1 Mamwene 14 - Mawu a Mulluku

Okhwa wa mwaana a Yerobowamu

¹ Va enthawi yeeyo Abiya mwaana a Yerobowamu ahaamba ovoriiwa.

² Sika Yerobowamu aamulleella mwaariye wi, “Venya nave oddiipitthihe wi athu ehuudduwelle wi we tti mwaara a Yerobowamu nave oye o Shilo. Wenko wamphwanye namallotella Ahiya oyo allotille dda miyaano wi kineerokhalla mwene a athu alla.

³ Vooyaani wenko okuse mitthi dda buledi khumi, makeke ni nibotolo na enwi. Olliye aneerewuulleella eyo enaamweereyelle mwaanoolla.”

⁴ Sika mwaara Yerobowamu aheera nnddo alleelliweeye ni mamune nave aaya o Shilo avollowa mu enyumba ya Ahiya. Ahiya khaawora woona phaama miitthwaaye kheyoonesesa ekaamba yawuulluvalla.

⁵ Nave Apwiya yaamulleella Ahiya wi, “Ngoona mwaara Yerobowamu animawa wi uukohe dda mwanaye vawi animavoriiwa. Sika we omulleelle ddawi yoori mutthiyanooyo vawi anaaphiye mooddiipitthiha wonanko mutthiyana mmodda.”

⁶ Vano Ahiya iiwalleeye mukhito wa manyallwaaye avolloweeye va mullako aallota wi, “Vollowa, we mwaara Yerobowamu, kaambiiwa tini oddiipitthihalleewe? Koorumiwa mawu oovoreya wa weyaano.

⁷ Khawe wamulleelle Yerobowamu wi Apwiya Mulluku Aisraele enallota wi, ‘Naari kawunnuwihalle variyari va athu ni oweera mwene a athwaaka Aisraele

⁸ ni waakha omwene ovenyera mu nibanja na Davide wi kuuvahe weyaano koma weyaano khonaphwanaphwana ni Davide, oorumeyellaaka oyo asungalle malamulwaaka vookithwarani ni murimaaye muttheene vaweerani ddoolungama.

⁹ Koma woheera ddoonanara waakhwaranya athu ayo yaarivo khalle weyaano ohinakhallevo. Wookikhoota miyaano nave wookishiha murima vawoopani milluku ddimodda ni mafano amikoko.

¹⁰ Sika kineeromorihella otulli va nibanja nawo we Yerobowamu nave kineerewiipha edduullu ddawo ddeellopwana, kaporo ni oottaphulliweene mu Israele. Kineerotthollosa nibanja nawo nittheene wonanko mmo muthu anaashellelliheeye mashi eeziweto.

¹¹ Arive muthu a mu nibanja na Yerobowamu oyo anaakhwelle m'muzindani, aneerottakhuniwa ni anapwa. Nave arive muthu oyo anaakhwelle muhakani, epallame ddineeromucha. Mi Apwiya koollota.’ ”

¹² Nave Ahiya aamulleella mwaara Yerobowamu wi, “Sika venya oye o enyumbaawo. Voovollowani va mullako va muzinda, mwaanooyo aneerokhwa.

¹³ Nave athu attheene a o Israele eneeromwinllella ni omuvittha. Vawi olliye tti yooyove a mu nibanja na Yerobowamu anaavitthiwe m'mahame kaambiiwa Apwiya Mulluku aaphwanyamo yaphaama mwa olliye mu nibanja nittheene na Yerobowamu.

¹⁴ Woonjerera vaavo, Apwiya eneerewiitthoollella mwene oolamulella Israele oyo anaatthollose nibanja na Yerobowamu ollello, vaava!

¹⁵ Nave Apwiya eneeromutikha Israele wonanko epango yam'maaddini. Eneerewaavenyihamo Aisraele attheene mu ellapo yaphaameella eyo yaavahilliiwa makhollwiiwa nave eneerewaapallallesella okhopella wa muhinje wa Yufurate, kaambiiwa yahiisemella mafanwiiwa a Asherimu waashiha murima Apwiya.

¹⁶ Vano Apwiya eneerewaahiya Aisraele attheene kaambiiwa Yerobowamu ahaachimwiha Aisraele.”

¹⁷ Vano mwaara Yerobowamu aatimulla aya o Tiriza. Nave avollowaka va mullako va enyumbaaye mwaanoolle aakhwa.

¹⁸ Sika Aisraele attheene yaamuvittha nave yaamwinllella moollikana ni mmo Apwiya yamulleelliiwa oorumeyelliiwa, namallotella Ahiya.

Okhwa wa Yerobowamu

¹⁹ Ddittheddene Yerobowamu enreeye, ekhoto awanneeye navettho mmo alamulenlleeye, ddoolembiwa mu nibukhu na epilli ya mamwene a o Israele.

²⁰ Yerobowamu aakhalla mwene miyakha 22 nave aakhwa. Nave mwanaye Nadabu aavollowa omwene munipuroni mwaye.

Rehobowamu mwene a o Yuda

²¹ Rehobowamu mwaana a Solomoni aakhalla mwene a o Yuda. Olliye aari ni miyakha 41 aambeeye olamulella nave aalamulella mu Yerusalemu miyakha 17. Yerusalemu waari muzinda oyo Apwiya yawutthoonlliiwa mu malloko mattheene a Israele wi nnddina niwa nillapelliwekemo. Nnddina na amennya a Rehobowamu naari Naama Mwamoni.

²² Vano athu a o Yuda yaheera ddoonanara vamiitthoni va Apwiya okhwaranya mmo makhollwiiwa yachimwelliiwa, emushiha murima Mulluku.

²³ Vawi yahiimakellattho mapuro oollapellamo mafano, apoto oopatuleya ni mafano a Asherimu vamwaangoni ni vatthi va miteekho ddoovattha.

²⁴ Nave waakhallattho allopwana ooraruwa voollapellani mu ellapo yeeyo. Athwaalla yaaneera ddoonanara nnddo ddeeriwa ni athu ayo Apwiya yawiikarilliiwa Aisraele yaphiyiiwa.

²⁵ Muyakha waneetthanu wa omwene wa Rehobowamu, mwene Shishaki a o Iguputo aawa wi amuhelle ekhoto Yerusalemu.

²⁶ Ahaakha eyuuma ya o enyumba ya Apwiya ni ya o enyumba yoomwene. Aakusa ddeko ddittheddene naarittho ezishango ddagolide nnddo mwene Solomoni apangilleeye.

²⁷ Vatulli viwa mwene Rehobowamu ahoopa ezishango ddamukuwa nave aawinnya akapitawo a alonda a va mullako wa enyumba yoomwene.

²⁸ Enthawi ddittheddene mwenoolle aavollowaka mu enyumba ya Mulluku alondaalle yaanatukhulla ezishangonnddo nave vatulli viwa yaanaddihokollosella mu echipinda ya alonda.

²⁹ Vano mitteko ddittheddene dda Rehobowamu navettho ddittheddene enreeye ddoolembiwa mu nibukhu na epilli ya mamwene a o Yuda.

³⁰ Nave vaakhalla ekhoto yoohimalla variyari va Rehobowamu ni Yerobowamu.

³¹ Vano Rehobowamu aakhwa nave aavitthiwa ni makhollwaaye, mu muzinda wa Davide. Amennya yaari Naama Muamoni. Nave mwanaye Abiya aavollowa omwene munipuroni mwaye.