1 Mamwene 19 - Mawu a Mulluku

Eliya anathawella o Sinai

¹ Ahabu aamulleella Yezebele ddittheddene Eliya eerilleeye owaakattho mmo awiiphelleeye anamallotella attheene a Baala ni nsupada.

² Vano Yezebele aamurumiha amithenga wa Eliya wi amulleelle wi, “Milluku ddikillake naari okiipha wene, kaahiwiipha weyaano osiisello enthawi wonanko ella moollikana ni mmo wawiiphelleewe anamallotellaayo.”

³ Sika Eliya ahoova nave aathawa wi avulluse okumaaye. Aaphiya o Beeresheba, muzinda wa o Yuda, amuhiya oomurumeyellaaye wenko.

⁴ Koma Eliya aheeta olendo wa nllapo nimodda mu echipululu aya akeraatthi vatthi va mwanamuteekho. Vano aaveka wi akhwe, allota wi, “Ddookikwakhwana! Nyu Apwiya, waaweerokhalla phaama kakhwilleke vawi miyaano khe aphaama waakhwaranya makhollwaaka.”

⁵ Nave aakonaatthi vatthi va muteekhooyo. Moorurumusa mungelo aamuttannya amulleella wi, “Venya oche.”

⁶ Eliya akhunuullalle miittho, ahoona wi omuruni waye wookhalla buledi awoosa vamankhallani ni muno wa maaddi. Aacha, awirya nave akonaatthittho.

⁷ Mungelo a Apwiya aawattho waneepiilli, amuttannya, amulleella wi, “Venya, oche woova wi khowora weeta olendoolla.”

⁸ Eliya aavenya, acha ni owirya mwawi aakhalla ni masiva aweetella. Aheeta mallapo 40 otthaana ni mahiiyu aphiya o Horebu, mwaango wa Mulluku.

⁹ Wenko aphiyenre munikhunguni, akona mwemmo. Vano mawu a Apwiya yaamuweella wi, “We Eliya, oneerawo tini wuno?”

¹⁰ Eliya ahaakhulla wi, “Nyu Apwiya Mulluku Amasiva Mattheene, miyaano kohuurumeyellani nyeeneve enthawi ettheene. Koma Aisraele attheene aatathilla echipangano yaakeraatthihalliiwa ni nyuwaano nave aakumulla makuwaanyu ni owiipha anamallotellaanyu ni nsupada mwawi kihanlle meekha. Vano enaashaashattho okumaaka wi ekiiphe.”

¹¹ Vaavo Apwiya yahaakhulla wi, “Khuma wiimelle vamiitthoni vaka, vamwaangoni.” Ngoonani, Apwiya yaaviravo nave ephevo yamasiva yahoopa etthalla miyaango ni opwesa malluku koma Apwiya kheyaarimo mwiiphevonimmo. Eviralle ephevo, vaamora echivomezi koma Apwiya kheyaarimottho mu echivomezimmo.

¹² Eviralle echivomerezi, vaamora munllo koma Apwiya kheyaarimo m'munllonimmo. Oviralle munllo, vahoopa ephevo yoomaalleya.

¹³ Eliya iiwalleeye, aakhuneella ekhovaaye ni mukanjwaaye nave aakhuma aya iimella va mullako va nikhungu. Vaavo mawu yaawa wa olliye wi, “We Eliya, oneerawo tini wuno?”

¹⁴ Olliye aallota wi, “Nyu Apwiya Mulluku Amasiva Mattheene, miyaano kohuurumeyellani nyeeneve enthawi ettheene. Koma Aisraele attheene aatathilla echipangano yaakeraatthihalliiwa ni nyuwaano nave aakumulla makuwaanyu ni owiipha anamallotellaanyu ni nsupada mwawi kihanlle meekha. Vano enaashaashattho okumaaka wi ekiiphe.”

¹⁵ Vaavo Apwiya yaamulleella wi, “Hokollowa, thwara ettilla ya o echipululu ya o Damasiko. Waphiya wenko, wamuzoze Hazaele wi akhalle mwene a o Siriya.

¹⁶ Wamuzoze Yehu mwaana a Nimishi wi akhalle mwene a o Israele. Nave wamuzozettho Elisha mwaana a Shafati a o Abele Mehola wi akhalle namallotella oovollowa munipuroni mwawo.

¹⁷ Vano oyo anaavulluwe o nsupada na Hazaele, Yehu aneeromwiipha. Oyo anaavulluwe o nsupada na Yehu, Elisha aneeromwiipha.

¹⁸ Komave o Israele kohaahiyawo athu 7,000 ayo ehinamukokhorella Baala apaalle opsopsona mafanwaaye.”

Wiithaniwa wa Elisha

¹⁹ Eliya avenyille wenko, amuphwanyille Elisha mwaana a Shafati allimaka ni eng'ombe piillipiilli nirive nigoli* nave vaari magoli khumi ni meelli nave olliye allima ni nigoli nookomihera. Eliya aaphiya vaari olliye amuvokhella mukanjwaaye.

²⁰ Vaavo Elisha aahiya eng'ombe ddayennddo amuthamakella Eliya, amuveka wi, “Mukaakhullelle wi kaallaanye attiitthaaka ni amoowaaka nave vatulli viwa kuuthwareni.” Eliya aamwaakhulla wi, “Khawe, apaalle kohuuhiiha?”

²¹ Vano Elisha aahiya omuthwara, aahokollowa. Aakusa eng'ombe ddaye piilli addiipha. Sika magolaayo aviddeellellana munllo wawaapeyella enameeyo nave ahaavaha athu wi eche. Vatulli viwa aatimulla, anamuthwara Eliya monga oomurumeyellaaye.