1 Epilli 21 - Mawu a Mulluku

Davide anaweerenga athu

¹ Vano Satana aapaalla waahoosa Aisraele, aamulleka Davide wi aweerenge Aisraele.

² Sika Davide aamulleella Yowabu ni oohoollella wi, “Khaweni mwaweerenge Aisraele ovenyera o Beeresheba ophiya o Dani nave owe okilleelle wi kidduwelle echiwerengerwiiwa.”

³ Koma Yowabu aallota wi, “Apwiya ewaatihe athwiiwa makhumi khumi okhwaranya eriiwammu! Nyu apwiyaaka, ethiyo athu attheenaalla khehiyo oorumeyellaanyu? Koma kaambiiwa tini, nyu apwiyaaka, munapaalleenyu ello yeella? Ethiyo kaambiiwa tini munapaalleenyu waachimwiha Aisraele?”

⁴ Koma mwene aamuwatihera Yowabu. Sika Yowabu aatimulla aya eetella ellapo ettheene ya Israele nave aahokollweella o Yerusalemu.

⁵ Vano Yowabu aavelleella echiwerengero ya athu attheene wa Davide. Mu Israele mutthemwene mwaari athu 1,100,000 oowora owana ekhoto nave mu Yuda yaarimo 470,000.

⁶ Koma Yowabu khaaweerengille Alevi ni Abenjamini ekaamba yawi lamulo na mwene naamunanara.

⁷ Koma Mulluku khaahakallanllena weerenganko nave ahaallaka Aisraele.

⁸ Vano Davide aallota wa Mulluku wi, “Koochimwa wunchichi vaweerani yeella. Sika vano kinimuuvekani wi mukikhululukelle nichimo na mi oorumeyellaanyu vawi koheera ddookarangeya wunchichi.”

⁹ Nave Apwiya yaamulleella namallotella Gadi, oollohella a Davide, wi,

¹⁰ “Khawe wamulleelle Davide wi, mi Apwiya kinallota wi, ‘Kinuuvaha ddeko ddiraru wi otthoollevo emodda yawi kiweerelle.’ ”

¹¹ Sika Gadi aawa wa Davide amulleella wi, “Apwiya enallota wi, ‘Mutthoolle munapaalleenyu,

¹² ethiyo vikhalle miyakha miraru dda ettalla apaalle miyeri miraru ddawoonongiwa ni adanaanyu nngu yuugonjihakani apaalle mallapo mararu mvo mungelo a Apwiya anaawiipheeye athu anchichi mu ellapo ettheene ya Israele?’ Vano ganizerani yawaakhulla wi kamulleelle oyo akirumalle kaahokollowaka.”

¹³ Davide aallota wa Gadi wi, “Mi kinimakhupanya wunchichi, ahiyeni Apwiya ekillake weekhiiwa vawi echifundwiiwa tti yuullupalli koma ohiri killakiwe ni athu.”

¹⁴ Sika Apwiya yaarumiha mullilli wa Israele wawi athu 70,000 yaakhwa.

¹⁵ Vano Apwiya yaamurumiha mungelo o Yerusalemu wi awoononge. Koma ari vakhuviru owoononga, Apwiya yaamoriwa ethakaraka nave yaamulleella mungelooyo wi, “Wookwakhwana, hokollosa nnatta nawo!” Nave mungelo a Apwiya aari iimenlle va nipuro noomuuputhellavo tirigu na Orinani Muyebusi.

¹⁶ Vano Davide aatukhulla miitthwaaye nave aamoona mungelo a Apwiya iimenlle variyari va ellapo yavatthi ni ellapo yooddullu. Nave m'mattani mwaye mwaari nsupada anitukhunlle onitthoonyihera o Yerusalemu. Vano Davide ni attekweene amodda yaawara ddoowara dda eziguduli, ewarama ni opopheya ekhove.

¹⁷ Nave Davide aallota wa Mulluku wi, “Ethiyo ngihiyo mi kalamulalle wi aweerenge athu? Mi sika kichimwalle nave koheera ddoonanara. Koma enkhosanndda ddilakwille tini? Kinavekella wa nyu Apwiya Mullukwaaka wi nnatta nanyu nikillake mi ni nibanja na attiitthaaka koma ohiri naallake athwaanywaalla.”

¹⁸ Mungelo a Apwiya aamulleella Gadi wi amulamule Davide wi amake nikuwa na Apwiya va nipuro noomuuputhellavo tirigu na Orinani Muyebusi.

¹⁹ Sika Davide aayaawo vawiiwellellani mawu ayo Gadi allotilleeye mu nnddina na Apwiya.

²⁰ Enthawi yeeyo, Orinani aamuuputha tirigu. Arukunuwalle aamoona mungelooyo nave anaaye asese ayo aariiyena nimodda yahiipittha.

²¹ Davide aphiyalle, Orinani aatukhulla miittho nave aamoona Davide. Vano aavenyawo o nipuro noomuuputhellawo tirigunko amuvaha olemu Davide moopopheya ekhove.

²² Nave Davide aamulleella Orinani wi, “Kivahe nipuro noomuuputhellavo tirigunna wi kaamakellevo Apwiya nikuwa wi mullilloolla ovenye wa athu. Okikullihelle va mutengwiiwa muttheene.”

²³ Vano Orinani aallota wa Davide wi, “Apwiyaaka, kusani nave erani eyo munapaalleenyu. Ngoonani kinapaalla kivelleelle eng'ombe wi ddikhalle mukutho wooshellelliha ni miteekho ddoomuuputhellana tirigu wi ddikhalle ekhuni navettho tirigu wi akhalle mukutho wa yoocha. Koovelleella ddittheddenenndda.”

²⁴ Koma mwene Davide aamulleella Orinani wi, “Kookoma, kineerokulla va mutengwiiwa muttheene. Ngikusa ellwaawo wi kayivelleelle wa Apwiya naari ovelleella mukutho wooshellelliha voopharihani mutteko ello yawi ngikullalle.”

²⁵ Sika Davide aavelleella makobiri agolide 600 wa Orinani akulla nipuronno.

²⁶ Nave Davide ahaamakella Apwiya nikuwa avelleella mikutho ddooshellelliha ni ddeeyaattano. Nave aawiithana Apwiya mookhuwa sika yaamwaakhulla vookitthihani munllo ovenyera oddullu va nikuwa valle wi ooselle mikutho.

²⁷ Vano Apwiya yaamulamula mungelwiiwa wi ahokolloselle nsupada naye mu nigonelo mwiwa.

²⁸ Enthawi yeeyo Davide oonilleeye wi Apwiya yaamwaakhulla va nipuro noomuuputhellavo tirigu na Orinani Muyebusi, aavelleella mikutho ddaye wenko.

²⁹ Musasa wa Apwiya oyo Mose amakilleeye muchipululuni mulle ni nikuwa na mukutho wooshellelliha, ddittheddene ddaari nipuro noollapellamo o mwaango wa Gibiyoni

³⁰ koma Davide khaayaawo wi amullapelle Mulluku ekaamba yawi oova nsupada na mungelo a Apwiya.