1 Mamwene 16 - Mawu a Mulluku

¹ Mawu a Apwiya yaawa wa namallotella Yehu mwaana a Hanani, oomuhumullulla Baasha wi,

² “Kahuuwelliha ni oweeriha wi waahoollelleke athwaaka Aisraele. Koma vano woochimwa wonanko Yerobowamu nave wohaachimwiha athwaaka Aisraele wawi aallika osha murima ni machimwiiwa.

³ Ngoona, kineeromoononga Baasha ni nibanja naye nittheene wonanko mmo keerelleemi ni nibanja na Yerobowamu mwaana a Nebati.

⁴ Arive muthu a mu nibanja na Yerobowamu oyo anaakhwelle m'muzindani, aneerottakhuniwa ni anapwa. Nave arive muthu a o Baasha oyo anaakhwelle muhakani, aneerochiwa ni epallame.”

⁵ Mitteko ddimodda dda Baasha owaaka ddittheddene dda masiva eerilleeye ddoolembiwa mu nibukhu na epilli ya mamwene a o Israele.

⁶ Baasha aakhwa, avitthiwa o Tiriza. Nave mwanaye Ela aavollowa munipuroni mwaye.

⁷ Baasha ahinakhwe mawu a Apwiya yaawa wa namallotella Yehu mwaana a Hanani mwiipa mullatu olliye ni nibanja naye ekaamba ya machimo eerilleeye vamiitthoni va Apwiya, machimo oophwanaphwana ni athu a nibanja na Yerobowamu ayo allikalleeyena osha murima wa Apwiya navettho ekaamba yawi aatthollosa nibanja nittheene na Yerobowamu.

Ela mwene a o Israele

⁸ Muyakha wa 26 wa omwene wa Asa a o Yuda, Ela mwaana a Baasha aavollowa omwene wa o Israele o Tiriza nave aalamulella miyakha miilli.

⁹ Zimuri mmodda mwa oorumeyellaaye, muullupalli hafu a magaretaaye aamweerella echiwembu. Ela aari o Tiriza awiryaka ophiyera olezela mu enyumba yoomwene ya Ariza oyo awehera enyumba yoomwene o Tirizanko.

¹⁰ Zimuri aavollowa amwiipha Ela. Nndda ddeereyille muyakha wa 27 wa omwene wa Asa a o Yuda. Vano Zimuri aavollowa omwene munipuroni mwa Ela.

¹¹ Nave Zimuri aambilleeye olamulella, aawiipha athu attheene a nibanja na Baasha, oohimuhiya naari mullopwana mmodda a abalaaye ni akhwaaye.

¹² Sika Zimuri aawiipha athu attheene a nibanja na Baasha moollikana ni mmo yallotelle Apwiya oweella mwa namallotella Yehu,

¹³ ekaamba ya machimo a Baasha ni mwanaye Ela ayo yachimwalliiwa. Yahaachimwiha athu a o Israele, ettatthamulla osha murima wa Apwiya Mulluku a Israele ni mafanwiiwa

¹⁴ Mitteko ddimodda dda Ela ni ddittheddene eerilleeye ddoolembiwa mu nibukhu na epilli ya mamwene a o Israele.

Zimuri mwene a o Israele

¹⁵ Muyakha wa 27 wa omwene wa Asa a o Yuda, Zimuri aavollowa omwene wa o Israele o Tiriza koma alamulelle mallapo matthanu ni meelli. Enthawi yeeyo milloko ddakhoto dda Aisraele ddaari ddaapheelle Gibetoni muzinda wa Afilisti.

¹⁶ Koma akhotwaayo yiiwalliiwa wi Zimuri oheera echiwembu voomwiiphani mwene, nllapo nenno omisasaninko athu yaamutthoolla Omuri, akhoto muullupalli wi akhalle mwene a o Israele.

¹⁷ Vano Omuri vamodda ni Aisraele attheene yaavenyawo o Gibetoni eya yaapheella muzinda wa Tiriza.

¹⁸ Zimuri oonilleeye wi muzinda wohaakhiwa aathawella onttatthani na muwari mwa enyumba yoomwene. Aayihella munllo enyumbeeyo akhwella mwemmo.

¹⁹ Akhwille mwawi ddiidda kaambiiwa aheera ddoonanara vamiitthoni va Apwiya wonanko Yerobowamu nave aanaachimwiha Aisraele.

²⁰ Vano ddoonanara ddittheddene ni echiwembu Zimuri eerilleeye ddoolembiwa mu nibukhu na epilli ya mamwene a o Israele.

Mwene Omuri a o Israele

²¹ Nave Israele aakawaneya variyari, athu amodda yamuthwanre Tibini mwaana a Ginati wi emuvollochihe omwene nave amodda yamuthwanre Omuri.

²² Koma athu oomuthwara Omuri yahaagonjiha oomuthwara Tibini, mwaana a Ginati. Nave Tibini aakhwa, Omuri avollowa omwene.

²³ Muyakha wa 31 wa omwene wa Asa a o Yuda, Omuri aavollowa omwene wa ellapo ya Israele nave aalamulella wa miyakha khumi ni miilli. Aalamulelle o Tirizanko wa miyakha mitthanu ni mmodda.

²⁴ Olliye aakulla mwaango wa Samariya ovenyera wa Shemeri ni makobiri 6,000 asiliva. Nave yaamakavo muzinda owaaka mpanda woollipihana mwaangooyo. Muzindooyo yawuromonlle wi Samariya, okusella nnddina na Shemeri, mwaneena a mwaangooyo.

²⁵ Koma Omuri aheera ddoonanara vamiitthoni va Apwiya nave machimwaaye yaakhwaranya a mamwene mattheene akhalle.

²⁶ Aachimwa wonanko Yerobowamu, mwaana a Nebati nnddo aachimwihalleeyena Aisraele ni ottatthamulla osha murima wa Apwiya Mulluku a Israele voollapellani mafano.

²⁷ Mitteko ddimodda ddittheddene dda Omuri ni masiva oonihalleeye, ddoolembiwa mu nibukhu na epilli ya mamwene a o Israele.

²⁸ Vano Omuri aakhwa avitthiwa mu mahame a o Samariya. Vano Ahabu mwanaye aavollowa omwene munipuroni mwaye.

Ahabu mwene a o Israele

²⁹ Muyakha wa 38 woomwene wa Asa o Yuda, Ahabu mwaana a Omuri aavollowa omwene wa o Israele. Olliye ahaalamulella Aisraele o Samariya wa miyakha 22.

³⁰ Koma Ahabu aheera ddoonanara vamiitthoni va Apwiya okhwaranya mamwene mattheene akhalle.

³¹ Akhalla wonanko ochimwa wa Yerobowamu khewaakwakhwanne. Aamutthella Yezebele, mwaana a Etibaala, mwene a Asidoni, aamba orumeyella ni onillapella nifano na Baala.

³² Aamaka enyumba o Samariya yoollapellamo Baala nave yaamakamo nikuwa na Baalooyo

³³ Nave Ahabu aapangattho nifano na Asherimu. Ahabu aheera ddinchichi ddoollika osha murima wa Apwiya Mulluku a Aisraele okhwaranya mamwene mattheene a o Israele ayo yaarivo khalle.

³⁴ Mu olamulello wa mwene Ahabu, Hiyele a o Betele aamakattho muzinda wa Yeriko. Koma moollikana ni mmo yallotelle Apwiya oweella mwa Yoswa mwaana a Nuni, Abiramu mwaana awaamba aamullopwana a Hiyele aakhwa enthawi yoomaka matthipello a muzindooyo nave Segubu, ethwakwaaye, aakhwattho mvo yamakiiwa millako dda muzindooyo.