1 Mamwene 20 - Mawu a Mulluku

¹ Benihadadi mwene a o Siriya aatthukumaniha milloko ddaye ddakhoto ddittheddene mookaviheriwa ni mamwene mamodda 32 ookhalla ni akavalo ni magareta. Olliye ni mamwene akhwaayaayo yaaya yaapheella muzinda wa Samariya ni wuuhella ekhoto.

² Vano Benihadadi ahaarumiha amithengaaye wa Ahabu mwene a Israele m'muzindanimmo eya yamulleella wi,

³ Benihadadi anallota wi, “Kinnye silivaawo ni golidaawo, awariyo ooreera vamodda ni anaawo.”

⁴ Ahabu mwene a o Israele ahaakhulla wi, “Moollikana ni ollota wa nyu apwiyaaka amwene, mi kiri ayiwa ni ddittheddene kiriimina.”

⁵ Vano amithengaalle yaawattho wa Ahabu waneepiilli ni mawu a Benihadadi wi, “Kahuulleella wi okirumihelle silivaawo ni golidaawo, awariyo vamoddattho ni anaawo.

⁶ Koma osiisello enthawi wonanko yeella, kineerewaarumihawo akhotwaaka wi evollowe mpa mwawo ni mwa enduna ddawo yaashaashe ni waakha ddeko ddittheddene ddinaawaaddivelle.”

⁷ Vaavo mwene Ahabu aawiithana attekweene attheene a mwiillaponimmo aalleella wi, “Vano munnoona, muthoolla anapaalla onoononga. Aakirumihella othenga wawi kimwinnye awaraka, anaaka, siliva ni golide nave miyaano ngaamuwattenlle.”

⁸ Attekweene attheene ni athu amodda yaallota wi, “Muhipwathe ddennddo apaalle omwaakhullella.”

⁹ Vano mwene Ahabu ahaalleella amithenga a Benihadadaalle wi, “Mwaalleelle apwiyaaka wi ddittheddene yallotilliiwa vawaamba wa mi oorumeyelliiwa kineeroddeera koma nndda ellotilliiwa waneepiilli ngiddeera.” Amithengaalle yaaya yamulleella Benihadadi mawaalla.

¹⁰ Benihadadi aarumihattho mawu wa Ahabu wi, “Kineeroowa ni athwaaka anchichi wi koononge muzindaawo ni owutthattusa nthupi. Milluku ddikillake kaaheera ddenndda.”

¹¹ Mwene a o Israele ahaakhulla wi, “Khawe wamulleelle wi, ‘Mullupa akhoto tti oyo aniitukhulla apambanne ekhotweeyo, ohiri ahinawane.’ ”

¹² Benihadadi ahiiwa mawu yaalla mvo awiryeeye ni mamwene akhwaaye m'misasani. Sika ahaalleella athwaaye wi, “Khozekellani ekhoto.” Nave athwaayo yakhozekella owuhella ekhoto muzindooyo.

Athu a o Israele enamugonjiha Benihadadi

¹³ Enthawi yeeyo namallotella mmodda aawa wa Ahabu, mwene a o Israele, amulleella mawu a Apwiya wi, “Ethiyo onnoona mulloko wakhotoolla? Ngoona, kineerovelleella mullokoolla m'mattani mwawo ollello vaava. Nave oneerodduwella wi mi tti Apwiya.”

¹⁴ Ahabu aakoha wi, “Ethiyo ddennddo ddineereye ni aani?” Namallotellooyo ahaakhulla wi, “Apwiya eni ddineereye ni akhoto a enduna dda mu ezigawo.” Ahabu aakohattho wi, “Vano anaambihe ekhotweeyo ttaani?” Namallotellooyo ahaakhulla wi, “We.”

¹⁵ Sika Ahabu ahaatthukumaniha akhoto a enduna dda mu ezigawo nave attheene vamodda yaarivo 232. Vatulli viwa aatthukumanihattho mulloko wa akhoto 7,000 a o Israele.

¹⁶ Aakhuma otthaana enthawi eyo Benihadadi ni mamwene 32 oomukaviheraalle yawiryiiwa ophiyera olezela m'misasani mwiwa.

¹⁷ Akhoto a enduna dda muzigawo sika yaambille oya okhotoni. Enthawi yeeyo Benihadadi ahaaruma athu wi yazonde. Alliwa yaawa emulleella wi, “Onimawa akhoto ovenyera o Samariya.”

¹⁸ Benihadadi ahaalleella oozonda wi, “Yawa ni murendelle, mwaaphare akumi. Yawa ni ekhoto, mwaaphareve akumi.”

¹⁹ Akhoto a enduna dda mu ezigawo yaambille ekhoto vamodda ni mulloko oyo waathwara.

²⁰ Arive akhoto aamwiipha muthu awaneeyena. Asiriya yaathawa nave Aisraele attheene yahaathwara koma Benihadadi mwene a o Siriya aavulluwa amuwenlle kavalo, olliye vamoddattho ni akhoto amodda oowella va akavalo.

²¹ Koma mwene a o Israele ahaathwara, aaphara akavalwaayo ni magareteene nave ahaatthollosa Asiriya.

²² Vatulli viwa namallotella aawattho wa Ahabu mwene a o Israele, amulleella wi, “Llipani, khallani wonanko mullopwana nave ganizani phaama yaweera vawi muyakha onawoolla mwene a o Siriya oneeroowattho wi awane ni nyuwaano.”

Ekhoto yaneepiilli ni Asiriya

²³ Oorumeyella a mwene a o Siriya yaamulleella mweniiwa wi, “Milluku dda Aisraele tti milluku dda m'miyaangoni, sika ekaambiiwa yaariiwa ni masiva oonigonjiha. Koma hankoni nawanena otapo vawi, ddawoona, muneerewaagonjiha.

²⁴ Vano mwaavenyihevo va olamulello mamwene mattheenaalle nave m'mapuroni mwiwa mwavollochihemo enduna.

²⁵ Nave mutthukumanihe mulloko wakhoto woophwanaphwana ni mulloko woonongeyilloolle, akavalo wonanko yaalle ni magareta wonanko yaallettho. Vatulli viwa nawanena otapo. Ddawoona, vaavo nineerewaapambana.” Sika Benihadadi ahiiwellella mawu a oorumayellaaye nave aheera ddennddo.

Aisraele enaagonjiha Asiriya waneepiilli

²⁶ Voophiyani muyakha mmodda, Benihadadi ahaatthukumaniha akhoto a o Siriya eya o muzinda wa Afeki wi yawane ni Aisraele.

²⁷ Athu a o Israele yaatthukumana nave yahaakhella ddoopaalleya, eya woowana ni Asiriya. Sika yaatthipella misasa ddiwa ddakhoto moowehana ni Asiriya nave ddooneya wonanko milloko miilli dding'onong'ono ddapuri, mvo Asiriya yaddanlliiwa echigawo ettheeneeyo.

²⁸ Muthu a Mulluku aawa wa Ahabu mwene a o Israele amulleella wi, “Apwiya enallota wi, ‘Vawi Asiriya eni Apwiya tti mulluku a miyaango ohiri a matapo, kineerovelleella mulloko muttheenoolla wa weyaano nave oneerodduwella wi mi tti Apwiya!’ ”

²⁹ Vaavo Aisraele ni Asiriya yaari ekhanlle m'misasani mallapo matthanu ni meelli. Va nllapo naneetthanu ni piilli, ekhoto yahaambeya. Aisraele yaawiipha akhoto aweeta vatthi a o Siriya 100,000 nllapo nimoddave.

³⁰ Amodda oohalla yaathawella o muzinda wa Afeki nko esiri yaamorenlliiwa athu oohalla 27,000. Benihadadi olliyettho aathawa, iipittha mu echipinda yamuwari m'muzindanimmo.

³¹ Nave oorumeyellaaye yaamulleella wi, “Ngoonani vano, nohiiwa wi mamwene a o Aisraele tti eethakaraka. Hankoni niware eziguduli muyuununi ni waapheelliha mikwe munikohini wooniha ogonja, niye wa mwene a o Israele apaalle khawiiphani.”

³² Sika yaawara eziguduli muyuununi ni waapheelliha mikwe munikohini, eya yamulleella mwene a o wi, “Oorumeyellaanyu Benihadadi anallota wi, ‘Pepaani, muhikiiphe.’ ” Ahabu ahaakoha wi, “Ethiyo ookhallave ni okumi? Olliye tti mwanamunnaka.”

³³ Vawoonani wi mawaayo tti aphaama, athwaayo yahaakhulla mwawaakuva wi, “Ddawoona, Benihadadi tti mwanamunninyu.” Sika Ahabu aallota wi, “Khaweni mwamukuse.” Vano Benihadadi aawa nave Ahabu aamuwelliha va nigareta naye.

³⁴ Benihadadi aamulleella wi, “Kineerewuuhokollosellani mizinda nnddo attiitthaaka yawaakhilliiwa attiitthaanyu. Vano nyuwaano ttuumaka enyumba ddanyu ddamalonda o Damasiko wonanko mmo yeerelliiwa attiitthaaka o Samariya.” Ahabu aamulleella wi, “Weera ddenndda, kineerewaakhullella wi oroweke.” Vano aakeraatthihana echipangano, amwaakhullella wi aroweke.

Namallotella anahumullulla Ahabu

³⁵ Mwa mawu a Apwiya mmodda mwa anamallotella aamulleella mukhwaaye wi, “Kuukuthe.” Koma olliye aakhoota omuukutha.

³⁶ Vano namallotellooyo aallota wi, “Vawi khewiiwellelle mawu a Apwiya, woona okihiyaka mukango oneerowiipha.” Sika avenyille vaavo, aakumana ni mukango, omwiipha.

³⁷ Vano namallotellooyo aamuphwanya muthu mmoddattho amulleella wi, “Kuukuthe.” Sika muthooyo aamuukutha, amuphoriiha.

³⁸ Vano namallotelloolle aavenyavo aya amutiyerella mwene va ettilla mooddiipitthiha vawiikhuneellani ni ekuwo owiitthoni.

³⁹ Mwene avireeye, namallotella aakhuwa wi, “Mi oorumeyellaanyu kaayivollowella ekhoto variyari. Nave akhoto mmodda aawa wa miyaano amukusalle mmodda a adanaahu allota wi, ‘Musunge muthoolla. Arimeella mu erive ettilla, kineerowiipha apaalle oneerollivella makobiri 3,000 a siliva.’

⁴⁰ Mvo mi oorumeyellaanyu kaphareemi mva ni mva, muthooyo aathawa.” Sika Ahabu, mwene a o Israele aamulleella wi, “Mullatwaawo onuuvaanyiha weekha, woohiihumullulla weekha.”

⁴¹ Mwawaakuva muthooyo aakhunuulla ekuwo owiitthoni nave mwene Ahabu aamuupuwella wi tti mmodda mwa anamallotella.

⁴² Vano namallotellooyo aamulleella wi, “Apwiya enallota wi, ‘Vawi woomuthawiha muthu oyo kalamunleemi wi iiphiwe, munipuroni mwaye oniiphiwe tti weyaano nave athwaawo eneerewiiphiwa munipuroni athwaaye.’ ”

⁴³ Sika Ahabu mwene a o Israele aahokollweella owaniwa o Samariya moonanariwa ni moosha murima.