1 Epilli 22 - Mawu a Mulluku

¹ Vano Davide aallota wi, “Mva sika vinaakhalle enyumba ya Apwiya Mulluku ni nikuwa na mikutho ddooshellelliha dda Aisraele.”

Davide analamula ddoomaka enyumba ya Apwiya

² Davide aalamula wi yaatthukumanihe alleto ayo yaari mu ellapo ya Israele. Nave ahaatthoolla athu oopwesa malluku wi epotokose malluku oomakella enyumba ya Mulluku.

³ Davide aavelleellattho mikoko ddinchichi ddoopangella misomali dda machiwi a va millako ni mukuwa woomakella wawaata woohilingeya.

⁴ Aavelleellattho matabwa amukunguza ooheerengeya vawi Asidoni ni Atiro yaawa ni mikunguza ddinchichi wa Davide.

⁵ Davide aallota wi, “Mwanaka Solomoni tti mung'onong'ono, khanadduwella ddinchichi nave enyumba ya Apwiya enaamakiwe enaphwanella wi ekhalle yooreeresesa, yoovuwa ni yootitimiheya variyari va athu a ellapo ddittheddene. Sika kinaphwanella wi kikhozekelle.” Vano Davide aavelleella ezipangizo ddinchichi ahinakhwe.

⁶ Vano aamwiithana mwanaye Solomoni amulamula wi amake enyumba ya Apwiya Mulluku a Israele.

⁷ Davide aallota wa Solomoni wi, “Mwanaka, mi kaganiza m'murimani mwaka wi kaamakelle enyumba Apwiya Mullukwaaka.

⁸ Koma Apwiya yaakilleella wi, ‘We waawiipha athu anchichi nave waawana ekhoto ddinchichi. Sika ekaamba ya ddenndda khe weyaano onaakimakelle enyumba vawi woowiipha athu anchichi va ellapo yavatthi vamiitthoni vaka.

⁹ Kaapelle maaru, oneeromuyara mwaana aamullopwana. Anaakhalle muthu amurendelle. Kineeroweeriha adanaaye attheene oomwaapheella wi ehiwanekena. Nnddina naye ninaakhalle Solomoni nave kineeromuvaha Israele murendelle ni omaalleya mu olamulellwaaye ottheene.

¹⁰ Olliye sika anaakimakelle musasa miyaano. Anaakhalle mwanaka nave kinaakhalle attiitthinnya. Nave kineerokeraatthiha omwenaaye mu Israele wa enthawi yoohimalla.’ ”

¹¹ Davide aavirellella ollota wi, “Vano mwanaka, Apwiya Mullukwaawo akhalle ni weyaano wi okwakhwanihe omaka enyumbiiwa moollikana ni mmo yallotelliiwa.

¹² Nave Apwiya yuuvahe odduwella ni ezeru wi yuuvaha olamulello va Israele wi osunge malamulo a Apwiya Mullukwaawo.

¹³ Vano wiiwellella malamulo ni malangizo mattheene Apwiya yamulamulalliiwa Mose wi aalleelle Aisraele oneeropambana. Llipa murima, ohoove navettho ohikhupanyeke.

¹⁴ Ngoona, oyeella mu masivaaka kookhozekella dda enyumba ya Apwiya mataani 3,400 a golide, 34,000 a siliva navettho mukuwa ni mukoko ddoohilingeya vawi ddohaatesa. Kootthukumanihattho matabwa ni malluku nave va ddenndda waanjererevottho.

¹⁵ Wookhallana allupa mutteko anchichi monga eeruso yoosema malluku ni ya matabwa navettho athu ooheerengeya eeruso ddoohiyanahiyana,

¹⁶ dda golide, siliva, mukuwa ni mukoko. Venya nave waambe ophara mutteko! Apwiya ekhalle ni weyaano.”

¹⁷ Davide ahaalamulattho oohoollella attheene a o Israele wi emukavihereke mwanaye Solomoni voollotani wi,

¹⁸ “Ethiyo Apwiya Mullukwaanyu khari ni nyuwaano? Nave khaawuuvahilleni murendelle o embali ddittheddene? Vawi yohaavelleella aneetthi attheene a mwiillaponimmu m'mattani mwaka mwawi ahaagonjella Apwiya ni athwiiwa mwawi yoogonjihiwa vamodda ni athwiiwa.

¹⁹ Sika waashaashekeni Apwiya Mullukwaanyu ni murimaanyu muttheene. Vano venyani mwaambe omaka enyumba ya Apwiya Mulluku wi muhiyemo nibokosi na echipangano na Apwiya ni eziwiya ddittheddene ddaweella ddoopharihiwa mutteko vawaallapellani.”