1 Mamwene 2 - Mawu a Mulluku

Malangizo a Davide oomallihella wa Solomoni

¹ Davide ari vakhuviru okhwa, aamwiithana mwanaye Solomoni amulangiza wi,

² “Mi kiri vakhuviru okhwa. Sika llipa murima nave okhalle wonanko mullopwana.

³ Wiiwellelleke malangizo a Apwiya Mullukwaawo, ni weeta mu ettilla ddiwa, osungeke malembiiwa, malamulwiiwa, weeruza wiwa ni omboniiwa moollikana ni mmo ddilembelliwiiwa mu malamulo a Mose wi weereke mweezeru erive ello. Mwawi ddiidda oneerekopambana nave ddineerekoweetella phaama orive weko onaayeekeewe.

⁴ Sika Apwiya eneerokwakhwanihella nnddo yallotilliiwa dda miyaano wi, ‘Anaawo yasunga phaama ettilla ddiwa ni weeta vamiitthoni vaka moororomelleya ni murimiiwa muttheene ni okumiiwa muttheene, khaviwa virama edduullu va mpando woomwene wa Israele.’ ”

⁵ Onnadduwella eyo Yowabu mwaana a Zeruya akeerelleeye voowiiphani Abinere mwaana a Neri ni Amasa mwaana a Yetere, akhoto uullupalli eelli a o Israele. Onnuupuwella wi aamoriha nikhame niwa enthawi ya murendelle wi ahokolloselle ddoonanara yeerilliiwa enthawi yakhoto. Aamorihella nikhame niwa va laambaaye ni va esapato ddaye.

⁶ Vano weere moollikana ni ezeru ddawo koma ohimuhiye wi akhwe mwamurendelle uulluvallille.

⁷ “Koma oweerelle echifundo anamwani a Barizilai a o Giliyadi nave owaakhullelle wi alliwattho echeke ni weyaano vawi yaakeerella echifundo kikumannena kamuthaweemi mwanamunno Abishalomu.

⁸ “Vookhallattho Shimei edduullu ya Gera, Mubenjamini a o Bahurimu oyo akitembelenle ni tembelelo nuullupalli kayeemi o Mahanaimu. Koma awiilleeye wi nikumane va muhinje wa Yordani, kaallupella vamiitthoni va Apwiya wi, ‘We ngiwiipha.’

⁹ Vano ohimweese oohilakwa. Vawi weyaano tti muthu eezeru nave onnadduwella eyo onaphwanelleewe omweerella. Naari olliye uulluvallille anaphwanella iiphiwe.”

Okhwa wa Davide

¹⁰ Vano Davide aakhwa aavitthiwa mu muzinda wa Davide.

¹¹ Davide aakhalla mwene a Israele wa miyakha 40. Alamulalle mu Hebroni wa miyakha mitthanu ni miilli nave miyakha 33 mu Yerusalemu.

¹² Sika Solomoni aakeraatthi va mpando wa omwene wa Davide attiitthinnya nave omwenaaye waakeraatthihiwa moollipa.

Okhwa wa Adoniya

¹³ Nllapo nimodda Adoniya mwaana a Hagiti aawa wa Batesheba, amennya a Solomoni. Nave Batesheba aamukoha wi, “Ethiyo oweelle murendelle?” Ahaakhulla wi, “Ee, tti murendelle”

¹⁴ Nave Adoniya aallota wi, “Koma kookhalla ni mawu ni nyuwaano.” Batesheba aallota wi, “Llotattho.”

¹⁵ Vano Adoniya aallota wi, “Munnadduwella wi omwene yoolla waari waaka nave arive muthu mu Israele aakaakhullella wi kilamulelle. Koma ddeko ddoosintha vawi Apwiya aamuvaha omwenoolla mwanamunnaka moollikana ni opaalla wiwa.

¹⁶ Nave kinaaka kuuvekeni ello emodda, sika muhikiwatteelle.” Batesheba ahaakhulla wi, “Llota.”

¹⁷ Nave aallota wi, “Mumuveke mwene Solomoni akivahe Abishagi Mushunamu wi akhalle mwaaraka. Kinnadduwella wi mwene khakhoota.”

¹⁸ Batesheba ahaakhulla wi, “Ddawoona, kineerollota munipuroni mwawo wa mwene.”

¹⁹ Sika Batesheba aaya wa mwene Solomoni wi allotena munipuroni mwa Adoniya. Mwenooyo ahiimella wi akumanena nave aamukokhorella. Solomoni aakeraatthi va mpandwaaye woomwene nave mpando mmodda waavollochihiwa wi amennyaayo ekeraatthelle. Sika yaakeraatthi onnattanatta waye.

²⁰ Vano Batesheba aallota wi, “Kuuvekeni ello emodda eng'onong'ono, muhikiwatteelle.” Nave mwenooyo aallota wi, “Vekani munapaalleenyu, amoowaaka vawi nguuwatteellani.”

²¹ Amennyaayo yahaakhulla wi, “Mwaakhullelle wi mwanamunninyu Adoniya avahiwe Abishagi Mushunamu wi akhalle mwaariye.”

²² Mwene Solomoni aawaakhulla amennyaayo wi, “Munavekella tini wi Abishagi Mushunamu akhalle aaye a Adoniya? Vekanittho ni omweneene vawi olliye tti mwanamunnaka muullupalli nave anniiwanana ni mullupa mukutho Abiyatara ni Yowabu mwaana a Zeruya.”

²³ Vano mwene Solomoni aallupella vamiitthoni va Apwiya wi, “Mulluku akillake mwawoopiha Adoniya aahiiphiwa ekaamba ya yeella.

²⁴ Apwiya a okumi aakikeraatthiha va mpando woomwene wa attiitthaaka Davide. Navettho aakwakhwaniha echipanganwiiwa wi mamwene a o Israele enaavenyereke mu nibanja naka. Ddawoona, kinallupella vamiitthoni va Apwiya wi Adoniya iiphiwe ollello vaava.”

²⁵ Sika mwene Solomoni aamurumiha Benaya mwaana a Yehoyada nave aamuukutha Adoniya akhwa.

²⁶ Vano mwene aamulleella mullupa mukutho Abiyatara wi, “Khawe owaninyu o Anatoti vawi onaphwanella okhwa. Koma ngiwiipha veneva kaambiiwa waatukhulla nibokosi na echipangano na Apwiya Mulluku waariiwe ni attiitthaaka Davide navettho wi waahoowa nimodda ni attiitthaaka.”

²⁷ Sika Solomoni aamuvenyihavo Abiyatara va mutteko wa mullupa mukutho. Nndda ddaakwakhwanihella mawu a Apwiya ayo yallotilliiwa dda nibanja na Eli a o Shilo.

²⁸ Yowabu iiwalleeye wi Adoniya ohiiphiwa aathawella o musasa wa Apwiya aphara manyaka a nikuwa. Yowabu tti olle amukavihera Adoniya ohiri Abishalomu.

²⁹ Mwene Solomoni iiwalleeye wi Yowabu oothawella o musasa wa Apwiya nave ari vakhwipi va nikuwa na mukutho, aamuruma Benaya mwaana a Yehoyada wi, “Khawe wamwiiphe.”

³⁰ Sika Benaya aaya o musasa wa Apwiya amulleella Yowabu wi, “Mwene olamula wi okhumemo.” Koma Yowabu ahaakhulla wi, “Iyaayi, kinaakhwelle vaava.” Benaya aahokollweella wa Solomoni amulleella nnddo Yowabu allotilleeye.

³¹ Mwene ahaakhulla wi, “Weere moollikana ni mmo allotilleeye, omwiiphe nave omuvitthe. Sika mi ni edduullu ddaka khanikhalla ni mullatu wa nikhame noohichimwa nno namorihiwe ni Yowabu.

³² Apwiya eneeromullaka Yowabu kaambiiwa aawiipha ni nsupada athu eelli eechilungamo omukhwaranya olliye, attiitthaaka Davide ehidduwellaka. Athwaayo yaari Abinere mwaana a Nere oyo aari akhoto muullupalli a o Israele ni Amasa mwaana a Yetere akhoto muullupalli a o Yuda.

³³ Sika vano nikhame nineeromorella va Yowabu ni va edduullu ddaye wa enthawi yoohimalla. Koma murendelle wa Apwiya okhalle va Davide ni edduullu ddaye ni va mpandwaaye woomwene wa enthawi yoohimalla.”

³⁴ Sika Benaya mwaana a Yehoyada aaya amwiipha Yowabu. Nave aavitthiwa owaniwa mu echipululu.

³⁵ Vano mwene aamuhiya Benaya mwaana a Yehoyada va odindo wa akhoto muullupalli munipuroni mwa Yowabu nave aamuhiya mullupa mukutho Zadoki munipuroni mwa Abiyatara.

³⁶ Vano mwene ahaaruma athu wi yamwiithane Shimei nave aamulleella wi, “Omake enyumbaawo mu Yerusalemu mwemmu wi okhallekemo nave ohiwe okhumamo m'muzindanimmu.

³⁷ Va nllapo nno onaakhumeewemo ni ollapuwa ntapo na Kidroni, odduwelle moohikayikella wi oneerokhwa. Nave nikhame nawo ninaakhalle vamuru vawo.”

³⁸ Vano Shimei aamulleella mwene wi, “Munalloteenyunnddo tti ddaphaama. Mi oorumeyellaanyu, kineereweera mullotilleenyu.” Sika aakhalla mu Yerusalemu enthawi yoorekama.

³⁹ Koma viviralle miyakha miraru, akaporo eelli a Shimei yaathawella wa Akishi mwaana a Maaka mwene a o Gati. Nave Shimei iiwalle wi akaporwaaye eri o Gati,

⁴⁰ aamuwella bulwaaye aya wa Akishi o Gati wi awaashaashe akaporwaaye. Ahaaphwanya nave ahaahokollosella owaniwa.

⁴¹ Vano Solomoni iiwalle wi Shimei aaya o Gati nave owaawo,

⁴² aamwiithaniha amukoha wi, “Ethiyo khewaallupenlle vamiitthoni va Apwiya wi va nllapo onaakhumeewe mu Yerusalemu oya waamodda oneerokhwa? Nave waallota wi, ‘Munalloteenyunndda tti ddaphaama, kineerewiiwellella.’

⁴³ Kaambiiwa tini ohisungalleewe nnddo wallupenlleewe wa Apwiya ni ohiiwellella nnddo kuulamunleemi?”

⁴⁴ Mwene aamulleellattho Shimei wi, “Onnadduwella m'murimani mwawo ddeko ddittheddene ddoonanara waweerelleewe attiitthaaka Davide. Sika Apwiya eneerewuuhokollosella ddoonanara ddawo vamuruni vawo.

⁴⁵ Koma Apwiya eneerokidalisa mi Solomoni ni mpando woomwene wa Davide oneerokeraatthihiwa o enthawi yoohimalla.”

⁴⁶ Vano mwene aamulamula Benaya mwaana a Yehoyada nave aaya amwiipha Shimei. Sika omwene waakeraattheya m'mattani mwa Solomoni.