1 Mamwene 21 - Mawu a Mulluku

Emata yampesa ya Naboti

¹ Vaakhalla muthu mmodda a o Yezireele nnddina naye Naboti oyo aari ni emata yampesa vakhuviru ni enyumba yoomwene ya Ahabu a o Samariya.

² Nllapo nimodda Ahabu aamulleella Naboti wi, “Kinnye emataawo yampesa wi ekhalle emataaka yamatthaapa amakukhu. Munipuroni mwiwa kineerowinnya emata emodda yaphaama wunchichi apaalle wapaalla kineerowinnya makobiri va mutengo woollikana ni emateeyo.”

³ Koma Naboti aamulleella Ahabu wi, “Kinimallupella vamiitthoni va Apwiya wi nguuvahani yoohallana ya makhollwaaka.”

⁴ Vaavo Ahabu aavollowa mpa mwaye moollutuwa ni moosha murima ekaamba ya nnddo Naboti Muyezireele allotilleeye wi, “Nguuvahani yoohallana ya makhollwaaka.” Sika Ahabu aakonaatthi vabedini vaye anaweha osirini, oohipaalla naari ocha.

⁵ Koma Yezebele, mwaariye, aawa amukoha wi, “Kaambiiwa tini ekhovaanyu enooneyiiwa yoohihakallalla navettho khemunapaalla ocha?”

⁶ Ahabu aamwaakhulla wi, “Mi kaallota ni Naboti Muyezireele kimulleella wi akikullihelle emataaye ni makobiri apaalle wi kimwinnye emata emodda munipuroni mwiwa. Koma olliye aakaakhulla wi, ‘Ngiwa kiwinnyani emataaka yampesa.’ ”

⁷ Vaavo Yezebele, mwaariye aamukoha wi, “Ethiyo nyu khemuhiyo mwene a o Israele? Venyani, khaweni mwache nave murimaanyu ohakallalle. Mi kineerewukusellani emata yampeseeyo ovenyera wa Naboti Muyezireele.”

Wiiphiwa wa Naboti

⁸ Vano Yezebele ahaalemba makalata mu nnddina na Ahabu, aadinda ni echidindo ya mwene. Nave ahaarumiha wa attekweene ni oohoollella ayo yakhalla ni Naboti m'muzindaaye.

⁹ M'makalatanimmo alembillemo wi, “Llalleyani wi athu ehalle ocha nave Naboti emuhiye vawooneyella ni athu.

¹⁰ Mwaakuse athu eelli oonanara murima wi emuhumullulle ni mawu awi, ‘We woomutembellela Mulluku ni mwene.’ Vano mumukhumihe otte nave mumvokhe malluku akhwe.”

¹¹ Sika athu a mu m'muzindani mmo mwakhalla Naboti, attekweene ni oohoollella yaheera moollikana ni mmo Yezebele alamulelleeye, monga mwalembelliwe makalata aarumihalleeye.

¹² Yaallalleya wi athu ehalle ocha nave yaamuhiya Naboti vawooneyella ni arive muthu.

¹³ Athu eellaalle yaavollowa ekeraatthi moowehana ni olliye. Yaambille ni ovelleella omboni vamiitthoni va athu attheene wi, “Naboti aamutembelela Mulluku navettho mwene.” Sika athwaayo yaamukhumiha otte wa muzinda emuvokha malluku ophiyera okhwa.

¹⁴ Vatulli viwa yaarumiha mawu wa Yezebele awi, “Naboti oovokhiwa malluku nave ookhwa.”

¹⁵ Yezebele iiwalle ddawi Naboti oovokhiwa malluku nave ookhwa, aaya amulleella Ahabu wi, “Venyani, khaweni mwakuse emata yampesa elle Naboti Muyezireele uuwatteelleeyeni okulla vawi olliye khaawo.”

¹⁶ Ahabu iiwalleeye wi Naboti ookhwa, aaya mpesa o emata yampesa ya Naboti Muyezireele ayaakha.

Eliya anamulleella Ahabu dda wa nibanja naye nittheene

¹⁷ Vatulli viwa mawu a Apwiya yaawa wa Eliya Mutishibe wi,

¹⁸ “Timulla, khawe wakumane ni Ahabu mwene a o Israele oyo anakhalla o Samariya. Olliye ari o emata yampesa ya Naboti wi ayaakhe.

¹⁹ Vano wamulleelle wi Apwiya enuukoha wi, ‘Ethiyo khewiiphalle ni waakhattho?’ Wamulleellettho wi Apwiya eni ‘Vanipuroni mvo anapwa yallanddiiwa nikhame na Naboti, vaavottho eneerollanndda nikhame nawo.’ ”

²⁰ Vano Ahabu aamukoha Eliya wi, “Ethiyo we mudanaaka, wookiphwanya?” Eliya ahaakhulla wi, “Ee, kohuuphwanyani, kaambiiwa khaavo naari mmodda iikullihalle weera ddoonanara vamiitthoni va Apwiya wonanko nyuwaano.

²¹ Sika Apwiya enallota wi, ‘Kineerewuumorihella ddoonanara. Kineerotthollosa edduullu ddawo ni omoononga arive mullopwana a mu nibanja na Ahabu, kaporo apaalle oyo ahiri kaporo mu ellapo ya Israele.

²² Nave kineeronitthattusa nibanja nawo wi nikhalle wonanko nibanja na Yerobowamu mwaana a Nebati navettho wonanko nibanja na Baasha mwaana a Ahiya. Weyaanottho wookishiha murima kaambiiwa wohaachimwiha Aisraele.’

²³ Vano dda Yezebele, Apwiya eni ‘Anapwa eneeromuttakhuna muwari mwa mipanda dda Yezireele.

²⁴ Arive muthu a nibanja na Ahabu oyo anaakhwelle m'muzindani, anapwa eneeromuttakhuna nave oyo anaakhwelle ohakani epallame ddineeromucha.’ ”

²⁵ Khaarivo naari mmodda iikullihalle vaweerani ddoonanara vamiitthoni va Apwiya wonanko Ahabu oyo akopiwe ni mwaariye Yezebele.

²⁶ Olliye aheera machimo oowullihesesa muru voollapellani mafano wonanko yeerella Aamori ayo Apwiya yaaveyihalliiwamo voophiyani Aisraele.

²⁷ Ahabu iiwalle mawu yaalla, ahaahulla ddoowara ddaye, awara eziguduli. Aahalla ocha,* akona va ezigudulinnddo nave ahaamba weeta mwawiiyeviha.

²⁸ Vaavo mawu a Apwiya yaawa Eliya Mutishibe wi,

²⁹ “Ethiyo wohoona mmo Ahabu iiyevihelleeye vamiitthoni vaka? Vawi ohiiyeviha vamiitthoni vaka, ngiwa kimullaka ni ddittheddenenndde ari mukumi koma kinaallake nibanja naye mu olamulello wa mwanaye.”