1 Epilli 28 - Mawu a Mulluku

Davide analangiza dda enyumba ya Apwiya

¹ Davide ahaalamula attekweene attheene a Israele wi etthukumane mu Yerusalemu monga oohoollella attheene a malloko, a mitteko dda omwene, a milloko ayo yamurumeyella mwene, a akhoto anchichi, alonda a eyuuma ettheene ni eng'ombe dda mwene ni aniiwa, enduna dda o enyumba yoomwene navettho athu amasiva ni akhoto attheene oollipa murima.

² Vano mwene Davide ahiimella allota wi, “Nyu asinnaka ni athwaaka, kaapelleni maaru. Kaakhalla ni maganizo m'murimani mwaka awi kimake enyumba yoohiyamo nibokosi na echipangano na Apwiya nno ninaakhalle wonanko nipuro noonyingallavo Apwiya Mullukwaahu. Nave kaakhozekella khalle ddoomaka enyumbeeyo.”

³ Koma Mulluku aakilleella wi, “ ‘Ohikimakelle enyumba vawi we tti akhoto nave waawiipha athu.’ ”

⁴ Koma Apwiya Mulluku a Israele aakitthoolla variyari va attheene a mu nibanja mwahu wi kikhalle mwene a Israele wa enthawi yoohimalla vawi yaamutthoolla Yuda wi akhalle oohoollella a malloko mattheene nave ovenyera o nlloko na Yuda yaatthoollawo nibanja na attiitthaaka. Nave variyari va anamwani a attiitthaakaayo ddaamuhakallalliha Mulluku okitthoolla wi kikhalle mwene a Israele muttheene.

⁵ Sika Apwiya aakivaha anamwani anchichi nave mwa attheenaayo aamutthoolla Solomoni wi akhalle va mpando woomwene wa Apwiya wi alamulelle Israele.

⁶ “Yaakilleella wi, ‘Tti mwanawo Solomoni anaakimakelle enyumba ni mathatwiiwa vawi koomutthoolla wi akhalle mwanaka nave kineerokhalla attiitthinnya.’

⁷ ‘Kineerokeraatthiha omwenaaye wa enthawi yoohimalla avirellella wiiwellella malamulwaaka ni malangizwaaka monga aneerelleeyeemmu.’ ”

⁸ Vano vamiitthoni va Aisraele attheene, mutthukumano wa Apwiya, nave vamiitthoni va Apwiya kinuulleellani wi musungeke ni wiiwellella malamulo a Apwiya Mullukwaanyu wi mukhalle ni ellapo yaphaameella monga yoohallanaanyu ni edduullu ddanyu wa enthawi yoohimalla.

⁹ Nave we Solomoni mwanaka, omudduwelle Mulluku a attiitthaawo nave omurumeyelleke ni murima muttheene ni okumaawo muttheene. Vawi Apwiya ennadduwella murima, maganizo ni minkhella dda arive muthu. Wawaashaasha oneerewaaphwanya koma waareya etulli eneerowutathilla wa enthawi yoohimalla.

¹⁰ Odduwelle wi Apwiya ahuutthoolla wi waamakelle enyumba yaweella mmo enaakhallekeewamo. Vano ollipe murima nave ophare mutteko.

¹¹ Sika Davide aamuvaha mwanaye Solomoni mapulani oomakella enyumba ya Apwiya, monga ezipinda ddoosungellamo, ddamuddullu, ddamuwari ni echipinda yaweellesesa yookhululukellamo machimo.

¹² Aamuvahattho mapulani aariiyena a mathato a enyumba ya Apwiya ni ezipinda waapheella mathatwaayo, ezipinda ddoosungellamo eyuuma ya enyumba ya Mulluku ni yoosungellamo emphaso ddoopatuleya.

¹³ Nave aamuvahattho mapulani ookawella milloko dda allupa mukutho ni Alevi navettho mitteko ddittheddene dda mu enyumba ya Apwiya. Aamulangizattho dda ezipangizo ddittheddene ddoophariha mutteko mu enyumba ya Apwiya.

¹⁴ Aamulangizattho dda ollemella wa golide mu ezipangizo ddagolide ddittheddene dda orive mutteko, ollemella wa ezipangizo ddasiliva dda orive mutteko,

¹⁵ ollemella wa ddoohiyavo enyali ddagolide ni enyali ddiwa ni wa ddoohiyavo enyali ddasiliva ni enyali ddiwa moollikana ni mutteko wa erive yoohiyavo enyali,

¹⁶ ollemella wa golide a arive tebulo voohiyavo buledi, wa siliva a matebulo asiliva

¹⁷ ni golide aphaama a mafoloko, mabeseni ni makapu. Aamulangizattho dda ollemella wa embale ddagolide ni ddasiliva,

¹⁸ dda waata wa golide aphaama oomakella nikuwa nawoosellavo lubani ni ollemella wiwa. Aamuvaha mapulani oopangella nigareta na akerubi* oottaphurusa muuphellwiiwa ekhuneellana nibokosi na echipangano na Apwiya.

¹⁹ Davide aallota wi nndda ddinniiwanana ni mawu yalembiwe moothwara malangizo a Apwiya. Nave ddittheddenenndda ddaatthopoolliwa phaama wi mitteko ddittheddene ddiphariwe moollikana ni mapulaniiwa.

²⁰ Vano Davide aallota wa Solomoni mwanaye wi, “Llipa murima nave phara muttekooyo. Ohoove nave ohitathille murima vawi Apwiya Mulluku oyo tti Mullukwaaka ari ni weyaano. Kheyuukukureyiha navettho kheyuuhiya weekha ophiyera mutteko muttheene woomaka enyumbiiwa omanlle.”

²¹ “Vano ngoona, milloko dda allupa mukutho ni Alevi, ddoophwanella ophara mitteko ddittheddene dda o enyumba ya Mulluku ddookhozeka nave we, va mutteko muttheenooyo oneerokhalla ni athu eeruso awiivelleella va muttekwiiwa nave athu shisha attheene ni oohoollelliiwa we sika onaalamulelleke yaweera.”