1 Mamwene 5 - Mawu a Mulluku

Solomoni anakhozekella omaka enyumba ya Mulluku

¹ Mwene Hiramu a o Tiro ahaarumiha oomurumeyellaaye wa Solomoni iiwalleeye wi oozoziwa* omwene wa attiitthinnya vawi ahaattana ni Davide.

² Vano Solomoni aarumiha mawu wa Hiramu wi,

³ “Munnadduwella wi attiitthaaka Davide kheyaawonre omaka enyumba yowaallapellellamo Apwiya Mullukwiiwa ekaamba ya ekhoto dda adaniiwa nnddo ddawaaphenlle. Koma voomallihellani Apwiya yahaagonjihella adaniiwa.

⁴ Koma vano Apwiya Mullukwaaka aakivaha murendelle o embali ddittheddene mwawi nginna mudani apaalle omorelliwa erive yookatamiha.

⁵ Sika kinapaalla kaamakelle enyumba Apwiya Mullukwaaka moollikana ni mmo yaalleellelliiwa attiitthaaka Davide wi, ‘Mwanawo oyo kinaamukeraatthiheemi va mpando woomwene munipuroni mwawo sika anaakimakelle enyumba.’

⁶ Sika vano mwaalamule athwaanyu wi ekuuhelle miteekho ddamukunguza dda o Lebanoni. Allupa muttekwaaka eneerophara mutteko vamodda ni aanyu. Kineerewuullivellani moollikana ni mmo munaallotelleenyu ekaamba ya allupa muttekwaanyu vawi variyari vahu khaavo anadduwella wuuha miteekho wonanko athu a o Sidoni.”

⁷ Vano Hiramu iiwalleeye mawu a Solomoni, aahakallalla wunchichi nave aallota wi, “Apwiya etitimiheye ollello voomuvahani Davide mwaana eezeru wi alamulelle mutundu wa athu muullupalloolla.”

⁸ Nave Hiramu aarumiha othenga wa Solomoni wi, “Kohaakhella othenga oyo mwaakirumihelleenyu. Kookhozeka wuuvahani miteekho ddamukunguza ni ddapaini nnddo mwaakivekilleenyu.

⁹ Allupa muttekwaaka eneerokiitthana ovenyera wuno o Lebanoni ophiyana o enyanja. Nave eneeroddibelluwiha m'maaddini wi eyeena o nipuro nno munaaromolleenyu. Sika eneeroddittaphulla wenko nave nyu muneeroddaakhella. Mallivellwaaka kinapaalla wi mukivahe yoocha ya athwaaka.”

¹⁰ Sika Hiramu aamurumihella Solomoni miteekho ddittheddene apaalleeye dda mukunguza ni paini.

¹¹ Nave Solomoni aanamurumihella Hiramu, orive muyakha mataani 2,000 a tirigu wi akhalle yoocha ya athwaaye ni makhura a olivi malita 400,000.

¹² Vano Apwiya yaamuvaha Solomoni ezeru moollikana ni mmo yalonjezilliiwa. Vaakhalla murendelle variyari va Hiramu ni Solomoni nave yaakeraatthiha mwiiwanano.

¹³ Mwene Solomoni ahaambiha mutteko wathangata wa athu 30,000 mu Israele mutthemwene.

¹⁴ Adoniramu sika aalamulella athangataayo. Aanaaruma o Lebanoni athu 10,000 vamweerini moowaakakhana nko yakhalliiwawo mweeri mmodda nave owaniwa yakhallawo miyeri miilli.

¹⁵ Solomoni aakhallattho ni athu 70,000 ootukhulla katundu ni amodda 80,000 oosema malluku m'miyaangoni.

¹⁶ Aakhallattho ni akapitawo 3,300 owaalamulella allupa mutteko.

¹⁷ Mwene aalamula wi athwaayo eseme malluku muullupalli oowallamella mutengo wi emakelle matthipello a enyumba ya Apwiya.

¹⁸ Eeruso yoomaka enyumba a Solomoni ni a Hiramu vamodda ni a o Gebala sika yasema ni opotokosa miteekho ni malluku ddoomakella enyumbeeyo.