamita 44, ddooramballalla mamita 22 ni ddooya muddullu mamita 13 ni hafu. Yaamakiwe vaddullu va mizere miraru dda apoto amukunguza nave vaakhalla miteekho ddamukunguza vaddullu va apotwaayo.

³ Vaddullu va miteekhomvo vaakhalla matabwa amukunguza oohuruwella ezipinda nnddo ddamakiwe va apoto 45, va orive muzere apoto khumi ni atthanu.

⁴ Vaakhallattho maferemu amawindo mizere miraru, niwindo owehana ni nikhwaaye. Mawindwaayo yawehana mararumararu.

⁵ Nave millako ddittheddene ni mawindweene ddaari ni embali ddisese ddoophwanaphwana nave mawindo mararu yawehana ni mawindo mamodda mararu.

⁶ Nave yaamaka Nikhote na Apoto noorekama mamita 22 ni nooramballalla mamita 13 ni hafu. Vahoollo va nikhotenna vaakhalla nikhote nimodda na apoto ni miteekho.

⁷ Aamakattho Echipinda ya Mpando Woomwene yooromolliwa Nikhote na Echiweruzo naweruzellamo millatu. Muwari mwiwa aayihuruwella ni matabwa amukunguza ovenyera vatthi ophiyera opatthoni.

⁸ Vano aamaka enyumbaaye yookhallamo otulli wa Nikhote na Echiweruzo nave namakiwe moophwanaphwana. Solomoni aamakattho enyumba ya mwaariye, mwaana a Farao, yoophwanaphwana ni nikhotenno.

⁹ Enyumba ddittheddenenndda ddamakiwe ni malluku oowallamella mutengo, oosemiwa moollikana ni milingo ddiwa ayo yachekiwe ni saaha muwari ni otte. Mallukwaalla yaamakella enyumba ovenyera va matthipello ophiya vaddullu va esiri, ovenyerattho mu nthato na enyumba ya Apwiya ophiya o nthato nuullupalli.

¹⁰ Matthipellwiiwa yamakiwe ni malluku muullupalli, oowallamella mutengo, oorekama mamita masese ni ooramballalla mamita mararu ni hafu.

¹¹ Nave vaddullu vaakhalla malluku oowallamella mutengo oosemiwa moollikana ni milingo ddiwa ayo vaddullu viwa vaari matabwa amukunguza.

¹² Nthato nuullupalli namakiwe ni mizere miraru dda malluku oosemiwa ni muzere mmodda wa matabwa amukunguza. Nthato na muwari mwa enyumba ya Apwiya ni nikhote niwa namakiwe moophwanaphwana.

Mutteko wa Hiramu va enyumba ya Apwiya

¹³ Vano mwene Solomoni aarumihella othenga wa Hiramu wi aweewo o Tiro.

¹⁴ Hiramu aari mwaana a naamukhwelle a nlloko na Nafutali nave attiitthinnya yaari a o Tiro, eeruso yamukuwa. Hiramu aari eezeru ddinchichi, awiiwesesa ni eeruso voopangani erive ello yamukuwa. Aawa wa mwene Solomoni anaphara mutteko muttheene wenko.

Apoto eelli amukuwa

¹⁵ Hiramu aaweeka mukuwa awoopa apoto eelli. Arive opoto aari ooya muddullu mamita matthanu ni mararu, ooramballalla mamita matthanu ni hafu. Nave opotooyo aari ootemulla wonanko paipi muullupalli ni awiitivalla wonanko yoolingella ya eyaalla ddisese. Opoto mmoddooyo aari oollikana ni yoolla.

¹⁶ Aapangattho migomba miilli ddamukuwa waweeka addihiya vaddullu va apotwaayo. Erive yavaddullu yaari ya mamita meelli ni hafu.

¹⁷ Nave aapanga mathavi meelli oolluwana ookorowanjellelleyana aahiya va miru dda apoto. Nthavi nimodda va muru mmodda navettho nthavi nimodda va muru mmoddattho.

¹⁸ Aapangattho apoto m'mizere miilli ddamakangaza ddawaapheella vaddullu va nthavi wi akhuneelle muru wa apoto. Aheerattho emoddamoddave ni muru mmoddooyo.

¹⁹ Miru dda apotwaayo ddoopiwe wonanko malluwa, ddoorekama vakhuviru mamita meelli.

²⁰ Mirunnddo ddaari vaddullu va apoto eelli navettho vaddullu va echigawo yawaapheella yavaddullu va nthavi. Va muru mmodda vaari makangaza 200 va mizere miilli ddawaapheella nave va muru mmoddooyo vaari voollikana.

²¹ Aamaka apotwaayo va nikhote noovollowella mu enyumba ya Apwiya. Opoto a o embali yoomwera nnddina naye naari Yakini nave a o embali ya ompoto nnddina naye naari Bowazi.

²² Vano vaddullu va apotwaayo aareerihavo ni malluwa nave wenko sika waari omalliha mutteko woomaka apoto.

Ethanki yamukuwa

²³ Vatulli viwa aapanga ethanki yamukuwa yanamurukunuwa nave aayiromolla wi enyanja. Owanoni wiwa waari wooramballalla mamita masese ni hafu. Owallamella wiwa waari wookhwaranya mamita meelli nave waapheella wa owanoninko waari wa mamita khumi ni mararu ni hafu.

²⁴ Vatthi va eyano dda ethankeeyo vaari makapu amukuwa waapheella ethanki ettheeneeyo ya mamita khumi ni mararu ni hafu m'mizereni miilli. Makapu yaalla yaapangelliwe nimodda ni ethankeeyo.

²⁵ Ethankeeyo yiimesiwe vaddullu va eng'ombe ddamukuwa khumi ni piilli. Ddiraru ddaweha ompoto, ddiraru wookhuma nndduwa, ddiraru omwera ni ddiraru woovollowa nndduwa. Nave meto ddiwa ddamutulli ddaanyinganlle muwari.

²⁶ Wiitivalla wa ethankeeyo waari woophwanaphwana ni nnatta nave eyanwiiwa yoopiwe wonanko ya kapu, yookhoromanella otte wonanko malluwa. Ethankeella yaddalla ni malita 40,000 amaaddi.

Meto ddamukuwa

²⁷ Hiramu ahoopattho meto ddamukuwa khumi. Orive mweto waari woorekama vakhuviru mamita meelli, wooramballalla vakhuviru mamita meelli ni wooya muddullu nimita nimodda.

²⁸ Metonnddo ddapangiwe ni matabwa amukuwa oovollochihiwa mu maferemu.

²⁹ Nave va matabwa yaalla vaasemiwa ezithunzi dda mikango, eng'ombe ni akerubi.* Vano vamaferemunimvo, vaddullu ni vatthi va mikango ni eng'ombennddo vaasemiwa ekhara ddamalluwa.

³⁰ Erive yawiimesella yaakhalla ni magudumu masese amukuwa ni esipinduro ddamukuwa. Nave mu makona masese mwaakhalla ddawiimesella ddamukuwa. Mukhwipi mwa ddawiimesellannddo mwaareerihiwa ni ekhara ddamalluwa.

³¹ Owanoni wa nibeseninno waari wawaapheella nave waakhwaranya yawiimesella masentimita 45 oya muddullu ni owallamella masentimita 18. Owanoninko waasemiwa ddeko ddoohiyanahiyana mwawaapheella. Nave matabwiiwa yaari amakona oohikhalla awaapheella.

³² Magudumu masesaayo yaari vatthi va matabwa nave mikoko ddiwa ddaakhomelliwe omodda ni mwetooyo. Magudumwaayo yaari ooya muddullu masentimita 66.

³³ Magudumwaayo yaari wonanko a nigareta nave esipindiro ddiwa, marimwiiwa, masipokwiiwa ni mahabwiiwa yaari amukuwa.

³⁴ Ddawiimesella orive mweto ddaari ddisese, emodda virive vakona. Ddawiimesellannddo ddakhomelliwe omodda ni magaretaayo.

³⁵ Nave vaddullu va magaretaayo vaakhalla ello yanamurukunuwa yoorekama masentimita 22 waapheella magareta mattheene. Vaddullumvo vaakhallattho ddawiimesella magaretaayo ni matabwiiwa ddookhomelliwa omodda.

³⁶ Vaddullu va ddawiimesellannddo ni va matabwamvo aagobavo akerubi, mikango ni mikwarangwa moollikana ni mpata wookwakhwanella ni malluwa mwawaapheella.

³⁷ Meto khuminnddo ddapangiwe mwawi ddiiddo. Ddittheddennddo ddapangiwe moophwanaphwana kaambiiwa milingo ddiwa ddaari ddoollikana nave mooneyellwiiwa yaarittho oophwanaphwana.

³⁸ Hiramu ahoopattho epalli khumi ddamukuwa. Erive epalli mwaaddalla maaddi malita 800 nave vayanoni viwa vaari vooramballalla mamita meelli. Erive epalli yaakhalla ni mweto mmodda.

³⁹ Vano aahiya meto dditthanu embali ya omwera wa enyumbeeyo nave meto dditthanu mamodda ompoto wiwa. Aahiya ethankeelle va ekona embali ya omwera wa wookhuma nndduwa wa enyumbeeyo.

Ddeko ddooreerihella enyumba ya Mulluku

⁴⁰ Hiramu aapangattho epalli, mafosholo ni mabeseni manchichi. Sika aamalliha muttekwaaye muttheene woomumakella Solomoni enyumba ya Apwiya.

⁴¹ Ahaamaka apoto eelli, ahoopa migomba ddoohuruwellana miru dda apoto

⁴² nave aamallihattho opanga makangaza 400 va mathavi meelli, mizere miilli ddamakangaza va nirive nthavi ohuruwella miru dda apoto.

⁴³ Aamallihattho meto khumi ni epalli khumi ddookhalla va metonnddo,

⁴⁴ ahoopa ethanki ni eng'ombe khumi ni piilli valle vakeraatthihiwe ethankeeyo.

⁴⁵ Epalli, mafosholo ni mabeseni nnddo Hiramu amoopelleeye Solomoni wi ddikhalle ddoopharihella mutteko mu enyumba ya Apwiya ddaari ddamukuwa woonyezimella.

⁴⁶ Mwene aapangiha ddeko ddenndda o nipuro na olloko nno niri variyari va Sukoti ni Zaretani mu ntapo na Yordani.

⁴⁷ Solomoni khaaddilingalle ddeko ddenndda kaambiiwa ddaari ddinchichi. Sika ollemella wa mukuwooyo khewaadduwanyeye.

⁴⁸ Sika Solomoni aapanga ddoopharihella mutteko ddittheddene nnddo ddaari mu enyumba ya Apwiya monga nikuwa nagolide, tebulo agolide mvo vakhalla buledi oovelleelliwa wa Mulluku

⁴⁹ ni ddoohiyavo enyali ddagolide aphaama omwera dditthanu, ompoto dditthanu, muwariwari mwa nipuro naweellesesa. Aapangihattho malluwa, enyali ni ddoopanella, ddittheddene ddagolide.

⁵⁰ Ddoothiimihella enyali, mabeseni, embale ddawoosellamo lubani* navettho eziwaya ddoovallella munllo ddaari ddagolide aphaama. Nave aapangiha ddoomakella machiwi a enyumba ya Apwiya, machiwi a muwari oovollowella o nipuro naweellesesa ni machiwi oovollowella o enyumba ya Apwiya, ddittheddenennddo ddaari ddoohuruwelliwa ni golide.

⁵¹ Vano Solomoni amallihalleeye mutteko muttheene va enyumba ya Apwiya, aahiyamo ddeko nnddo attiitthinnya Davide yaddipatulelliiwa wa Apwiya monga siliva, golide ni eziwiya. Yaaddihiya mu ddoosungellamo eyuuma mu enyumba ya Apwiya.