1 Mamwene 22 - Mawu a Mulluku

Namallotella Mikaya anamuchenjeza Ahabu

¹ Wa miyakha miraru khavaari ekhoto variyari va Siriya ni Israele.

² Mu muyakha waneeraru, mwene Yehoshafati a o Yuda aaya wa mwene Ahabu mwene a o Israele.

³ Vano Ahabu ahaakoha oorumeyellaaye wi, “Ethiyo munnadduwella wi Ramoti Giliyadi tti muzindaahu, vano kaambiiwa tini neerelleehu ellapo tuu ohiwaakha ovenyera wa mwene a o Siriya?”

⁴ Nave aamukoha Yehoshafati wi, “Ethiyo oneerothaanana ni miyaano woowana ekhoto o Ramoti Giliyadi?” Yehoshafati aamwaakhulla mwene a o Israele wi, “Mi kiri ni nyuwaano nave athwaaka tti aanyu, akavalwaaka tti aanyuttho.”

⁵ Yehoshafati aamulleella mwene Ahabu wi, “Vawaamba muveke ezeru wa Apwiya.”

⁶ Vano mwene Ahabu ahaatthukumaniha anamallotellaaye 400 aakoha wi, “Ethiyo kiye kawane ekhoto ni Ramoti Giliyadi apaalle kihiyeewo?” Anamallotellaayo yaamulleella wi, “Khaweni vawi Apwiya eneerowuvelleella muzindooyo m'mattani mwanyu.”

⁷ Koma Yehoshafati aakoha wi, “Ethiyo khaavo namallotella mmodda a Apwiya wi nivekewo ezeru?”

⁸ Ahabu aamulleella Yehoshafati wi, “Ookhallavo Mikaya mwaana a Imila. Koma kinniitanana kaambiiwa khanallotella ddaphaama dda miyaano, erive enthawi ddoonanarave.” Yehoshafati aamwaakhulla wi, “Ohilloteke ddiiddo.”

⁹ Vano Ahabu ahiithana emodda mwa enduna ddaye ayilleella wi, “Khawe wamwiithane Mikaya mwaana a Imila awe wuno mwawaakuva.”

¹⁰ Enthawi yeeyo mwene a o Israele ni mwene Yehoshafati a o Yuda yaakeraatthi m'mipandoni ddiwa ddoomwene ewanre ddoowara ddiwa ddoomwene va nipuro noomuuputhellavo tirigu va mullako wa Samariya. Nave anamallotella attheene yaallotella vamiitthoni va mamwenaayo.

¹¹ Vano Zedekiya mwaana a Kenana ahiihanella manyaka amikoko allota wi, “Apwiya enallota wi, ‘Ni ddenndda muneerewaagonjihella Asiriya ophiyera yoonongeyille.’ ”

¹² Anamallotella attheene yaallotella emoddamoddave wi, “Khaweni o Ramoti Giliyadi nave muneeropambana. Apwiya ewuuvelleella muzindooyo m'mattani mwa amwene.”

Mikaya anallotella moomuhumullulla Ahabu

¹³ Amithenga olle ayiille woomwiithana Mikaya aamulleella wi, “Ngoonani, enallota anamallotella attheene enaallotella amwene ddaphaama. Sika nanyeenettho mullotelle emoddamoddave. Mullotelleke ddaphaama.”

¹⁴ Koma Mikaya aallota wi, “Kinimallupella vamiitthoni va Apwiya wi kinaallote nnddo Apwiya enaakilleelliiwa.”

¹⁵ Vano aphiyalle wa Ahabu, mwene aamukoha wi, “Mikaya, ethiyo hiyaano nawane ekhoto o Ramoti Giliyadi apaalle nihiyeewo?” Olliye ahaakhulla wi, “Khaweni muneeropambana. Apwiya eneerowuvelleella muzindooyo m'mattani mwa amwene.”

¹⁶ Koma mwenooyo aamukoha wi, “Ethiyo kuullupellihe okavi wi okilleelle ddawoona mu nnddina na Apwiya?”

¹⁷ Mikaya ahaakhulla wi, “Kaawoona Aisraele attheene emwareyelle va miyaango wonanko enkhosa ddoohikhalla ni mbusa.” Sika Apwiya yaallota wi, “Yaalla khenna pwiiwa owaahoollella. Arive muthu ayeeke owaniwa mwamurendelle.”

¹⁸ Mwene a o Israele aamukoha Yehoshafati wi, “Ethiyo Nguulleelle wi yoolla khawa akillotella ddaphaama koma ddoonanarave?”

¹⁹ Vano Mikaya aallota wi, “Sika iwellellani mawu a Apwiya. Mi kaawoona Apwiya ekeraatthille va mpandwiiwa woomwene ni angelo attheene yiimenlle onnattanatta ni wuunyotthoni wiwa.”

²⁰ Apwiya yaakoha wi, “Ethiyo ttaani anaamulleke Ahabu wi iiphiwe o Ramoti Giliyadi?” Mmodda allota ddimodda mmodda ddimodda.

²¹ Vaavo munepa mmodda waaphiya vakhuviru ni Apwiya ollota wi, “Mi kineerooya kamulleke.”

²² Vano Apwiya yaawukoha wi, “Onaamulleke mwawiidde?” Munepooyo waawaakhulla wi, “Kinaya kalloteke ddawoottha oyeella mwa anamallotellaaye attheene.” Sika Apwiya yaallota wi, “Weera ddiiddo, oneeropambana. Khawe wamulleke.”

²³ “Nave Apwiya aahiya munepa wawoottha mwa anamallotellaanyu attheene wi yoottheke koma Apwiya aallotella wi otulli oneerewuumorellani.”

²⁴ Vano Zedekiya, mwaana a Kenana, aaphiya vakhuviru amuukutha Mikaya vanramani, amukoha wi, “Ethiyo munepa a Apwiya wavenyille mwawiidde mwa miyaano ollota ni weyaano?”

²⁵ Mikaya ahaakhulla wi, “Oneerodduwella va nllapo nno onaayeewe wiipitthe mu echipinda yamuwari.”

²⁶ Vano Ahabu, mwene a o Israele aallota wi, “Muphareni Mikaya mumuyeena wa Amoni, muullupalli a muzinda ni wa Yowashi mwaana a mwene.

²⁷ Mwaalleelle wi mwene anallota wi, ‘Muhiyeni muthoolla mu endende nave mumvaheke ddoocha ni maaddi vang'ono ophiyera kihokollowillewo phaama.’ ”

²⁸ Mikaya aallota wi, “Mwahokollowawo phaama sika wi Apwiya khellotille oweella mwa miyaano.” Nave aavirellella wi, “Nyu athu attheene, iwani killotilleeminndda!”

Wiiphiwa wa Ahabu o Ramoti Giliyadi

²⁹ Vano mwene Ahabu a o Israele ni mwene Yehoshafati a o Yuda yaaya o Ramoti Giliyadi.

³⁰ Mwene a o Israele aamulleella Yehoshafati wi, “Mi kineeroddiipitthiha vooyaani okhotoninko koma we oware ddoowara ddawo ddoomwene.” Sika mwene a o Israele aaddiipitthiha attheenaayo eya okhotoni.

³¹ Vano mwene a o Siriya ahaalamula oohoollella akhoto 32 a va magareta wi ehiwane ekhoto ni arive muthu, mung'onong'ono apaalle muullupalli koma ni mweneve a o Israele.

³² Vano oohoollella akhoto a va magaretaayo yamoonilliiwa Yehoshafati yaallota wi, “Ddawoona, olla sika mwene a o Israele.” Sika yaahokollowa wi ewanena koma Yehoshafati ahaamba winlla mookhuwa.

³³ Nave oohoollellaalle yamoonilliiwa wi khe mwene a o Israele, yaahokollowa oohimwiikariha.

³⁴ Koma muthu mmodda aakunga muuraaye avokha mpaamba mooshisha amuhomana mwene a o Israele mookumanella mwa malaya amukoko akhoto. Vaavo mwenooyo aamulleella muthu oowella va nigareta naye wi, “Rukunuwa nave okivenyihevo va nipuro na ekhotonna vawi koophoreya.”

³⁵ Nllapo nenno ekhoto yahunnuwa wunchichi mwawi mwenoolle yamuhiyalle akeraatthille mu nigareta mwaye moowehana ni Asiriya ophiyera aakhwa misikuwa. Nikhame naye naari nitathiyellaka vatthi va nigaretanno.

³⁶ Voovollowani nndduwa wahiiweya okhuwa wa akhoto wi, “Arive muthu ayeeke o muzinda woowaniwa, o ellapo yoowaniwa.”

³⁷ Sika mwenoolle aakhwa nave athu yaamukusella o Samariya yamuvittha mu mahame wenko.

³⁸ Athwaalle yaahuwa nigaretanno o nthiya na o Samariya nko yahapa atthiyana ooraruwa nave anapwa yahaamba ollandda nikhame na mwene okwakhwanihella mawu yallotille Apwiya.

³⁹ Vano mitteko ddimodda dda Ahabu ni ddittheddene eerilleeye owaakattho dda enyumba dda manyaka eethepo eyo amakilleeye navettho dda mizinda ddittheddene nnddo amakilleeye ddoolembiwa mu nibukhu na epilli ya mamwene a o Israele.

⁴⁰ Sika Ahabu aakhwa, aathwara makhollwaaye. Mwanaye Ahaziya sika avollowille omwene munipuroni mwaye.

Yehoshafati mwene a o Yuda

⁴¹ Yehoshafati, mwaana a Asa, ahaamba olamulella o Yuda mu muyakha waneesese wa omwene wa Ahabu a o Israele.

⁴² Yehoshafati avollowille omwene ari ni miyakha 35 nave aalamulella o Yerusalemu miyakha 25. Amennya yaari Azuba, mwaana a Shili.

⁴³ Yehoshafati aathwara echisanzo yaphaama ya attiitthinnya, khaahiyalle ddennddo. Aaneera echilungamo vamiitthoni va Apwiya. Komave mapuro oollapellamo mafano kheyaavenyihallevo. Athu yaavirellellave ovelleella mikutho ni woosa lubani* va mapuro yaayo.

⁴⁴ Emoddattho tti yawi aapangana dda murendelle ni mwene a o Israele.

⁴⁵ Vano mitteko ddimodda ddittheddene dda Yehoshafati, masiva oonihallaaye navettho mmo awanilleeye ekhoto, ddoolembiwa mu nibukhu na epilli ya mamwene a o Yuda.

⁴⁶ Emoddattho tti yawi ahiikariha mulloko woohalla wa allopwana ooraruwa voollapellani o nipuro na mallapello ayo yaarivo enthawi ya Asa attiitthinnya.

⁴⁷ Mallapo yaayo o Edomu khewaari mwene koma enduna yuullupallive yookeratthihiwa ni mwene a o Yuda.

⁴⁸ Vano Yehoshafati aapanga esitima dduullupalli ddooyaana o Ofiri woomukusa golide. Koma esitimannddo kheddeetille ekaamba yawi ddahoonongeya o Eziyoni Gebere.

⁴⁹ Vano Ahaziya, mwaana a Ahabu aamulleella Yehoshafati wi, “Akaporwaaka oweetiha esitima yeete nimodda ni aanyu va esitima.” Koma Yehoshafati aakhoota.

⁵⁰ Vatulli viwa Yehoshafati aakhwa, avitthiwa mu mahame a makhollwaaye mu muzinda wa Davide. Nave mwanaye Yehoramu aavollowa omwene munipuroni mwaye.

Ahaziya mwene a o Israele

⁵¹ Vano Ahaziya mwaana a Ahabu aavollowa omwene wa o Israele o Samariya mu muyakha wa 17 wa omwene wa Yehoshafati a o Yuda. Nave ahaalamulella Aisraele miyakha miilli.

⁵² Olliye aheera ddoonanara vamiitthoni va Apwiya, athwara makhallello oochimwa a attiitthinnya ni amennya owaaka a Yerobowamu mwaana a Nebati oyo aachimwihalle wunchichi Aisraele.

⁵³ Ahaziya aanamurumeyella Baala ni omullapella sika aattatthamulla osha murima wa Apwiya Mulluku a Israele monga yeerelle attiitthinnya.