1 Mamwene 6 - Mawu a Mulluku

Solomoni anamaka enyumba ya Apwiya

¹ Vimanlle miyakha 480 Aisraele ekhumalle o Iguputo, muyakha waneesese wa omwene wa Solomoni mu Israele va mweeri wa Zivi oyo ori mweeri waneepiilli Solomoni ahaamba omaka enyumba ya Apwiya.

² Enyumba ya Apwiya eyo mwene Solomoni amakilleeye yaari yoorekama mamita 27, yooramballalla mamita matthanu ni masese nave mamita khumi ni mararu ni hafu owella muddullu.

³ Echipinda yootte yaari yoorekama mamita masese ni hafu ni yooramballalla mamita matthanu ni masese ophwanaphwana ni oramballalla wa enyumbeeyo.

⁴ Mawindo a enyumbeeyo yaari ang'onong'ono koma ooramballalla muwari.

⁵ Aamakattho ezipinda ddootthinddaanyereyana moottaannyana ni esiri, waapheella esiri dda enyumba ya Apwiya ni nipuro naweella namuwari.

⁶ Echipinda yavatthi yaari ya mamita meelli nave yavariyari yaari ya mamita meelli ni hafu. Echipinda yavaddulluddullu yarekamille mamita mararu. Otte wa esirinnddo yaamakamo mooshashaalliha moowaapheella enyumbeeyo wi ehivollochiheke migomba musirinimmo.

⁷ Enyumbeeyo yamakiwa ni malluku oosemasema wi vihiiweye mahamala, akottokwa apaalle erive echipangizo yamukoko.

⁸ Mullako woovollowella enyumba yavatthi waari omwera wa enyumbeeyo. Athu yaanawella masitepe voovenyerani o echipinda yavatthi oya o echipinda yavariyari, emoddamoddave voovenyerani o echipinda yavariyari oya o echipinda yavaddullu.

⁹ Sika aamalliha omaka enyumbeeyo nave aayithunyella ni matabwa amukunguza.

¹⁰ Aamallihattho ezipinda ddootthinddaanyereyana ddooya muddullu mamita meelli nave ddaallundellelliwa o enyumba ya Mulluku ni matabwa amukunguza.

¹¹ Vano Apwiya yaamulleella Solomoni wi,

¹² “Ollota dda enyumba onamakeeweella, waawiiwellellaka mawaaka ni malangizwaaka ni othwara malamulwaaka mattheene kineerokwakhwanihella oweella mwa weyaano lonjezano nno kakeraatthihalleemi ni attiittho Davide.

¹³ Nave kineerokhalla variyari va Aisraele, ngiwa kaahiya athwaaka Aisraele.”

¹⁴ Sika Solomoni aamalliha omaka enyumba ya Apwiya.

Ddooreerihella muwari mwa enyumba ya Apwiya

¹⁵ Solomoni aareeriha esiri dda enyumbeeyo vookhomellani matabwa amukunguza ovenyera vatthi ophiyera vaddullu. Nave vatthi viwa aakhomavo matabwa a paini.

¹⁶ Vano aaphadda echipinda ni matabwa amukunguza yoorekama mamita matthanu ni masese muwari mwa enyumba, otulli wiwa ovenyera vatthi ophiyera opatthoni. Aayimaka wi ekhalle echipinda yamuwari, nipuro naweellesesa.

¹⁷ Echipinda yuullupalli eyo yaari vahoollo va nipuro naweellesesa yaari yoorekama mamita 18.

¹⁸ Muwari mwa enyumbeeyo va matabwa amukunguza vaajambuliwa amukamba ni malluwa. Muwari mutthemwene mwaari mwa matabwa wawi malluku yaamakelliwe esiri kheyooneya.

¹⁹ Echipinda yaweellesesa yaari muwari wi mukhalleke nibokosi na echipangano na Apwiya.

²⁰ Echipindeella yaari yoorekama mamita matthanu ni masese, yooramballalla mamita matthanu ni masese ni yooya muddullu mamita matthanu ni masese. Esiri ddittheddene ddaamariwa ni golide aweekeya. Aamakattho nikuwa na mukutho na matabwa amukunguza.

²¹ Nave Solomoni aahuruwella muwari mutthemwene mwa enyumbeeyo ni golide aphaama. Vahoollo va mullako woovollowella mu echipinda yamuwari eyottho yamariwe ni golide vaahiyiwa onyolo wagolide.

²² Enyumba ettheeneeyo yaahuruwelliwa ni golide ophiyera omalla. Nikuwa na mukutho nittheene na mu echipinda yamuwari naahuruwelliwattho ni golide.

²³ Ahaapanga akerubi* eelli a muteekho wa olivi awiimesa mu echipinda yamuwari wunchichi. Arive mukerubi aari oorekama mamita masese ni hafu.

²⁴ Nuuphello na arive mukerubi naari noorekama mamita meelli. Ovenyera va etthoka ya nuuphello nimodda ophiyera va etthoka ya nuuphello nimodda vaari voorekama mamita masese.

²⁵ Mukerubi mmodda aari oorekama mamita masese ni hafu. Akerubi eellaayo yaari oophwanaphwana wunnuwa ni opangiwa wiwa.

²⁶ Arive kerubi aari orekama mamita masese ni hafu navettho mmodda aari oophwanaphwana orekama.

²⁷ Solomoni aawiimesa akerubaayo mu echipinda yamuwari mu enyumba ya Apwiya. Nave muuphellwiiwa yahaattaphurusa wawi nuuphello na kerubi mmodda naanattannya esiri nave nuuphello na mmoddooyo naanattannya esiri emodda. Muuphello mamoddaayo yaanattannyana variyari va echipindeeyo.

²⁸ Vano ahaahuruwella akerubaayo ni golide.

²⁹ Va esiri ddittheddene, muwari ni otte wene, aagobamo ezithunzi dda akerubi ni dda miteekho ddakanjeza ni malluwa.

³⁰ Aahuruwellattho ni golide vatthi va ezipinda ddamuwari ni dda otte wene.

³¹ Nave aapanga machiwi a matabwa a olivi vamullako wa o echipinda yaweelleseseelle. Nave yaari ni embali dditthanu.

³² Va machiwi meelli a matabwa a olivi vaagobiwa ezithunzi dda akerubi, ddamukwarangwa ni malluwa. Nave ddittheddene aaddihuruwella ni golide.

³³ Aapangattho eferemu ya matabwa a olivi ya va mullako muullupalli wa enyumbeeyo yaari ni embali ddisese.

³⁴ Nave aapanga machiwi meelli a paini ayo yaworeya opindeya.

³⁵ Va machiwaayo aasemavo akerubi, miteekho ddakanjeza ni malluwa. Nave aamara ni golide.

³⁶ Aamakattho nthato namuwari nave esiri ddiwa aaddipanga ni malluku oosema mizere miraru, mwawaakakhaniha ni muzere mmodda wa matabwa amukunguza.

³⁷ Matthipello a enyumba ya Apwiya yaamakiwe mu muyakha waneesese, mweeri wa Zivi.

³⁸ Nave muyakha waneekhumi ni mmodda wa mweeri wa Buli, mweeri waneetthanu ni raru, enyumba ettheene yaamaalla omakiwa moollikana ni mmo yapaallelliiwa. Enyumbeella yamakiwe miyakha mitthanu ni miilli.