1 Mamwene 18 - Mawu a Mulluku

Eliya ni Obadiya

¹ Viviralle mallapo manchichi, muyakha waneeraru wa ettalla, mawu a Apwiya yaawa wa Eliya wi, “Khawe waddoonihelle wa Ahabu. Kineeromurupiha murimu va ellapo yavatthi.”

² Sika Eliya aatimulla addoonihella wa Ahabu. Enthawi yeeyo ettalla yaari ekatamihalle o Samariya.

³ Mwene Ahabu aamwiithana Obadiya, oyo awehera ddittheddene dda o enyumba yoomwene navettho aari oowoova wunchichi Apwiya.

⁴ Nave mvo Yezebele awiiphaaye anamallotella a Apwiya, Obadiya aawiipitthiha anamallotella 100, 50 mu nikhungunna nave 50 mu nikhungunna aanaavaha yoocha ni maaddi wenko.

⁵ Sika Ahabu aamulleella Obadiya wi, “Khawe weetelle ellapo ettheene, wawoone aneetuutu attheene ni matapo mattheene, mwaamodda ttuuphwanyawo munyepu woochihella akavalo ni enyuru* wi ekhalle ni okumi.”

⁶ Sika Ahabu ni Obadiya yaakawana ellapweeyo wi eyeetelle. Ahabu ayiille o embali emodda, Obadiya aayattho o embali emodda.

⁷ Voolendwaaye Obadiya aakumana ni namallotella Eliya. Obadiya aamudduwella nave aamukokhorella allota wi, “Ethiyo tti nyu apwiyaaka Eliya?”

⁸ Eliya aamwaakhulla wi, “Ee, tti miyaano. Khawe waalleelle apwiyaawo wi Eliya oowa.”

⁹ Obadiya aamukoha Eliya wi, “Ethiyo kilakwille tini wi mukihiye mi oorumeyellaanyu m'mattani mwa Ahabu wi akiiphe?

¹⁰ Kinimallupella vamiitthoni va Apwiya Mullukwaanyu ookumi wi khawiiwo mutundu apaalle omwene nko apwiyaaka Ahabu yahaarumalliiwawo athu oowaashaashani. Athu yaalleella wi, ‘Eliya khaawo wuno,’ Ahabu aanaallupelliha wi esimikizelle wi nyuwaano khamwaariwo wenko.

¹¹ ‘Ethiyo vano munallota wi kaalleelle apwiyaaka wi muri wuno?’

¹² Apaalle mi kavenyavo mva, munepa a Apwiya ttuuwuuvenyihanivoni oya nko kihinadduwelleemiwo. Vano kaya kamulleella Ahabu, olliye aahuuphwanyanivoni aneerokiipha naari mi oorumeyellaanyu kiwoovaka Apwiya waambeella enamwanaaka.

¹³ Ethiyo nyu apwiyaaka khemwiiwalle wi enthawi eyo Yezebele awiipheeye anamallotella a Apwiya kaawiipitthiha anamallotella 100, anamallotella 50 mu nirive nikhungu nave kaanaavaha yoocha ni maaddi oowirya wenko?

¹⁴ Sika nyu munallota wi, ‘Khawe waalleelle apwiyaawo wi, Ngoonani, Eliya oowa? Olliye aneerokiipha!’ ”

¹⁵ Eliya ahaakhulla wi, “Kinimallupella vamiitthoni va Apwiya Amasiva Mattheene ayo kinaarumeyelleemi wi ollello vaava kineeroddoonihella vamiitthoni va mwene.”

¹⁶ Sika Obadiya aaya wa mwene Ahabu amulleella dda Eliya. Nave Ahabu aaya akumanana Eliya.

Eliya ni Ahabu

¹⁷ Sika Ahabu amoonilleeye Eliya aallota wi, “We oomuhoosa Israele, ethiyo woophiya?”

¹⁸ Eliya ahaakhulla wi, “Mi nginamuhoosekevo Israele. Koma nyuwaano ni nibanja na attiitthaanyu sika mukhanlle mwaahoosaka Aisraele attheene kaambiiwa mwaahiya malamulo a Apwiya ni othwara malamulo a Abaala.

¹⁹ Sika vano rumihani othenga wi mwaatthukumanihe Aisraele wi kakumanena va mwaango wa Karimele. Muweena anamallotella a Baala 450 ni anamallotella 400 a Asherimu ayo enacha wa Yezebele.”

Eliya ni anamallotella a Baala.

²⁰ Sika Ahabu ahaatthukumaniha Aisraele attheene ni anamallotella a Baala omwaangoni wa Karimele.

²¹ Eliya ahaatamella vakhuviru ni athu attheenaayo aakoha wi, “Ethiyo munaakayikeke ophiyera niini? Apwiya yaarimi eri Mulluku, athwareni. Koma Baala aarimi ari Mulluku, muthwareni olliye.” Athwaayo kheyaamwaakhunlle naari vang'ono.

²² Vano Eliya ahaalleella athwaalle wi, “Kihanlle meekha mwa anamallotella a Apwiya koma anamallotella a Baala erivo 450.

²³ Wannani anankhoro a eng'ombe eelli nave muwaakhullelle anamallotella a Baala emutthoollevo mmodda. Emuphadde enthuli enthuli ni oddihiya va ekhuni koma muhikharihevo munllo. Miyaanottho kineereweera emoddamoddave yeeyo ni nankhoro mmoddooyo.

²⁴ Muvekelle mookhuwa nnddina na mullukwaanyu miyaanottho kineerovekella mookhuwa nnddina na Apwiya. Sika Mulluku oyo anaakhulle voorumihani munllo, yooyo sika Mulluku.” Vaavo athu attheenaayo yahaakhulla wi, “Vaavo moollota phaama.”

²⁵ Nave Eliya ahaalleella anamallotella a Baala wi, “Ambani vawi murivo anchichi. Mutthoolleni nankhoro a eng'ombe mmodda, mumwiiphe. Vekellani mookhuwa mu nnddina na mullukwaanyu koma muhikharihe munllo.”

²⁶ Alliwa yaamukusa nankhoro oyo yavahiwiiwa, emwiipha. Vano yaavekella mu nnddina na Baala mookhuwa, ovenyera ohinase ophiyera otthaana voollotani wi, “Nyu Baala, naakhulleni.” Anamallotella a Baalaayo yaaniina waapheella nikuwa nno yamakilliiwa koma khaarivo awaakhullalle.

²⁷ Vano otthaana Eliya ahaamba waattheya. Ahaalleella wi, “Khuwani wunchichi, keesa valle munallota wi olliyooyo tti mulluku! Apaallethi ohaatelliwa apaalle ari wowiimellella apaalle ari voolendoni apaalle animakona sika khaweni mwamuvenyihe.”

²⁸ Sika anamallotella a Baalaayo yaakhuwa wunchichi, yiiremarema ni masupada ni mipeni moollikana ni ehuddihiiwa ophiyera nikhame okhuma m'makhwatanaayo.

²⁹ Otthaana otthewene yaanakhuwa moosavuwa ophiyera enthawi yoovelleella mukutho yaakwakhwana. Komave waari ellapo tuu, khewaari mawu, khaarivo awaakhulla apaalle mmodda oopwatha.

³⁰ Vaavo Eliya ahaalleella athu attheenaalle wi, “Kaatamelleni.” Athu attheenaayo yaamwaatamella. Vano Eliya aapotokosa nikuwa na Apwiya nno naari nikumulliwe.

³¹ Aakusa malluku khumi ni meelli moollikana ni waata wa malloko a anamwani a Yakobo oyo Apwiya yamuromonlliiwa wi Israele.

³² Mallukwaayo aamakella nikuwa nowaallapellavo Apwiya. Vano aakata engalande waapheella nikuwanno. Wunnuwa wa engalandeeyo waari wonanko moovollowa mino misese dda maaddi.

³³ Eliya aatthatta ekhuninndde munipuroni mwiwa, aphadda eng'ombeelle enthuli enthuli addihiya va ekhunimvo. Vatulli viwa ahaalleella athwaalle wi, “Ddarihani mino misese ni maaddi, mwaahelle va enama yamukuthweeyo ni va ekhuninnddo.”

³⁴ Nave ahaalleella wi, “Akullellanittho.” Athwaalle yaahellattho maaddaayo waneepiilli. Ahaalleella wi, “Hellanittho waneeraru.” Yaheerattho ddiiddo waneeraru.

³⁵ Maaddaayo yaheetellella waapheella nikuwanno, eddalla engalande ettheene.

³⁶ Ekwakhwanne enthawaaye yoovelleella mukutho, namallotella Eliya aasusella vakhuviru ni nikuwanno avekella wi, “Nyu Apwiya Mulluku a Abrahamu, Isaki ni Yakobo, ollello ddidduwanyeye wi nyu sika Mulluku mu ellapo ya Israele navettho wi mi tti oorumeyellaanyu ni wi kineera ddittheddenendda kaambiiwa mullotille tti nyuwaano.

³⁷ Kaakhulleni, nyu Apwiya, kaakhulleni wi athwaalla edduwelle wi nyu Apwiya muri Mulluku nave wi erukunuwe murima.”

³⁸ Vaavo munllo wa Apwiya waamora oshellelliha mukuthooyo, ekhuni, malluku ni ethayeene. Munllooyo waawelleelliha maaddi ayo yaari mu engalandaalle.

³⁹ Vano athu attheene yoonille ddennddo yaamoriha ekhove ddiwa vatthi ellota mookhuwa wi, “Apwiya sika Mulluku! Apwiya sika Mulluku!”

⁴⁰ Vaavo Eliya aalamula wi, “Aphareni anamallotella attheene a Baala. Ahithawe naari mmodda.” Sika yahaaphara attheenaayo nave Eliya aakitthellana o muhinje wa Kishoni, awiiphella wenko.

Omalla wa ettalla

⁴¹ Vatulli wiwa Eliya aamulleella Ahabu wi, “Khaweni mwache ni owirya vawi onniiweya ogugudeya wa murimu.”

⁴² Vano Ahabu aaya acha ni owirya. Koma Eliya aawella vaddullu va mwaango wa Karimele nave awaramella vatthi ahiya murwaaye variyari va makutthaaye.

⁴³ Vano aamulleella oomurumeyellaaye wi, “Khawe wawehe o enyanja.” Oorumeyellooyo aaya aweha nave aallota wi, “Khewuri ello.” Eliya aamulleella otthanu ni opiilli.

⁴⁴ Oorumeyellooyo ayiille waneetthanu ni piilli aallota wi, “Vookhalla mwanamurapo wawooneya wonanko nnatta na muthu, onnakhuma o enyanja.” Vaavo Eliya aallota wi, “Khawe wamulleelle Ahabu wi, ‘Kusani magaretaanyu muroweke vawi murimu ttuuwuuthiyellellani.’ ”

⁴⁵ Mwawaakuva oddullu waaripa ni mirapo, ephevo yahoopa nave murimu munchichi aarupa. Ahabu aawella nigareta aya o Yezireele.

⁴⁶ Masiva a Apwiya yaari ni Eliya. Olliye aamakella ddoowara ddaye muyuununi athamaka mwawaakuva amuvirellella Ahabu, akhalla awaamba ophiya o Yezireele.