1 Epilli 9 - Mawu a Mulluku

Athu oohokollowa wuukaporoni o Babiloni

¹ Vano Aisraele attheene yaalembana mu nibukhu na epilli ya mamwene a o Israele voothwarani mibado ddiwa. Athu a o Yuda yaaphariwa okaporo oya o Babiloni ekaamba yawi yaari oohiroromelleya.

² Aisraele awaamba oohokollweella mwiillaponi mwiwa ni m'mizindani mwiwa yaari athu shisha a Israele, allupa mukutho, Alevi ni allupa mutteko a o enyumba ya Apwiya.

³ Nave athu amodda a o Yuda, Benjamini, Efuremu ni Manase ayo yakhalla o Yerusalemu yaari

⁴ Utai, mwaana a Amihudi, mwaana a Omuri, mwaana a Imuri, mwaana a Bani, edduullu ya Perezi, mwaana a Yuda.

⁵ Oovenyera wa Ashiloni yaari Asaiya mwaana awaamba ni anaaye aallopwana.

⁶ Oovenyera wa anamwani a Azera yaari Yeuwele ni abaliiwa 690.

⁷ Edduullu ddimodda ddoovenyera wa Benjamini ddaari Salu, mwaana a Meshulamu, mwaana a Hodaviya, mwaana a Hasenuwa,

⁸ Ibineya, mwaana a Yerohamu, Ela, mwaana a Uzi, mwaana a Mikiri navettho Meshulamu, mwaana a Shefatiya, mwaana a Reuwele, mwaana a Ibineya.

⁹ Mabanja mamodda a mibado ddiwa yaarivo 956. Athu attheene elembiwaalla yaari oohoollella a mabanja.

Allupa mukutho a o Yerusalemu

¹⁰ Nave amodda mwa allupa mukutho yaari, Yedaya, Yehoyaribu, Yakini

¹¹ ni Azariya mwaana a Hilikiya, mwaana a Meshulamu, mwaana a Zadoki, mwaana a Meraiyoti, mwaana a Ahitubi, muttekweene oowehera enyumba ya Mulluku.

¹² Nave waarittho Adaya, mwaana a Yerohamu, mwaana a Pashuri, mwaana a Malikiya navettho Maasai mwaana a Adiyele, mwaana a Yazera, mwaana a Meshulamu, mwaana a Meshilemiti, mwaana a Imeri.

¹³ Allupa mukutho ayo yaari oohoollella mabanja yaarivo 1,760, athu oodduwella wunchichi mitteko dda o enyumba ya Mulluku.

¹⁴ Nave amodda a wa Alevi yaari, Shemaya, mwaana a Hashubu, mwaana a Azirikamu, mwaana a Hashabiya a o nibanja na Merari.

¹⁵ Waarittho Bakibakara, Hereshi, Galali ni Mataniya mwaana a Mika, mwaana a Zikiri, mwaana a Asafu.

¹⁶ Waarittho Obadiya, mwaana a Shemaya, mwaana a Galali, mwaana a Yedutuni ni Berekiya, mwaana a Asa, mwaana a Elikana oyo akhalla omizini ddawaatamana ni etawoni ya Anetofati.

Oowehera a enyumba ya Mulluku o Yerusalemu

¹⁷ Alonda yaari, Shalumu, Akubu, Talimoni, Ahimani ni abaliiwa (Shalumu sika aari oohoollella),

¹⁸ nave ophiyera enthawi yeeyo, athu a nlloko nenna yaakeraatthihiwa va mullako woovollowella wa mwene embali ya wookhuma nndduwa. Alla sika yaari alonda a misasa dda Alevi.

¹⁹ Nave Shalumu, mwaana a Kore, mwaana a Ebiyasafu, mwaana a Kora ni abalaaye a o nibanja na makhollwaaye, yawehera va mullako wa musasa wamutthukumano, monga yeerella makhollwiiwa va mullako wa musasa wa Apwiya.

²⁰ Nave Finehasi, mwaana a Eleazara, sika aahoollella. Apwiya yaari ni olliye.

²¹ Zekariya, mwaana a Meshelemiya, aweherattho va mullako wa musasa wamutthukumano.

²² Attheene ayo yatthoolliwe wi ekhalle alonda yaari 212. Yalembiwe voothwarani mibado ddiwa o mizi ddiwa. Davide ni namallotella Samuele sika yaahiyalle m'mapuroni mwiwa a mutteko ekaamba ya ororomelleya wiwa.

²³ Mwawi alliwa ni edduullu ddiwa yawehera ni owehera va millako dda enyumba ya Apwiya monga yeerelliiwa o musasa wamutthukumanoolle.

²⁴ Ooweheraayo yaari embali ddittheddene ddisese, wookhuma nndduwa, woovollowa nndduwa, ompoto ni omwera.

²⁵ Abaliiwa ayo yakhalliiwana m'mizi mwiwa, yaanawa omodda ekhallaka mallapo matthanu ni meelli.

²⁶ Oohoollella asese a alonda ayo yaari Alevi, yawehera ezipinda ni moosungellamo eyuuma ya o enyumba ya Mulluku.

²⁷ Mahiiyu yakhalla moowaapheella enyumba ya Mulluku vawi alliwa sika yaari ni odindo woowehera ni woohulla enyumbeeyo orive ohinase.

Alevi amodda

²⁸ Amodda mwa Alevi yawehera eziwiya dda va mallapello vawi waari woopaalleya weerenga apaalle voohokollosani vooddikhumihani.

²⁹ Amodda mwa alliwaayo yaatthoolliwa wi ewehereke mipando ni eziwiya ddittheddene ddoopatuleya. Amodda yawehera othu waphaama, vinyo, makhura, lubani* ni ddeko ddawunkhella.

³⁰ Koma odindo woottakanyihera ddawunkhellannddo waari wa allupa mukutho.

³¹ Matitiya, mmodda mwa Alevi, mwaana awaamba a Shalumu a nibanja na Kora aawehera athu awaapeya makeke oophuttantteya.

³² Abaliiwa amoddattho a nibanja na Akohati yawehera buledi oovelleelliwa, awaapeyiwa nirive Sabata.

³³ Nave attekweene amodda a Alevi yaawehera athu awiipa machipo mu enyumba ya Apwiya. Alliwa yakhalla mu ezipinda mu enyumba ya Apwiya, oohaatelliwa ni mitteko ddimodda vawi yaphara mutteko ni mahiiyweene.

³⁴ Attheene yaari oohoollella a mabanja a Alevi a mibado ddiwa nave yakhalla o Yerusalemu.

Makhollo a mwene Saulo

³⁵ Yeiyele sika amwaambihalle Gibiyoni nave akhalla wenko. Mwaariye aari Maaka.

³⁶ Mwanaye awaamba aari Abidoni, otulli waye wawiille Zuri, Kishi, Baala, Nere, Nadabu,

³⁷ Gedori, Ahiyo, Zekeri

³⁸ ni Mikiloti, attiitthinnya a Shimea. Nave alliwa ni abaliiwa yakhalla o Yerusalemu.

Nibanja na Saulo

³⁹ Nere aamuyara Kishi, Kishi aamuyara mwene Saulo. Mwene Saulo aamuyara Yonatani, Malikishuwa, Abinadabu ni Eshibaala.

⁴⁰ Yonatani aamuyara Meribaala nave Meribaala aamuyara Mika.

⁴¹ Mika aamuyara Pitoni, Meleki, Tareya ni Ahazi.

⁴² Ahazi aamuyara Yehoyada. Yehoyada aamuyara Alemeti, Azimaveti ni Zimiri. Zimiri aamuyara Moza,

⁴³ Moza aamuyara Bineya, Bineya aamuyara Rafa, Rafa aamuyara Eleasa, Eleasa aamuyara Azele.

⁴⁴ Azele aari ni anamwani aallopwana atthanu ni mmodda nave manddiniiwa yaari Azirikamu, Bokeru, Ishmaele, Sheyariya, Obadiya ni Hanani. Attheenaalla yaari anamwani a Azele.