1 Epilli 27 - Mawu a Mulluku

Akhoto ni uullupalliiwa

¹ Nna sika ntthopoollo na oohoollella a mabanja a Aisraele owaalamulella akhoto anchichi ni enduna ddiwa nnddo ddamurumeyella mwene mu ddittheddene dda okawa wa mitteko nko wakhallavo mweeri ni mweeri muyakha muttheene. Orive mulloko wakhalla ni athu 24,000.

² Yeshobeamu, mwaana a Zabidiele aari oohoollella mulloko wa mweeri wawaamba oyo waari ni akhoto 24,000.

³ Olliye aari edduullu ya Perezi nave aari muullupalli a oohoollella a akhoto mweeri wawaamba.

⁴ Dodai, Muahohi aari oohoollella mulloko wa mweeri waneepiilli oyo waari ni akhoto 24,000, nave Mikiloti aari ookaviheraayo.

⁵ Oohoollella a mulloko wa mweeri waneeraru aari Benaya mwaana a Yehoyada mullupa mukutho oyo waari ni akhoto 24,000.

⁶ Benaya sika aari amasiva mwa oohoollella 30 nave aanaahoollella akhoto 30. Amizabadi mwanaye sika aari oomuthwarellella voolamulellani mullokwaaye.

⁷ Asahele, mwanamunne a Yowabu sika aari oohoollella mulloko wa mweeri waneesese oyo waari ni akhoto 24,000. Nave Zebadiya aavollowa munipuroni mwaye.

⁸ Oohoollella mulloko wa mweeri waneetthanu aari Shamuti edduullu ya Muizara. M'mulloko mwaye mwaari akhoto 24,000.

⁹ Oohoollella mulloko wa mweeri waneetthanu ni mmodda waneetthanu aari Ira mwaana a Ikeshi Mutekowa. M'mulloko mwaye mwaari akhoto 24,000.

¹⁰ Oohoollella mulloko wa mweeri waneetthanu ni piilli mweeri waneetthanu ni piilli aari Helezi Mupeloni, mmodda a edduullu dda Efuremu. M'mulloko mwaye mwaari akhoto 24,000.

¹¹ Oohoollella mulloko wa mweeri waneetthanu ni raru aari Sibekai Muhusha, a mu nibanja na Zera. M'mulloko mwaye mwaari akhoto 24,000.

¹² Oohoollella mulloko wa mweeri waneetthanu ni sese aari Abiyezere oovenyera o Anetoti Mubenjamini. M'mulloko mwaye mwaari akhoto 24,000.

¹³ Oohoollella mulloko wa mweeri waneekhumi aari Maharai, Munetofa a mu nibanja na Zera. M'mulloko mwaye mwaari akhoto 24,000.

¹⁴ Oohoollella mulloko wa mweeri waneekhumi ni mmodda aari Benaya Mupiratoni, mmodda a nlloko na Efuremu. M'mulloko mwaye mwaari akhoto 24,000.

¹⁵ Oohoollella mulloko wa mweeri waneekhumi ni piilli aari Helidai Munetofa, edduullu ya Otiniyele. M'mulloko mwaye mwaari akhoto 24,000.

Aweetiha malloko a Aisraele

¹⁶ Nna sika ntthopoollo na oohoollella a malloko a Aisraele. Oohoollella a Arubeni aari Eliyezere mwaana a Zikiri. Oohoollella a Asimeoni aari Shefatiya mwaana a Maaka.

¹⁷ Oohoollella a Alevi aari Hashabiya mwaana a Kemuwele. Oohoollella a Aaroni aari Zadoki.

¹⁸ Oohoollella a Ayuda aari Elihu mmodda a asinne a Davide. Oohoollella a Aisakara aari Omuri mwaana a Mikaele.

¹⁹ Oohoollella a Azebuloni aari Ishimaya mwaana a Obadiya. Oohoollella a Anafutali aari Yeremoti mwaana a Aziriele.

²⁰ Oohoollella a Aefuremu aari Hoseya mwaana a Azaziya. Oohoollella a nlloko na hafu na Manase na woovollowa nndduwa aari Yowele mwaana a Pedaya.

²¹ Oohoollella a nlloko na hafu na Manase na wookhuma nndduwa, nipuro na Giliyadi, aari Ido mwaana a Zekariya. Oohoollella a Abenjamini aari Yasiyele mwaana a Abinere.

²² Oohoollella a Adani aari Azarele mwaana a Yerohamu. Yaalla sika yaari oohoollella a malloko a Aisraele.

²³ Davide khaaweerengille vamodda ni athu oohikwakhwana miyakha 20 ddooyariwana vawi Apwiya yaamulonjeza wi Aisraele eneerewaata wonanko etheneeri ddooddullu.

²⁴ Yowabu mwaana a Zeruya ahaamba weerenga koma khaamallihalle. Ollaka wa Apwiya wahaamorella Aisraele ekaamba ya yeella nave echiwerengero kheyaalembiwe mu nibukhu na epilli dda mwene Davide.

Alonda a eyuuma ya mwene

²⁵ Alonda a eyuuma ya mwene aari Azimaveti mwaana a Adiyere. Yonatani mwaana a Uziya awehera eyuuma emodda, m'mizindani, m'mizi ni mu enyumba ddakhoto.

²⁶ Eziri mwaana a Kelubi aawehera athu oollima m'matani.

²⁷ Shimei Muramiti awehera emata ddampesa. Zabidi Mushifamu awehera moosungellamo vinyo.

²⁸ Baala Hanani Mugederi awehera miteekho dda olivi ni ddanamukuyu o Shefela. Yowashi awehera moosungellamo makhura.

²⁹ Nave Shitirai Musharoni awehera eziweto dda woochihella o Sharoni. Shafati mwaana a Adilai awehera eziweto dda o matapo

³⁰ Obili Muishmaele awehera ekamira.* Yedeiya Mumeronoti aawehera abulu. Yazizi Muhagiri awehera enkhosa ni epuri.

³¹ Attheenaalla sika yaari uullupalli ayo yawehera eyuuma ya mwene Davide.

³² Yonatani, apwinnya a Davide sika aari oomulangizaaye vawi aari namalembella ni awiiwesesa. Olliye ni Yehiyele mwaana a Hakimoni yaahuddiha anamwani a mwene.

³³ Ahitofele aari oolangiza a mwene nave Hushai Muwariki aari mukhwiiwa a mwene.

³⁴ Ahitofele akhwille, Yehoyada mwaana a Benaya sika avollowille mu nipuro mwaye navettho Abiyatara. Yowabu sika aari oohoollella muullupalli a mulloko wakhoto wa mwene.