1 Epilli 29 - Mawu a Mulluku

Athu enavelleella ddoomakella enyumba ya Apwiya

¹ Mwene Davide aallota wa mutthukumano muttheene wi, “Mwanaka Solomoni oyo Mulluku amutthoonlleeye tti mung'onong'ono nave khanadduwella ddinchichi. Vano muttekoolla tti muullupalli vawi enyumbeella khekhalla ya muthu koma ya Apwiya Mulluku.

² Sika koovelleellattho ddoomakella enyumba ya Mullukwaaka moollikana ni mmo kiworelleemi monga golide, siliva, mukuwa, mukoko ni matabwa. Koovelleellattho malluku manchichi a onikisi, a mitundu ddoohiyanahiyana, oowallamella mutengo ni malluku a marabulo.

³ Waanjerera va ddittheddene kivelleelleemi va enyumbeella, kookhallanattho eyuuma yaakayaaka ya golide ni siliva nave ekaamba ya wiivelleella waka va enyumba ya Mullukwaaka kinavelleellattho eyuumeeyo o enyumbeeyo.

⁴ Kinavelleella mataani 3,000 a golide aphaama wunchichi a o Ofiri ni mataani 7,000 a siliva aphaama, ddittheddenennddo ddoohuruwellana esiri dda enyumba

⁵ ni eziwiya ddoopangiwa ni athu eeruso. Vano variyari va nyuwaano, ttaani anaavelleelle mwa opaalla waye wa Apwiya?”

⁶ Vaavo oohoollella a mabanja, oohoollella a malloko, oolamulella a akhoto ni oowehera mitteko dda mwene yaavelleella emphaso ddiwa moohiwatiheriwa.

⁷ Yaavelleella omuttekoni wa enyumba ya Mulluku mataani 170 a golide, makilogaramu 84 a makobiri a golide, mataani 340 a siliva, mataani vakhuviru 620 a mukuwa ni mataani ookhwaranya 3,400 a mikoko.

⁸ Ayo yaari ni malluku oowallamella mutengo yaavelleella o enyumba yoosungellamo eyuuma ya o enyumba ya Apwiya eyo yaweheriwa ni Yehiyele Mugereshoni.

⁹ Vano athu yaahakallalla kaambiiwa yaavelleella wa Apwiya mwa opaalla wiwa ni murimiiwa muttheene. Nave mwene Davide aahakallallattho wunchichi.

Davide anaatitimiha Apwiya

¹⁰ Vano Davide ahaatitimiha Apwiya vamiitthoni va mutthukumano muttheene nave aallota wi, “Nyu Apwiya Mulluku a Israele, nikhollo na Yakobo mutitimiheye wa enthawi yoohimalla”

¹¹ Nyu Apwiya tti muullupalli, amasiva, antitimiho, oopambana ni oolemu vawi ddittheddene ddiri oddullu ni va ellapo yavatthi tti ddaanyu. Apwiya, omwene tti waanyu nave muri oolamulella ddittheddene.

¹² Eyuuma ni olemu ddinavenyera wa nyuwaano. Munnalamulella ddittheddene ni masiva ni ekophollo nave munnamweeriha arive muthu okhalla muullupalli ni amasiva.

¹³ Vano ninnuuthokozani Mullukwaahu ni ollapella nnddina nanyu nootitimiheya.

¹⁴ “Koma mi kiri aani nave athwaaka eri aani wi ttuuwora ovelleella mwa opaalla wahu? Valle ddeko ddittheddene ddinavenyera wa nyuwaano nave ninavelleellaahu tti ddaanyu.

¹⁵ Vawi hi tti alleto vamiitthoni vanyu, niri wonanko alleto mwiillaponi yaaneena monga makhollwaahu. Mallapwaahu ookhalla va ellapo yavatthi eri wonanko muuthuuchi nave khe voollekelliwa.

¹⁶ Nyu Apwiya Mullukwaahu, noowaana eyuuma ettheeneella wi nimake enyumba wi nititimihe nnddina nanyu koma ddittheddene ddavenyenre wa nyuwaano nave tti ddaanyu.

¹⁷ Nave kinnadduwella Mullukwaaka wi munneesa murima wa arive muthu nave munnahakallalla ni athu eechilungamo. Mu echilungamo ya murimaaka koovelleella ddittheddenenndda wa nyuwaano moohiwatiheriwa nave vano koowoona athwaanyu etthukumanille ovelleella wa nyuwaano mwa opaalla wiwa nave moohakallalla.

¹⁸ Nyu Apwiya Mulluku a Abrahamu, Isaki ni Yakobo makhollwaahu, keraatthihani wa enthawi yoohimalla maganizo ni makhallello yaalla m'murimani mwa athwaanyu nave ekhalle ni murima woororomelleya wa nyuwaano.

¹⁹ Muvaheni Solomoni mwanaka murima wawiivelleella wi asungeke malamulwaanyu, ehuddihwaanyu ni malangizwaanyu navettho opaalla weera erive ello wi amake enyumba eyo kiyikhozekelleemi.”

²⁰ Nave Davide aallota wa mutthukumano muttheenoolle wi, “Atitimiheni Apwiya Mullukwaanyu.” Vano athu attheene yahaatitimiha Apwiya Mulluku a makhollwiiwa nave yaakokhora yaallapella Apwiya ni omuvaha olemu mwene.

²¹ Osaka wene yaavelleella mikutho ddooshellelliha wa Apwiya, anankhoro eeng'ombe 1,000, anankhoro eenkhosa 1,000 asaanaankhosa 1,000 ni mikutho dda ddoowirya opwesereravo mikutho ddimodda ddawaata munipuroni mwa Aisraele attheene.

²² Nave nllapo nenno yaacha ni owirya nave yaahakallalla wunchichi vamiitthoni va Apwiya. Vatulli viwa Solomoni mwaana a Davide yaamuvollochiha omwene waneepiilli. Vano yaamuzoza omwene mu nnddina na Apwiya nave yaamuzoza Zadoki omullupa mukutho.

²³ Sika Solomoni aakeraatthi va mpando wa Apwiya monga mwene munipuroni mwa Davide attiitthinnya. Ddaanamweetella phaama nave Aisraele attheene yaanamwiiwellella.

²⁴ Oohoollella attheene, akhoto amasiva ni anamwani attheene a mwene Davide yaalonjeza omwiiwellella mwene Solomoni.

²⁵ Nave Apwiya yaamuvaha Solomoni olemu muullupalli variyari va Aisraele attheene. Yaamuvaha omwene oyo ohinavahiweke ovenyera khalle wa mwene mmodda mu Israele.

Omalla wa olamulello wa Davide

²⁶ Mmu sika Davide mwaana a Yese alamulelleeye Israele muttheene.

²⁷ Davide aakhalla mwene a Israele wa miyakha 40. Alamulalle mu Hebroni wa miyakha mitthanu ni miilli nave miyakha 33 mu Yerusalemu.

²⁸ Vano aakhwa uulluvanlle phaama. Aakhalla ni mallapo manchichi, eyuuma ni olemu nave Solomoni mwanaye aavollowa omwene munipuroni mwaye.

²⁹ Vano mitteko dda mwene Davide ovenyera vawaamba ophiyera omamallihello wiwa ddoolembiwa mu nibukhu na epilli ya namallotella Samuele ni mu nibukhu na epilli ya namallotella Natani ni mu nibukhu na epilli ya namallotella Gadi.

³⁰ Mwemmo mwaalembiwa dda olamulellwaaye, dda masivaaye ni ddittheddene ddamweereyelle olliye ni Israele owaaka moomwene mattheene a ellapo ddimodda ddawaapheella.