1 Mamwene 4 - Mawu a Mulluku

Enduna dda Solomoni

¹ Mwene Solomoni aari oolamulella mu Israele mutthemwene.

² Nave enduna ddaye dduullupalli ddaari, Azariya mwaana a mullupa mukutho Zadoki,

³ Elihorefe ni Ahiya anamwani a Shisha yaari namalembella. Yehoshafati mwaana a Ahiludi aari oosunga ddoolembiwa,

⁴ Benaya mwaana a Yehoyada aari akhoto muullupalli, Zadoki ni Abiyatara yaari allupa mukutho,

⁵ Azariya mwaana a Natani aari muullupalli a athu oolamulella ezigawo. Zabudu mwaana a Natani aari mullupa mukutho ni mulangizi a mwene Solomoni.

⁶ Ahishara aari muullupalli a allupa mutteko a enyumba yoomwene nave Adoniramu mwaana a Abida aari muullupalli oowehera mitteko ddathangata.

⁷ Solomoni aari ni enduna khumi ni piilli ddoolamulella ezigawo mu Israele mutthemwene. Erive enduna yaanavelleella ddoocha wa mwene ni nibanja naye nittheene mweeri mmodda vamuyakhani.

⁸ Manddiniiwa tti, Benihuri oolamulella o Efuremu, ellapo yamiyaango,

⁹ Benedekere oolamulella mizinda dda Makazi, Shalabimu, Beteshemeshi ni Eloni Betehanani.

¹⁰ Benihesedi alamulella mizinda dda Aruboti ni Soko ni echigawo ettheene ya Hefere.

¹¹ Benabinadabu oyo amutthenlle Tafati, mwaana a Solomoni, alamulella echigawo ettheene ya Dori,

¹² Baana, mwaana a Ahiludi, alamulella mizinda dda Taanaki, Megido ni Betesheani muttheene oyo waari vakhuviru ni Zaretani ohito wa etawoni ya Yezireele. Navettho alamulella waambeella muzinda wa Betesheani ophiya o Abele Mehola ni o Yokomeamu.

¹³ Benigebere alamulella etawoni ya Ramoti o Giliyadi ni mizi dda mabanja a Yairo mwaana a Manase mu Giliyadi owaakattho echigawo ya Arigobu o Bashani eyo yaari ni mizinda 60 ddamipanda dda millako ddoowalliwa ni mikoko ddamukuwa.

¹⁴ Ahinadabu mwaana a Ido, alamulella o Mahanaimu.

¹⁵ Ahimaazi oyo aamutthenlle Basemati mwaana a Solomoni, alamulella o Nafutali.

¹⁶ Baana mwaana a Hushai alamulella o Ashere ni o Bealoti.

¹⁷ Yehoshafati mwaana a Paruwa alamulella o Isakara.

¹⁸ Shimeyi mwaana a Ela alamulella o echigawo ya Benjamini.

¹⁹ Gebere mwaana a Uri alamulella o Giliyadi owaakattho ellapo eyo yaari ya Sihoni mwene a Aamori navettho ellapo ya mwene Ogi a o Bashani. Yaakhallavottho enduna emodda yuullupalli yoowehera ellapo ya Yuda.

²⁰ Athu a o Yuda ni a o Israele yaari anchichi, ooheerengeya wonanko mihava dda mukhwipi mwa enyanja. Yaanacha ni owirya navettho yaanahakallalla.

²¹ Solomoni aanalamulella moomwene mattheene ovenyera o muhinje wa Yufurate ophiya o ellapo ya Afilisti, o malire a Iguputo. Moomwene mattheene yaanakhoma misonkho ni omurumeyella Solomoni mallapo mattheene a okumaaye.

²² Ddoocha ddoopaalleya o enyumba ya Solomoni va nllapo nimodda ddaari mathumba 100 a othu waphaama ni mathumba 200 a mugaiwa,

²³ eng'ombe khumi ddooneneva ddoochihelliwa munikhollani, eng'ombe 20 ddoochihelliwa obusani, enkhosa ni epuri 100. Vaanakhallattho paalla, anaahe, namungoma ni epallame ddooweta.

²⁴ Mwene Solomoni alamulella echigawo ettheene ya embali ya woovollowa nndduwa ya muhinje wa Yufurate ovenyera o Tifisa ophiya o Gaza nave echigawo ettheeneeyo yaari ya murendelle.

²⁵ Nave Ayuda ni Aisraele yaanakhalla mwamurendelle, arive muthu vatthi va muteekhwaaye wampesa ni vatthi va muteekhwaaye wanamukuyu ovenyera o Dani ophiya o Beeresheba mallapo mattheene a Solomoni.

²⁶ Solomoni aakhalla ni makholla 40,000 a akavalo oopurulla magaretaaye ni athu 12,000 oowella va akavalwaayo.

²⁷ Vano enduna 12 ddayenndde, ddaanavelleella yoocha ya mwene Solomoni ni ya athu attheene ayo yacha o enyumba yoomwene, erive enduna mweeri waayewaaye. Endunannddo ddaanoonesesa wi ohirame ello.

²⁸ Erive enduna yaanavelleellattho moollikana ni mmo yalamulelliwiiwa, barele ni manasi owaachiha akavalo oopurulla magareta ni akavalo amodda. Ddittheddenenndda ddaanahiyiwa nko ddapaalleyiiwa.

²⁹ Vano Mulluku aamuvaha Solomoni ezeru ni wiiwesesa wunchichi, ezeru ddaye ddaari ddoohikhalla ni malire.

³⁰ Solomoni aakhalla ni ezeru waakhwaranya athu attheene a wookhuma nndduwa ni dda attheene a o Iguputo.

³¹ Olliye aakhalla ni ezeru waakhwaranya athu attheene, omukhwaranya naari Etani a o Ezara, omukhwaranyattho Hemani, Kalikoli ni Darida anamwani a Maholi. Nave epillaaye yaavuwa mu ellapo ddittheddene ddawaapheella.

³² Solomoni aapeka miyambi 3,000 ni machipo 1,005.

³³ Aanahuddiha dda miteekho, waambeella muteekho wamukunguza wa o Lebanoni ophiyera makukhu ahisope* oomella vasirini. Aanahuddihattho dda enama, epallame, ehomba ni ddawaapadda.

³⁴ Sika athu oovenyera o ellapo ddittheddene yaanawa wi yiiwe ezeru dda Solomoni. Athu yaalla yaanarumihiwa ni mamwene a ellapo yavatthi ayo yaari yiiwalle dda ezeru ddaye.