1 Mamwene 11 - Mawu a Mulluku

Solomoni khaawiiwellelle Apwiya

¹ Mwene Solomoni aanaakonda atthiyana eelleto anchichi. Waanjerera va mwaana aamutthiyana a Farao a o Iguputo, ahaatthellattho atthiyana oovenyera o Mowabu, o Amoni, o Edomu, o Sidoni ni o Hiti.

² Ahaatthella naari Apwiya yaalamulalle Aisraele attheene wi ehitthellaneke ni athu yaalla kaambiiwa yeerewaarukunusa murima wi ellapelleke milluku ddiwa. Koma Solomoni aavirellellave waakonda atthiyana yaalla

³ Solomoni aari ni awariye 700, anamwani amamwene, ni awariye ang'onong'ono 300.

⁴ Vano Solomoni uulluvanlleeye awariyaayo yaamurukunusa murima wi allapelleke milluku ddimodda. Olliye khaari oororomelleya wa Apwiya mullukwaaye wonanko Davide attiitthinnya.

⁵ Solomoni aanallapella Ashitoreti, mulluku a Asidoni ni Milikomu mulluku oonanaresesa a Aamoni.

⁶ Sika Solomoni aheera ddoonanara vamiitthoni va Apwiya nave khaawaathwanre Apwiya ni murimaaye muttheene wonanko eerelle Davide, attiitthinnya.

⁷ Vano Solomoni aamaka nipuro noollapellamo vamwaangoni wookhuma nndduwa wa Yerusalemu, nipuro noomullapellamo Kemoshi, mulluku oonanaresesa a Amowabu ni noomullapellavo Moleki, mulluku oonanaresesa a Aamoni.

⁸ Ahaamakellattho awariye eelleto, mmo yooselliwa ni ovelleella mikutho wa milluku ddiwa.

⁹ Nave Apwiya yaamushella murima Solomoni kaambiiwa aarukunuwa murima ahiya waallapella Apwiya Mulluku a Aisraele ayo yamooneyelle opiilli

¹⁰ nave emulamula wi ahillapelleke milluku ddimodda koma olliye khaasungalle nnddo Apwiya yamulamulalliiwa.

¹¹ Sika Apwiya yaamulleella Solomoni wi, “Vawi maganizwaawo tti yaalla nave khothwanre echipanganwaaka ni malamulwaaka, ddawoona, kineerotthalla omwene wi kimuvahe mmodda a oorumeyellaawo.

¹² Koma ekaamba ya Davide, attiittho, ngiwaakha omwenooyo weyaano ohinakhwe koma kinaamwaakhe mwanawo.

¹³ Ngimwaakha omwene muttheene koma kineeromuhiyera nlloko nimodda ekaamba ya Davide oorumeyellaaka navettho ekaamba ya muzinda wa Yerusalemu oyo kawutthoonlleemi.”

¹⁴ Sika Apwiya yaamweeriha Hadadi Muedomu, a nibanja noomwene na o Edomu wi amuwukile Solomoni.

¹⁵ Vawi khalle Davide aariiye mu Edomu, Yowabu, akhoto muullupalli aaya wenko wi aavuhelle Aisraele awiiphiwa. Nave aawiipha allopwana attheene a o Edomu

¹⁶ vawi Yowabu ni akhotwaaye yaakhalla wenko miyeri mitthanu ni mmodda ophiyera aamalliha owiipha allopwana attheene.

¹⁷ Koma Hadadi aathawella o Iguputo ni Aedomu amodda ayo yaari oorumeyella a attiitthinnya. Enthawi yeeyo Hadadi aari mwaana.

¹⁸ Yaatimulla ovenyera o Midiyani ephiya o Parani nave yahaakusawo allopwana amodda o Paraninko ethaanana o Iguputo wa mwene Farao. Faraooyo ahaavaha enyumba, ddoocha navettho emata.

¹⁹ Nave Farao aamukonda Hadadi sika aamuvaha mullamwaaye, musinne a mwaariye muullupalli Tapenesi wi amutthelle.

²⁰ Vano mwaara a Hadadi aamuyara mwaana aamullopwana nnddina naye Genubati nave Tapenesi aamullella mwaanooyo mu enyumba ya Farao nave Genubati aakhalla mu nibanja na Farao vamodda ni anamwani aallopwana a Farao.

²¹ Koma Hadadi iiwalleeye ari o Iguputonko wi Davide ookhwa navettho wi Yowabu, muullupalli akhoto ookhwa, aamulleella Farao wi, “Mukaakhullelle wi kirowe o ellapo yoowanihu.”

²² Koma Farao aamukoha wi, “Enuurama wuno tti tini eyo enaweeriha wi ohokollweelle o ellapo yoowaninyu?” Nave ahaakhulla wi, “Kheyiivo koma kaakhullelleni wi kirowe.”

²³ Mulluku aamurumihellattho Solomoni mudani mmodda, Rezoni mwaana a Eliyada oyo athawenlle wa apwinnya Hadadezere mwene a o Zoba.

²⁴ Muthu yoolla ahaatthukumaniha athu nave aakhalla oohoollella mulloko wa anamasikita. Nndda ddeereyille mvo Davide amugonjihalleeye Hadadezere awiipha akhoto a o Zoba. Vano Rezoni ni mullokwaaye yaaya o Damasiko yakhalla wenko nave athwaayo yaamuzoza akhalla mwene a ellapo ya Siriya.

²⁵ Rezoni aakhalla mudani a Israele mallapo mattheene a Solomoni, aanaakatamiha Aisraele monga eerella Hadadi. Nave aalamulella ellapo ya Siriya.

Apwiya enamulonjeza Yerobowamu

²⁶ Muthu mmodda oyo amuwukinlettho mwene Solomoni aari oorumeyellaaye, Yerobowamu, mwaana a Nebati a nlloko na Efuremu a o Zereda. Amennya yaari Zeruya, naamukhwelle.

²⁷ Yerobowamu amuwukilalle Solomoni ekaamba yawi aamaka masitepe a Milo ni omakattho vakumuwalle va mipanda dda m'mizindani dda Davide, attiitthinnya.

²⁸ Yerobowamooyo aari muthu oollipihella mutteko nave Solomoni amoonilleeye wi aari oollipihella aamuvaha okapitawo woowehera mutteko wathangata mu echigawo ya anamwani a Yosefe.

²⁹ Vano va enthawi eyo Yerobowamu avenyereeye o Yerusalemu, namallotella Ahiya Mushilo aamuphwanya vamusewuni. Vano Ahiya aari awanre mukanjo musha nave yaarivo weekhiiwa ohakani.

³⁰ Nave Ahiya aaphara mukanjwaaye awaahulla ezigamba khumi ni piilli.

³¹ Nave aamulleella Yerobowamu wi, “Okuse ezigamba khumi vawi Apwiya Mulluku a Aisraele anallota wi, ‘Kineerotthalla omwene wa Solomoni nave kineerewuuvaha weyaano malloko khumi.

³² Koma Solomoni kineeromuhiyera nlloko nimodda ekaamba ya Davide oorumeyellaaka navettho ekaamba ya muzinda wa Yerusalemu oyo kawutthoonlleemi mwa malloko mattheene a Aisraele.

³³ Kineereweera yeella kaambiiwa Solomoni ookikhoota miyaano, anamullapella Ashitoreti mulluku aamutthiyana a Asidoni, Kemoshi mulluku a Amowabu ni Milikomu mulluku a Aamoni. Sika khaawiiwellelle, khaaweerille nnddo kapaalleemi nave khaasungalle malamulwaaka ni malangizwaaka monga mmo eerella Davide attiitthinnya.

³⁴ Komave ngimwaakha omwene, aneerokhallave oolamulella mallapo mattheene a okumaaye ekaamba ya Davide oorumeyellaaka oyo kaamutthoonlleemi, oyo asunga malamulwaaka.

³⁵ Koma mwanaye sika kinaamwaakheemi omwene nave weyaano kineerewuuvaha malloko khumi.

³⁶ Koma kineeromuvaha nlloko nimodda wa enthawi yoohimalla wi vikhalle edduullu ya Davide oorumeyellaaka wi elamulelleke mu Yerusalemu, muzinda kawutthoonlleemi wi nnddina naka nillapelliwekemo.

³⁷ We Yerobowamu, kineerewuukusa wi olamulelle virive veko murimaawo onaapaalliiwa nave oneerokhalla mwene a Aisraele.

³⁸ Nave waawiiwellaka ddittheddene kinuulamuleemi ni othwara malamulwaaka, oneera echilungamo vamiitthoni vaka voothwarani malangizwaaka ni malamulwaaka wonanko Davide oorumeyellaaka, nguuhiya nave kineereweera wi okhalle mwene a Aisraele. Navettho edduullu ddawo ddineerekolamulella wonanko mmo kamweerelleemi Davide oorumeyellaaka.

³⁹ Kineeroddillaka edduullu dda Davide ekaamba ya ochimwa wa Solomoni koma ohiri wa enthawi yoohimalla.’ ”

⁴⁰ Vano mwene Solomoni apaalla omwiipha Yerobowamu koma aathawella wa Shishake a o Iguputo. Aakhalla wenko ophiyera okhwa wa Solomoni.

Okhwa wa Solomoni

⁴¹ Mitteko ddittheddene dda Solomoni ni ddimodda enreeye ni ezeru ddaye ddoolembiwa mu nibukhu na epilli ya Solomoni.

⁴² Olliye ahaalamulella Aisraele miyakha 40 nave aakhalla mu Yerusalemu.

⁴³ Vano Solomoni aakhwa avitthiwa mu muzinda wa Davide, attiitthinnya. Nave Rehobowamu, mwanaye, aavollowa omwenaaye.