1 Mamwene 15 - Mawu a Mulluku

Abiya mwene a o Yuda

¹ Muyakha wa 18 wa omwene wa Yerobowamu, Abiya mwaana a Nebati aavollowa omwene o Yuda.

² Olliye aalamulella o Yerusalemu miyakha miraru. Amennya yaari Maaka, mwaana a Abishalomu.

³ Abiya aaneera ddoonanara ddittheddene nnddo attiitthinnya yeeriiwa. Khaawiiwellelle Apwiya Mulluku ohiyana ni Davide nikhollo naye.

⁴ Koma ekaamba ya Davide, Apwiya Mullukwaaye yaamuvaha Abiya mwaana wi avollowe omwene.

⁵ Apwiya yaheera ddenndda kaambiiwa Davide aaneera ddaphaama nave khaakhootille erive ello yamulamulalliiwa mallapo mattheene a okumaaye opatula mwaha wa Uriya Muhiti.

⁶ Ekhoto yaavirellella variyari va Rehobowamu ni Yerobowamu ophiyera okhwa wa Abiya.

⁷ Nave ddittheddene Abiya enreeye ddoolembiwa mu nibukhu na epilli ya mamwene a o Yuda. Nave vaakhalla ekhoto variyari va Abiya ni Yerobowamu.

⁸ Vano Abiya aakhwa avitthiwa ni makhollwaaye mu muzinda wa Davide. Nave Asa mwanaye sika avollowille omwene munipuroni mwaye.

Asa mwene a o Yuda

⁹ Asa ahaamba olamulella o Yuda muyakha wa 20 wa olamulello wa omwene wa Yerobowamu.

¹⁰ Nave Asooyo aalamulella mu Yerusalemu miyakha 41. Amennya yaari Maaka, mwaana a Abishalomu.

¹¹ Asa aheera ddaphaama vamiitthoni va Apwiya wonanko nikhollo naye Davide.

¹² Ahaavenyihamo mu ellapweeyo allopwana ooraruwa voollapellani mafano mattheene ayo yapangiwe ni makhollwaaye.

¹³ Mwene Asa ahaavenyiha omwene amunne, Maaka, ekaamba yawi yaapanga nifano na Asherimu. Olliye aanoononga nifanonno anipwesa, anoosa o ntapo na Kidroni.

¹⁴ Olliye khaavenyihalle mapuro oollapellamo mafano komave Asa aari oororomelleyesesa vamiitthoni va Apwiya mu enthawi ettheene ya okumaaye.

¹⁵ Nave aawaana o enyumba ya Mulluku ddoovelleella ddaye ni dda attiitthinnya dda siliva, golide ni eziwiya ddimodda.

¹⁶ Asa a o Yuda ni Baasha a o Israele yaanawana enthawi ettheene yaariiwa mamwene.

¹⁷ Baashooyo ahaambiha owana ekhoto ni Yuda, allipiha muzinda wa Rama m'malireni wi aahiihe athu ovollowa apaalle okhuma mu ellapo ya Asa mwene a o Yuda.

¹⁸ Vatulli viwa Asa aamukusa siliva ni golide oyo ahanlle moosungellamo eyuuma mu enyumba ya Apwiya ni mu enyumba yoomwene. Aawinnya allupa muttekwaaye wi yavelleelle ddennddo wa Benihadadi, mwaana a Tabirimoni, edduullu ya Heziyoni, mwene a o Siriya oyo akhalla o Damasiko ni ollota wi,

¹⁹ “Vikhalle mwiiwanano variyari va miyaano ni weyaano wonanko mmo attiittho ni attiitthaaka yiiwananelliiwa. Ngoona, kohuurumihella emphaso ddasiliva ni ddagolide. Oye wamallihe mwiiwananwaawo ni Baasha, mwene a o Israele, wi aavenyihemo akhotwaaye mu echigawaaka.”

²⁰ Mwene Benihadadi ahaakhullella ddallotiwe ni Asa. Sika ahaaruma oolamulella ekhoto ni akhotwiiwa wi yawane ekhoto mu mizinda dda o Israele. Nave yaagonjiha mizinda dda Iyoni, Dani, Abele Beti, Maaka ni ezigawo ddittheddene dda Kineroti ni Nafutali.

²¹ Vano Baasha iiwalleeye ddenndda aahiya ollipiha muzinda wa Rama nave aaya akhalla o Tiriza.

²² Vano mwene Asa aawiithana athu attheene a o Yuda, oohimuhiyavo naari muthu mmodda wi yakavihere otukhulla malluku ni miteekho nnddo Baasha amakelleeyena muzinda wa Rama. Nave Asa aapharihella mutteko ddeko ddenndda voomakellani mipanda m'mizindani dda Geba ni Mizipa. Geba waari muzinda wa mu echigawo ya Benjamini.

²³ Vano ddittheddene Asa enreeye, opambana waye vakhotoni ni mizinda nnddo addimakilleeye ddoolembiwa mu nibukhu na epilli ya mamwene a mu Yuda. Koma uulluvalleeye aanavoriiwa ereta ya manyallo.

²⁴ Vano Asa aakhwa nave aavitthiwa ni makhollwaaye mu muzinda wa Davide nikhollo naye. Nave Yehoshafati mwanaye aavollowa omwene munipuroni mwaye.

Nadabu mwene a o Israele

²⁵ Nadabu, mwaana a Yerobowamu, aambille olamulella mu Israele muyakha waneepiilli wa omwene wa Asa a o Yuda. Aalamulella o Israele miyakha miilli.

²⁶ Olliye aheera ddoonanara vamiitthoni va Apwiya wonanko mmo attiitthinnya yachimwelliiwa nave ahaachimwiha Aisraele.

²⁷ Vano Baasha mwaana a Ahiya a mu nibanja na Isakara aamweerella echiwembu Nadabu. Aamwiipha o Gibetoni, muzinda wa Afilisti mvo Nadabu ni athu a o Israele yawaniiwa ni muzindooyo.

²⁸ Sika Baashooyo aamwiipha Nadabu avollowa omwene munipuroni mwaye mu muyakha waneeraru wa omwene wa Asa a o Yuda.

²⁹ Avollowilleeye omwene, enthawi yeeyo aawiipha athu a munibanjani na Yerobowamu. Ahaatthollosa attheene oohimuhiyavo naari muthu mmodda moollikana ni mawu a Apwiya oollotelliwa ni namallotella Ahiya Mushilo.

³⁰ Ddenndda ddaheereya ekaamba ya machimo a Yerobowamu ayo aachimwihalleeyena Aisraele voottatthamullani osha murima wa Apwiya Mulluku a Israele.

³¹ Vano ddittheddene Nadabu enreeye ddoolembiwa mu nibukhu na epilli ya mamwene a o Israele.

³² Nave Asha ni Baasha mwene a Israele yaanawana mallapo mattheene yaariiwa mamwene.

Baasha mwene a o Israele

³³ Baasha mwaana a Ahiya aavollowa omwene muyakha waneeraru wa omwene wa Asa a o Yuda. Nave ahaalamulella Aisraele o Tiriza miyakha 24.

³⁴ Aheera ddoonanara vamiitthoni va Apwiya wonanko mmo Attiitthinnya, Yerobowamu, yachimwelliiwa ni waachimwiha Aisraele.