1 Epilli 26 - Mawu a Mulluku

Alonda a enyumba ya Apwiya

¹ Alla sika yaari malloko a alonda a va mullako, m'mulloko wa Akora mwaari Meshelemiya mwaana a Kore, mmodda a anamwani a Asafu.

² Nave Meshelemiya ahaayara Zekariya, Yediyaele, Zebadiya, Yatiniele,

³ Elamu, Yehohanani ni Elihunai.

⁴ Nave Ebedi Edomu ahaayara Shemaya, Yozabadi, Yowa, Sakara, Netanele,

⁵ Amiyele, Isakara ni Peuletai vawi Mulluku aamudalisa Ebedi Edomu.

⁶ Shemaya, mwanaye awaamba aakhalla ni anamwani ayo yaari oohoollella mabanja a makhollwiiwa vawi yaaneera ddeko dduullupalli.

⁷ Shemaya ahaayara Otini, Rafaele, Obedi ni Elizabadi ayo yaari ni abaliiwa amasiva, Elihu ni Semakiya.

⁸ Attheenaalla yaari anamwani a Obedi Edomu. Ovenyera o edduullu dda Obedi Edomu waatthoolliwa athu 62 oowora ophara mutteko phaama.

⁹ Meshelemiya aakhalla ni anamwani ni abalaaye oowora ophara mutteko phaama, attheene yaarivo 18.

¹⁰ Nave ovenyera o nlloko na Merari, waatthoolliwa Hosa oyo amuyanre Shimiri, oyo attiitthinnya yamutthoollille wi akhalle oohoollella naari ahaari awaamba.

¹¹ Hosa ahaayara Hilikiya, Tebaliya ni Zekariya. Anaaye ni abalaaye a Hosa attheene yaarivo khumi ni araru.

¹² Alonda a vamullako wa enyumba ya Apwiya yakawiwe m'millokoni moollikana ni oohoollella a mabanjiiwa nave yaavahiwa mitteko ddoorumeyella mu enyumba ya Apwiya emoddamoddave yeeyottho ddakhallelliiwa ni Alevi abaliiwa.

¹³ Alliwattho yahoombesa va mabanja mattheene ang'onong'ono ni uullupalli wi yaaphwanye alonda a va mullako.

¹⁴ Woombesa wa mullako wa wookhuma nndduwa wammorenlle Shelemiya. Mwanaye Zekariya, oolangiza eezeru aatthoolliwa wi akhalle mulonda a mullako wa ompoto.

¹⁵ Obedi Edomu aatthoolliwa wi awehereke mullako wa omwera nave anaaye yaatthoolliwa wi ewehereke enyumba yoosungellamo katundu.

¹⁶ Shupimu ni Hosa yatthoolliwe wi ewehereke woovollowa nndduwa, va mullako wa Shaleketi va musewu woomwaako. Nave yawehera moothwarellellana.

¹⁷ Woovollowa nndduwa wakhalla alonda atthanu ni mmodda nllapo ni nllapo, ompoto asese, omwera asese navettho eelli onyumbani woosungellawo katundu.

¹⁸ O nthato na woovollowa nndduwa, mukhwipi mwa musewu waari alonda asese.

¹⁹ Ddenndda sika ddaari milloko dda alonda a va millako ovenyera o mabanja a Akora ni Merari.

Mitteko ddimodda dda o enyumba ya Apwiya

²⁰ Ovenyera mwa Alevi, Ahiya aari mulonda a eyuuma ya o enyumba ya Mulluku ni a emphaso ddoovelleelliwa wa Mulluku.

²¹ Ladani, mmodda a anamwani a Gereshoni, aari nikhollo na mabanja mamodda navettho a nibanja na mwanaye Yehiyeli.

²² Anamwani a Yehieli, Zetamu ni Yowele mwanamunne, alliwattho yawehera eyuuma ya o enyumba ya Apwiya.

²³ Amodda a Aamuramu, Aizari, Ahebroni ni Auziyele yaphara mitteko ddoohiyanahiyana.

²⁴ Nave Shebuele, mwaana a Gereshomo, mwaana a Mose aari muullupalli oowehera eyuuma.

²⁵ Abalaaye, ooyariwa ni Eliyezere yaari Rehabiya mwanaye, Yeshaya, Yoramu, Zakiri ni Shelemoti.

²⁶ Shelemoti ni abalaaye yawehera eyuuma ya emphaso ddoovelleelliwa ni mwene Davide ni oohoollella a mabanja, oohoollella a athu anchichi ni oohoollella a milloko dda akhoto.

²⁷ Ovenyera mwa ddeko ddimodda ddawaakha okhotoni, yaapatulavo emphaso ddimodda wi ddikhalle ddookavihera opotokosa enyumba ya Apwiya.

²⁸ Shelemoti ni abalaaye sika yawehera emphaso ddittheddene ddoopatuleya ddoovelleelliwa ni namallotella Samuele, Saulo mwaana a Kishi, Abinere mwaana a Nere navettho ni Yowabu mwaana a Zeruya nave ddeko ddimodda ddittheddene ddoovelleelliwa ni arive muthu.

Mitteko dda Alevi amodda

²⁹ Ovenyera mwa edduullu dda Izara, Kenaniya ni anaaye sika yakeraatthihiwe wi ehiphareke mitteko mu enyumba ya Apwiya koma ephareke mitteko ddimodda monga, ddoolembella ni ddaweeruza.

³⁰ Ovenyera mwa Ahebroni, Hashabiya ni abalaaye 1,700 athu eezeru yaawehera Aisraele woovollowa nndduwa wa Yordani va mitteko ddittheddene dda Apwiya ni waarumeyella mwene.

³¹ Wa Ahebroni, Yeriya sika aari owahoollella voothwarani ntthopoollo na mabanjiiwa. Muyakha wa 40 wa omwene wa Davide waheereya waashaasha nave waaphwanyeya wi amodda akhoto amasiva a mu nibanja na Yeriya yakhalla o Yazere o Giliyadi.

³² Mwene Davide aamutthoolla Yeriya ni abalaaye, attheene vamodda athu 2,700 akhoto amasiva, oohoollella mabanja wi yaawehereke Arubeni, Agadi navettho hafu a nlloko na Manase mu ddittheddene dda Mulluku ni ddaweereya dda mwene.