1 Mamwene 3 - Mawu a Mulluku

Solomoni anaveka ezeru

¹ Solomoni ahaattana ni Farao mwene a o Iguputo voomutthellani mwaana a Farao. Solomoni aamukusa mutthiyanooyo anakhallana mu muzinda wa Davide ophiyera amallihalle omaka enyumbaaye, enyumba ya Mulluku ni mpanda waapheella muzinda wa Yerusalemu.

² Mallapo yaayo athu yavelleella mikutho o mapuro oollapellamo oohiyanahiyana kaambiiwa yaari ehinamakelle enyumba nnddina na Apwiya.

³ Solomoni aanaakonda Apwiya nave aaniiwellella malangizo a attiitthinnya Davide. Komave aanavelleella mikutho ni woosa ddawunkhella omapuroninko.

⁴ Nave mwene aaya o Gibiyoni wi avelleelle mikutho vawi wenko sika waari nipuro namallapello nuullupalli. Solomoni aavelleella mikutho ddooshellelliha 1,000 vanikuwani.

⁵ O Gibiyoni Apwiya yahooneyella wa Solomoni mahiiyu moolloha, emulleella wi, “Veka eyo onapaalleewe nave kineerewuuvaha.”

⁶ Nave Solomoni ahaakhulla wi, “Mwaahooniha echikondi yuullupalli ni yoohisintheya wa attiitthaaka Davide, oorumeyellaanyu kaambiiwa yaari oororomelleya, eechilungamo ni aphaama vamiitthoni vanyu. Nave mwaavirellella owooniha echikondi yuullupalli ni yoohisintheya vawaavahani mwaana oyo vano akeraatthille va mpandwiiwa woomwene.

⁷ Vano nyu Apwiya Mullukwaaka, mookivollochiha omwene wa attiitthaaka mi oorumeyellaanyu naari kiri mwaana mung'onong'ono navettho kihidduwellaka olamulella.

⁸ Vano mi oorumeyellaanyu kinakhalla variyari va athu mwaatthoollilleenyu, mutundu muullupalli, athu awaata, ooheerengeya.

⁹ Sika mukivahe mi oorumeyellaanyu murima woodduwella waalamulella athwaanyu wi kidduwelleke ohiyaniha yaphaama ni yoonanara. Vawi kinaawore mwawiidde waalamulella athwaalla?”

¹⁰ Apwiya yaahakallalla vawi Solomoni aaveka yeella.

¹¹ Nave Mulluku aamulleella wi, “Kaambiiwa ovekille ella ohiri okumi woorekama apaalle eyuuma apaalle okhwa wa adanaawo koma ovekille ezeru ddawaalamulella athu phaama,

¹² sika kineeroweerella nnddo ovekilleewe. Kineerewuuvaha ezeru ni odduwella wawi khanooneyeke muthu oophwanaphwana ni weyaano navettho khawa ooneya mmodda oophwanaphwana ni weyaano vatulli vawo.

¹³ Kineerewuuvahattho nnddo ohivekilleewe, eyuuma ni olemu wi khavikhalla mwene oophwanaphwana ni weyaano enthawi ettheene ya okumaawo.

¹⁴ Nave waathwaraka ettilla ddaka vawiiwellellani malangizwaaka ni malamulwaaka monga attiitthaawo Davide, kineerewuuvaha okumi woorekama.”

¹⁵ Solomoni aavenya nave aadduwella wi aamalloha. Vano aaya o Yerusalemu iimella vahoollo va nibokosi na echipangano na Apwiya avelleella mikutho ddooshellelliha ni mikutho ddeeyaattano dda Apwiya. Vano ahaakhozella machellello oorumeyellaaye.

Solomoni aneeruza mullatu wookatamiha

¹⁶ Vano nllapo nimodda atthiyana eelli ooraruwa yaawa wa mwene Solomoni yiimella vamiitthoni vaye.

¹⁷ Mutthiyana mmodda aallota wi, “Apwiya, mutthiyana olla ni miyaano ninakhalla mu enyumba emodda. Nave kaamuyara mwaana olliye ari ni miyaano mpammo.

¹⁸ Vano va nllapo naneeraru, kimuyanre mwanamutthiyanoolla aamuyarattho mwaana. Nave khaavo mmodda aari mpammo koma hiyaanove eelli.

¹⁹ Nave mwaana a mutthiyanoolla aakhwa mahiiyu kaambiiwa aamukonella.

²⁰ Vano variyari va mahiiyu kikonaka, aavenya amukusa mwanaka omirimani waka, amukonaatthiha omirimani waye. Nave amukonaatthiha mwanaye ookhooyo omirimani waka.

²¹ Kavenyilleemi ohinase wi kimwaamwihe mwanaka, kaamoona wi ookhwa. Koma kimuwehesesille kaamoona wi khaari aaka.”

²² Koma mutthiyana mmoddooyo aallota wi, “Iyaayi, mwaana mukumoolla tti aaka nave ookhoolla tti aawo.” Vano mutthiyana awaamboolle ahaakhulla wi, “Iyaayi, mwaana ookhoolla tti aawo nave mukumoolla tti aaka.” Yaakangana mwawi ddiidda vamiitthoni va mwene.

²³ Vano mwenoolle aallota wi, “Arive muthu anallota wi, ‘Mwaana mukumooyo tti aaka nave ookhoolla tti aawo.’ ”

²⁴ Nave mwenooyo aallota wi, “Wannani nsupada.” Sika mwenooyo ahinnyiwa nsupadanno.

²⁵ Vano mwenooyo aallota wi, “Mphaddeni mwaana mukumooyo variyari nave mumuvahe arive mutthiyana embali emodda.”

²⁶ Nave mutthiyana oyo aari mwaneena a mwaana mukumoolle aamumorella ethakaraka mwanayoolle. Sika aamulleella mwenooyo wi, “Apwiya, muhimwiiphe mwaanooyo koma mumwinnye mukhwaakoolla.” Koma mutthiyana mmoddoolle aallota wi, “Mwaanoolla ahikhalle aaka apaalle aawo, aphaddiwe variyari.”

²⁷ Vano mwene Solomoni aallota wi, “Muhimwiiphe mumwinnye mwaana mukumi mutthiyana awaamboolla vawi olliye sika amennya a mwaanoolla.”

²⁸ Nave Aisraele attheene yiiwalliiwa dda echiweruzo ya mullatoolla, yaamuriiha mwene Solomoni kaambiiwa yaadduwella wi aakhalla ni ezeru dda Mulluku ddaweeruzella millatu mweechilungamo.