1 Mamwene 13 - Mawu a Mulluku

Namallotella anamuhumullulla Yerobowamu

¹ Vano ngoonani, muthu a Mulluku aavenyera o Yuda aya o Betele moollikana ni mawu a Apwiya. Yerobowamu aari iimenlle vakhuviru ni nikuwa oosaka lubani.*

² Nave muthooyo aakhuwella va nikuwanno ni mawu a Apwiya wi, “We nikuwa, we nikuwa, Apwiya enallota wi, ‘Mwaana ooromolliwa Yosiya aneeroyariwa mu nibanja na Davide. Nave va weyaano aneerovelleella wonanko mukutho allupa mukutho oorumeyella o mapuro oollapellamo mafano ayo enoosa lubani va weyaano nave eneerewoosa makhuva a athu.’ ”

³ Vano ahaavaha echizindikiro nllapo nenno voollotani wi, “Echizindikiro eyo yallota Apwiya tti yawi, ‘Nikuwanna nineerotthalleya nave ntuura naye nineerotathiya.’ ”

⁴ Mwene Yerobowamu iiwalle ddennddo allota muthu a Mulluku dda nikuwa na Betele aattaphurusa nnatta naye allota wi, “Mphareni!” Nave nnatta anittaphurusalleeyenno nahumma wawi khaawonre onihokollosa.

⁵ Nikuwannettho naatthalleya nave ntuura naatathiya voothwarani echizindikiro eyo muthu a Mulluku avelleelleeye moollikana ni mawu a Apwiya.

⁶ Mwene Yerobowamu aamulleella muthooyo wi, “Muvekelle wa Apwiya Mullukwaanyu wi achirihe nnatta nakanna.” Vano muthooyo aavekella wa Apwiya nave nnattanne naahokollweella mwakhalle.

⁷ Vatulli viwa mwene aamulleella muthu a Mulluku wi, “Hankoni owanihu wi mwache nave kineerewuuvahani emphaso.”

⁸ Koma muthooyo aamwaakhulla mwene wi, “Naari mukivahille hafu a eyuumaanyu ngicha yoocha apaalle owirya maaddi wuno.

⁹ Vawi Apwiya yaakilamula wi, ‘Ohiye wacha yoocha apaalle owirya maaddi apaallettho oyeella ettilla waweelleewe.’ ”

¹⁰ Sika aayeella ettilla emodda ohiri eyo aweelleeye vooyaani o Betele.

Namallotella oohiiwellella aniiphiwa ni mukango

¹¹ Vano o Betele waakhalla namallotella awuulluvalla. Nave anaaye yaawa emulleella ddittheddene nnddo muthu a Mulluku enreeye nllapo nenno o Betele navettho nnddo amulleelleeye mwene.

¹² Nave namallotella awuulluvallooyo aakoha wi, “Ayeelle ettilla eevi?” Anaaye yaamulleella ettilla eyo ayeelle muthu a Mulluku oovenyera o Yuda.

¹³ Vano ahaalleella anaaye wi, “Kimakellelleni esaduro va bulu wi kiwellevo.” Vano yaamakellella esadurweeyo nave aawellavo.

¹⁴ Vano aamuthwara muthu a Mulluku amuphwanya akeraatthille vatthi va muteekho wamuthundu. Vano aamukoha wi, “We tti muthu a Mulluku oovenyera o Yuda?” Nave ahaakhulla wi, “Ee, tti miyaano.”

¹⁵ Namallotella awuulluvallooyo aallota wi, “Hanko owanihu wache.”

¹⁶ Koma muthu a Mulluku ahaakhulla wi, “Ngihokollowa ni nyuwaano apaalle ovollowa mpa mwanyu. Ngicha yoocha apaalle owirya maaddi wuno.

¹⁷ Vawi Apwiya yaakilleella wi, ‘Ohiye wacha yoocha apaalle owirya maaddi apaallettho oyeella ettilla waweelleewe.’ ”

¹⁸ Vano namallotella awuulluvalloolle aallota wi, “Mittho tti namallotella wonanko weyaano nave mungelo aakilleella oyeella mwa Apwiya wi, ‘Ohokollweellena onyumbani wawo wi ache yoocha ni owirya maaddi.’ ” Koma aamoottottha.

¹⁹ Sika aahokollweellana onyumbani waye nave aacha ni owirya.

²⁰ Vano achaka mawu a Apwiya yaawa wa namallotella awuulluvalla olle amuhokollosille mukhwaaye

²¹ nave aamukhuwella muthu a Mulluku oovenyera o Yudoolle wi, “Apwiya eni, ‘Vawi khamwiiwellelle mawu a Apwiya, khamuthwarille lamulo niwa yuulamulalliiwani,

²² koma woohokollowa nave woocha ni owirya maaddi va nipuro mvo Apwiya yuulleelliiwa wi ohichevo apaalle owirya, mutembwaawo khovitthiwa m'mahame a makhollwaawo.’ ”

²³ Vano muthu a Mulluku a o Yuda amallihalle ocha ni owirya, namallotella awuulluvalloolle aammakellella esaduro va bulu muthu a Mullukooyo.

²⁴ Vano aroweeye aakumana ni mukango va ettilla nave waamwiipha. Vano mutembwaaye waamorella m'musewuni nave bulu ni mukango ddiimenlle vakhwipi ni mutembooyo.

²⁵ Athu amodda ayo yavira vaavo yahoona mutembooyo ori vamusewuni, mukango wiimenlle vakhwipi viwa. Athwaalle yaaya yaalleella athu a mu muzinda mmo mwakhalla namallotella awuulluvalloolle.

²⁶ Namallotella awuulluvalla olle amuhokollosille mukhwaaye va ettilla iiwalleeye ddenndda aallota wi, “Yooyo tti muthu a Mulluku oyo ahiiwellelle malamulo a Apwiya. Sika ekaambiiwa Apwiya aamuvelleella wa mukango oyo omukhaddunlle ni omwiipha moollikana ni mmo Apwiya yallotelliiwa.”

²⁷ Vano ahaalleella anaaye wi, “Kimakellelleni esaduro va bulu wi kiwellevo.” Vano yaamakellella esadurweeyo nave aawellavo.

²⁸ Vano aaya awuphwanya mutembo ori va musewuni nave bulu ni mukango ddiimenlle vakhwipi ni mutembooyo. Mukangooyo khawaattakhunne mutembooyo apaalle omukhaddulla buloolle

²⁹ Namallotella awuulluvallooyo aawutukhullella mutembo wa muthu a Mulluku va bulwaaye nave aawukusella o muzinda wi yinlle maliro ni ovittha mutembooyo.

³⁰ Vano aavittha mutembooyo m'mahame mwaye, inllaka wi, “Haa, mwanamunnaka!”

³¹ Nave avitthiwe, ahaalleella anaaye wi, “Mi kakhwa mukivitthe m'mahame mmo muvitthiwe muthu a Mulluku. Muhiye mutembwaaka vakhwipi ni mutembwaaye.”

³² Ddawoona, mawu ayo Apwiya yamullotihalliiwa ddootembelela nikuwa na o Betele ni enyumba dda va mapuro a mallapello a mu mizinda dda o Samariya, ddaakwakhwanihelliwa.

Ochimwa wa Yerobowamu

³³ Naari ddaari ddiiddo, mwene Yerobowamu a o Israele khaahiyalle weera ddoonanara koma aavirellella waatthoolla athu shisha monga allupa mukutho mapurwaaye amallapello. Aanamuzoza arive muthu apaalla okhalla mullupa mukutho.

³⁴ Nenna naari nichimo nuullupalli va nibanja na Yerobowamu. Sika ekaambiiwa nibanja naye noonongeyeliiwa ni otthollosiwa va ellapo yavatthi.