1 Mamwene 12 - Mawu a Mulluku

Rehobowamu khaniiwellella malangizo a attekweene

¹ Rehobowamu aaya o Shekemu vawi athu attheene oompoto wa Israele yatthukumanne o Shekemu wi yamuvollochihe omwene.

² Nave Yerobowamu mwaana a Nebati oyo athawenlle o Iguputo ekaamba ya Solomoni, iiwalleeye ddenndda aahokollweella o Shekemu ovenyera o Iguputo.

³ Athu a o Israele yahaarumiha amithenga wi yamwiithane Yerobowamu nave olliye ni athwaayo yaaya wa Rehobowamu emulleella wi,

⁴ “Attiitthaanyu Solomoni yaanireya nigoli* noollemella. Vano nyuwaano muvevulle mitteko yanipharihiiwa navettho muvevulle nigolinno sika nineerewuurumeyellani.”

⁵ Nave Rehobowamu ahaalleella athwaayo wi, “Rowani, mwakone mallapo mararu nave muhokollowe.” Vano athwaayo yaarowa.

⁶ Vano Rehobowamu ahaakoha attekweene ayo yaari alangizi a Solomoni attiitthinnya ehinakhwe wi, “Ethiyo munakilangiza ddawiidde wi kiwaakhulle athwaalla?”

⁷ Nave yaamulleella wi, “Mwaawaarumeyellaka ni waakhullella ddooveka ddiwa, eneerewuurumeyellani wa enthawi ddittheddene.”

⁸ Koma ahaakhoota malangizo avahiweeye ni attekweene. Nave aaya wa asombwe akhwaaye ayo unnuwalleeyena nimodda, alangizaaye ni oomurumeyella.

⁹ Ahaakoha wi, “Munaakilangize ddawiidde wi kiwaakhulle athu alla enakilleella wi kivevulle nigoli nno attiitthaaka yaareyilliiwa?”

¹⁰ Asombwe akhwaaye yaamulleella wi, “Athwaayo yuuvekilleni wi attiitthaanyu yaanireya nigoli noollemella koma nyu munivevullelle. Vano nyuwaano mwawaakhulle wi, ‘Neemphiinaaka tti ooneneva okhwaranya eyuunu ya attiitthaaka.

¹¹ Attiitthaaka yahuureyani nigoli noollemella, miyaano kineerewaanjereravo. Nave attiitthaaka yuuwashullani ni miwashullo shisha koma miyaano kineerewuuwashullani ni miwashullo ddamukoko.’ ”

¹² Sika Yerobowamu ni athu attheene yaahokollweella wa Rehobowamu viviralle mallapo mararu moollikana ni mmo allotelleeye.

¹³ Sika Rehobowamu aawaakhulla athwaalle moowalli nave aakhoota malangizo avahiweeye ni attekweenaalle.

¹⁴ Nave aallota moollikana ni malangizo a asombwaalle wi, “Attiitthaaka yahuureyani nigoli noollemella koma miyaano kineerewaanjereravo. Navettho yahuuwashullani ni miwashullo shisha miyaano kineerewuuwashullani ni miwashullo ddamukoko.”

¹⁵ Sika mwene khaakhullenlle oveka wa athwaalle vawi Apwiya sika yakhozille khalle wi ddeereye nnddo yallotilliiwa ni Yerobowamu mwaana a Nebati oweella mwa namallotella Ahiya Mushilo.

¹⁶ Aisraele attheene yoonilliiwa wi mwenoolle khaawaakhullelle yapaalliiwannddo, yaamwaakhulla wi, “Ethiyo hi niri ninti ni Davide? Khaninna yoohallana mwa mwaana a Yese. Kheyiivo ninaaphurevwaahu va yoohallana ya mwaana a Yese. Nyu Aisraele, hokollweellani owaninyu, we Rehobowamu, mwaana a Davide, alamulelleke athwaawo.” Sika Aisraele yaahokollweella owaniwa.

¹⁷ Koma Rehobowamu ahaalamulella Aisraele attheene ayo yakhalla m'mizindani dda Yuda.

¹⁸ Vano Rehobowamu aamuruma Adoramu, oyo aari oowehera mutteko wathangata koma Aisraele attheene yaamuvokha malluku ophiyera yaamwiipha. Vano mwene Rehobowamu aawella mwawaakuva vagaretani athawella o Yerusalemu.

¹⁹ Sika Aisraele attheene ompoto yaamuwukila Davide ni nibanja naye ophiyera ollello.

²⁰ Vano Aisraele attheene yiiwalliiwa wi Yerobowamu oohokollowa ovenyera o Iguputo, yaamwiithana wi akhallena va mutthukumano nave yaamuvollochiha omwene wa mu Israele muttheene. Khaniivo nlloko nno nathwanre edduullu dda Davide opatula nlloko na Yuda.

Ollotella wa Shemaya

²¹ Rehobowamu aphiyalleeye o Yerusalemu ahaatthukumaniha akhoto ootthoolliwa 180,000 a nlloko na Yuda ni na Benjamini wi yawane ni malloko a o Israele wi ehokollose omwene wa Rehobowamu mwaana a Solomoni.

²² Koma mawu a Mulluku yaawa wa namallotella Shemaya wi,

²³ “Wamulleelle mwene Rehobowamu mwaana a Solomoni, a o Yuda ni athu attheene a malloko a Yuda ni a Benjamini ni attheene oohallaayo wi,

²⁴ ‘Mi Apwiya kinallota wi muhiwane ni abalaanyu, Aisraele. Arive muthu ahokollweelle owaniwa vawi ddeereyillenndda tti ddoovenyera wa miyaano.’ ” Sika yahiiwellella mawu a Apwiya nave yaahokollweella owaniwa moollikana ni mawu a Apwiya.

Yerobowamu khanamwiiwellella Mulluku

²⁵ Yerobowamu aamakella muzinda wa Shekemu mu miyaango dda Efuremu nave anakhallamo. Vatulli viwa amakattho muzinda wa Penuwele.

²⁶ Vano Yerobowamu aallota m'murimani mwaye wi, “Vano omwene oneerohokollweella wa edduullu dda Davide.

²⁷ Athu yaalla yaavelleellaka mikutho mu enyumba ya Apwiya o Yerusalemu, mirima dda athwaalla ddiinerorukunuwellattho wa apwiiwa, Rehobowamu, mwene a o Yuda nave eneerokiipha ni ohokollweella wa Rehobowamu mwene a o Yuda.”

²⁸ Vano Yerobowamu aganizalle ddenndda, aasema mafano agolide meelli a asaanaang'ombe. Nave ahaalleella athu wi, “Mookhalla muyaaka o Yerusalemu woollapella wa enthawi yoorekama. Nyu Aisraele attheene, milluku ddanyu dduukhumihalleni mu ellapo ya Iguputo tti nndda.”

²⁹ Vano Yerobowamu aakusa nifano nimodda anihiya o Beteli nave nimodda anihiya o Dani.

³⁰ Vano ddenndda ddahaachimwiha Aisraele attheene vawi athu amodda yaanallapella nifano o Beteli nave amodda o Dani.

³¹ Yerobowamu aamakattho nipuro noollapellamo. Ahaatthoolla athu shisha wi ekhalle allupa mukutho ohiri Alevi.

³² Vano Yerobowamu aakeraatthiha nllapo na ehakallallo va nllapo na khumi ni sese na mweeri waneetthanu ni raru, noophwanaphwana ni nllapo na ehakallallo yeereya o Yuda. Aanavelleella mikutho wa mafano a asaanaang'ombe vanikuwani o Betele. Vano o Betelinko ahaahiyawo allupa mukutho o mapuro oollapellamo ayo aapangilleeye.

³³ Nave aanaya o nikuwa animakilleeye o Betele va nllapo na 15 na mweeri waneetthanu ni raru, mweeri oyo akeraatthihalleeye yeekhaaye. Nave aalamula wi vikhalle nllapo na ehakallallo na Aisraele attheene nave aanavelleella mikutho dda lubani* vanikuwani.