1 Mamwene 17 - Mawu a Mulluku

¹ Namallotella Eliya Mutishibe a o Giliyadi aamulleella Ahabu wi, “Kinimallupella vamiitthoni va Apwiya Mulluku a Israele oyo kinamurumeyelleemi wi khavikhalla nikame naari murimu miyakha ddenndda ophiyera killotille.”

² Nave Apwiya yaamulleella Eliya wi,

³ “Venyawo wuno, oye wookhuma nndduwa wiipitthe vakhuviru ni muhinje wa Keriti, wookhuma nndduwa wa Yordani.

⁴ Wawiryeke m'muhinjenimmo nave kohaalamula anakhuku wi yuuchiheke wenko.

⁵ Nave Eliya aheera moollikana ni mawu a Apwiya. Aaya akhalla mukhwipi mwa muhinje wa Keriti wookhuma nndduwa wa Yordani.

⁶ Nave anakhuku yaanamuvaha buledi ni enama ohinase ni misikuwa. Nave aanawirya maaddi m'muhinjenimmo.

⁷ Vihinallekelle, muhinjoolle waawelleella kaambiiwa murimu khaarupalle mwiillaponimmo.”

Eliya ni naamukhwelle a o Zarefati

⁸ Vano mawu a Apwiya yaawa wa Eliya wi,

⁹ “Timulla oye o Zarefati, muzinda wa o Sidoni, wakhalle wenko. Koomulamula naamukhwelle a wenko wi uuvaheke yoocha.”

¹⁰ Nave Eliya aatimulla aya o Zarefati. Aphiyalle va mullako wa m'muzindanimmo aamoona naamukhwelle atotaka ekhuni. Aamwiithana amulleella wi, “Kivaheni maaddi vang'ono kiwirye.”

¹¹ Vano ayeeye woorika maaddi, Eliya aamwiithanattho amulleella wi, “Mukivahettho mwanabuledi.”

¹² Vaavo mutthiyanooyo ahaakhulla wi, “Kinimallupella vamiitthoni va Apwiya Mullukwaanyu, miyaano ngaapeyille erive ello koma kookhalla ni othu vang'ono mwiipalleni owaakattho makhura vang'ono munibotoloni. Kinatota ekhuni piilli wi kaddaapeyelle meekha ni mwanaka niche nave nikhwe.”

¹³ Koma Eliya aamulleella wi, “Muhoove, khaweni mweere moollikana ni mmo mullotelleenyu. Koma vawaamba vahullani othu vang'ono mukaapeyelle mwanabuledi muweena. Vatulli viwa mwamwaapeyettho mmodda wi muche nyuwaano ni mwaninyu.

¹⁴ Apwiya Mulluku a Israele enallota wi, ‘Othu ori mwiipallinooyo khowa omalla, makhura eri munibotolonaayo khemallattho ophiyera nllapo nno Apwiya enaamurupihiiwa murimu va ellapo yavatthi.’ ”

¹⁵ Vano aheera moollikana ni mmo allotelle Eliya nave attheenaayo vamoddattho ni a va nibanja naye yaakhalla ni yoocha mallapo manchichi.

¹⁶ Othu waari mwiipallinooyo khawaamanlle, makhura yaari munibotolonaayo kheyaamanllettho moollikana ni mmo yallotelle Apwiya oweella mwa Eliya.

¹⁷ Nllapo nimodda, mwaana aamullopwana anaamukhwellooyo aavoriiwa. Ereta yunnuwalle mwaanooyo aakhwa.

¹⁸ Naamukhwellooyo aamukoha Eliya wi, “Nyu muthu a Mulluku, ethiyo kuulakwelleni tini? Ethiyo muwiille wa miyaano wi mumuupuse Mulluku machimwaaka ni okiiphella mwanaka?”

¹⁹ Eliya aamulleella wi, “Kinnyeni mwaanooyo.” Sika Eliya aamukusa mwaanooyo ovenyera m'mattani mwaye ayaana o echipinda yavaddullu nko akoneeye nave aamukonaatthiha vabedini vaye.

²⁰ Nave aavekella mookhuwa wa Apwiya wi, “Nyu Apwiya Mullukwaaka, kaambiiwa tini mumweerelleenyu yoonanara yeella naamukhwelle oyo anakipwatha voomwiiphellani mwanaye?”

²¹ Vano Eliya aamukhupaarella mwaanooyo oraru nave aavekella mookhuwa wi, “Nyu Apwiya Mullukwaaka, muhokolloselleni mwaanoolla okumaaye.”

²² Apwiya yaamwiiwa Eliya nave okumi wa mwaanooyo waahokollweellamo ahihimuwa.

²³ Eliya aamukusa mwaanooyo akitthana ovenyera o echipinda yavaddullu nave aamuvelleella wa amennya aalleella wi, “Ngoonani, mwaninyu ookhalla ni okumi.”

²⁴ Nave mutthiyanoolle aamwaakhulla Eliya wi, “Vano kinnadduwella wi nyuwaano tti muthu a Mulluku navettho wi Apwiya ennallota oweella mwa nyuwaano.”