1 Mamwene 10 - Mawu a Mulluku

Mwene aamutthiyana a o Sheba anaya wa Solomoni

¹ Mwene aamutthiyana a o ellapo ya Sheba iiwalleeye dda ovuwa wa Solomoni ddawaatitimiha Apwiya, aaya wa Solomoni wi amukohe makoho ookatamiha.

² Ayiille o Yerusalemunko ni mulloko muullupalli wa oomurumeyellaaye ni ekamira* nnddo ddatukhunlle makhura awunkhella, golide munchichi ni malluku oowallamella mutengo. Aphiyalleeye wa Solomoni aamukoha makoho mattheene aariiyena.

³ Vano Solomoni aamwaakhulla makohwaaye mattheene. Kheyaarivo yoomukatamiha yawi khaaworille omutthopoollella.

⁴ Nave adduwenlleeye wi Solomoni aakhalla ni ezeru ni woona enyumba aamakilleeye,

⁵ ddoocha ddaye, mmo enduna ddaye ddakhallelliiwa, miimellello ni mawarello a oorumeyellaaye, oorumeyellaaye oovelleella ddoowirya ni mikutho ddaye ddooshellelliha avelleelleeye mu enyumba ya Apwiya, khaarittho ni yoollota.

⁶ Vano aamulleella mwenoolle wi, “Tti ddawoona nnddo kiiwalleemi kiri mu ellapwaaka dda mmo munakhallelleenyu ni dda ezeru ddanyu.

⁷ Koma ddenndda ngaaddikhulupilinlle ophiyera kiwiilleemimva nave kohoona ni miitthwaaka. Athu yakilleelle ddooyevave koma kohoona wi ezeru ddanyu ni ddeko ddanyu tti ddinchichi okhwaranya nnddo kiiwalleemi.

⁸ Oodalisiwa tti athwaanyu! Oodalisiwa tti oorumeyellaanyu ayo eniimella vamiitthoni vanyu eniiwellella ezeru ddanyu.

⁹ Oodalisiwa tti Apwiya Mulluku ayo ehakallanlle ekaamba ya nyuwaano ni wuukeraatthihani va mpando woomwene wa Israele vawi Apwiya yaamukonda Israele wa enthawi yoohimalla sika aaweerani wi mukhalle mwene wi mwalamulelle mwa echiweruzo ni mwa echilungamo.

¹⁰ Vano aamuvaha mwenoolle golide makilogaramu 4,000, makhura awunkhella manchichi ni malluku manchichi oowallamella mutengo. Mwene Solomoni aari ahinavahiweke makhura awunkhella manchichi mwawi ddiidda nnddo mwene aamutthiyana a o Sheba aamuvahilleeye.”

¹¹ Esitima dda Hiramu, nnddo ddawiillena golide ovenyera o Ofiri, ddaawaanattho miteekho ddampawa ddinchichi ni malluku oowallamella mutengo.

¹² Nave mwenooyo aapangella miteekho ddampawannddo apoto a enyumba ya Apwiya ni enyumba ya mwenooyo. Miteekhonnddo aapangellattho gitala. Ddawi ddiidda kheddiniiweyeke apaalle wooneya ovenyera khalle.

¹³ Nave Solomoni aamuvaha mwene aamutthiyana a o Sheba ddittheddene apaalleeye ni erive ello aavekilleeye owaakattho nnddo amuvahilleeye khalle moopaalla mwaye. Vatulli viwa mwene aamutthiyana ni oomurumeyellaaye yaahokollweella o ellapo yoowaniwa.

Eyuuma ya Solomoni

¹⁴ Muyakha ni muyakha Solomoni aanamwaakhella golide oollemella makilogaramu 23,000,

¹⁵ oohimweerengella oyo avenyera wa allupa malonda ni alleto ni oyo avenyerattho wa mamwene mattheene a o Arabiya ni wa enduna dda mu ezigawo.

¹⁶ Mwene Solomoni aapanga ddawiitetezella vakhotoni dduullupalli 200 ddagolide oohana. Erive yawiitetezella yapangiwa ni golide oollemella makilogaramu matthanu ni nimodda.

¹⁷ Aapangattho ddawiitetezella ddagolide oohana 300. Erive yawiitetezella eng'onong'ono yaapangiwa ni golide oollemella makilogaramu meelli nave mwenooyo aahiya ddenndda mu Enyumba ya Otthako wa Lebanoni.

¹⁸ Mwenooyo aapangattho mpando woomwene muullupalli wa manyaka a ethepo nave aawuumara golide aphaama wunchichi.

¹⁹ Mpando woomwenoolla waakhalla ni masitepe matthanu ni emodda ophiya vookeraatthella nave yoohameella ya mpandoolla otulli wiwa yaari yookhullungeya vaddullu nave embali piilli ddittheddene ddaakhalla ni voohameellihavo miwono ni ddoosema dda mikango ddiimesiwe embali piillinnddo.

²⁰ Ddoosemiwa khumi ni piilli dda mikango ddahiimesiwattho emodda nngu ni nngu va erive esitepe va masitepe matthanu ni emoddaayo. Khawaarivo omwene waari ni mpando woopangiwa mwawi ddiidda.

²¹ Eziwiya ddittheddene ddoowiryella dda Solomoni ddaari ddagolide nave eziwiya dda mu enyumba ya Otthako wa Lebanoni ddaari ddagolide aphaama ni malluku mamodda. Eziwiya ddasiliva kheddaarivo kaambiiwa siliva kheesiwa ello mu enthawi ya Solomoni.

²² Mwenoolle aanaakhella esitima dda vamaaddini ddoovenyera o Tarishishi ni esitima dda Hiramu. Esitima ddoovenyera o Tarishishi ddaanawaana malluku agolide, malluku asiliva, manyaka eethepo, akholle ni anachama.

²³ Sika Solomoni ahaakhwaranya mamwene mattheene a va ellapo yavatthi vookhallani ni eyuuma ni ezeru.

²⁴ Athu attheene a mu ellapo yavatthi yaanapaalla omoona Solomoni wi yiiwe ezeru ddaye, nnddo Mulluku aamuvahilleeye.

²⁵ Arive muthu aanawaana emphaso ddaye ddinchichi, ddeko ddoopangiwa ni siliva ni golide, ddoowara, mure,* makhura awunkhella, akavalo ni enyuru.* Nndda ddaaneereya orive muyakha.

²⁶ Vano Solomoni ahaatthukumaniha magareta ni athu aweetiha akavalo akhoto nave aaddihiya mu muzinda. Magaretaayo yaarivo 1,400 nave athu ooweetiha akavalo akhoto yaarivo 1,200. Ahaahiya amodda o mizinda nko wakhalla akhoto ni amoddattho vakhuviru ni mwene a o Yerusalemu.

²⁷ Vano Solomoni aheeriha wi mu Yerusalemu mukhalle siliva awaata wonanko malluku. Aheerihattho wi mukunguza waate wonanko namukuyu a mutapo muhito mwa miyaango dda Yuda.

²⁸ Solomoni aanaakulla akavalo ovenyera o Iguputo ni o Kuwe. Amalonda a Solomoni sika yaakulla akavalo yaalla ovenyera o Kuwe.

²⁹ Nigareta nimodda nakulliwa ovenyera o Iguputo makobiri asiliva 600 nave kavalo mmodda akulliwa makobiri asiliva 150. Vatulli viwa amalonda a mwene yaanaakulliha magareta ni akavalo wa mamwene a Ahiti ni a o Siriya.