1 Epilli 20 - Mawu a Mulluku

Davide anamugonjiha Raba

¹ Ephiyalle enthawi yeellimwe ya muyakha woothwarellella, enthawi eyo mamwene yayiiwa woowana ekhoto, Yowabu ahaahoollella akhoto wawoononga ellapo ya Aamoni. Vano yaahella ekhoto muzinda wa Raba nave waatthattuwa ntepe. Koma Davide aahalla o Yerusalemu.

² Vano Davide aarulla echipewa omuruni wa mwene a Aamoni. Echipeweeyo yallemella makilogaramu agolide ookhwaranya 30. Nave vachipewanimvo vaakhalla nlluku noowallamella mutengo. Davide aawara echipeweeyo, akusa ddawaakha okhotoni ddinchichi m'muzindanimmo.

³ Ahaakhumihamo athu m'muzindanimmo anaaphariha mutteko ni asaaha, mapiki ni akottokwa nave aanawoopiha enjerwa. Mmu sika eerelleeye ni mizinda ddittheddene dda Aamoni. Vatulli viwa Davide aahokollweella o Yerusalemu ni akhotwaaye.

Davide anawana ni Afilisti

⁴ Vatulli wiwa vaakhalla ekhoto ni Afilisti o Gezere. Sibekai Muhushati aamwiipha Sipai oyo aari mmodda a edduullu dda athu awoopiha ooromolliwa Arefaimu. Sika Afilisti yaagonjihiwa.

⁵ Nave vaakhallattho ekhoto ni Afilisti. Vano Elihanani mwaana a Yairi aamwiipha Lami mwanamunne a Goliati Mugiti oyo nivaka naye naari nawiitivalla wonanko mukoko wawoopella ekuwo.

⁶ Nave waakhallattho ekhoto o Gati, nko waari muthu oorekama ookhalla ni eyaalla dditthanu ni emodda o orive nnatta ni eyaalla dditthanu ni emodda o orive nnyallo, ddittheddene ddaarivo eyaalla 24. Olliye aarittho mmodda a edduullu dda Arefaimu.

⁷ Olliye aanyaambusalle Aisraele, Yonatani mwaana a Shimea, mwanamunne a Davide, aamwiipha.

⁸ Nndda ddaari edduullu dda Arefaimu a o Gati koma yahiiphiwa ni Davide ni akhotwaaye.