1 Epilli 19 - Mawu a Mulluku

Davide anaagonjiha Aamoni ni Asiriya

¹ Vatulli viwa Nahashi, mwene a Aamoni, aakhwa nave Hanuni mwanaye aavollowa munipuroni mwaye.

² Vano Davide aallota wi, “Mi kineeromurumeyella Hanuni, mwaana a Nahashi, moororomelleya vawi attiitthinnya yaaroromelleya.” Sika Davide ahaarumiha amithenga wi yamukhurumuse murima Hanuni ekaamba ya okhwa wa attiitthinnya. Vano amithenga yaaphiya wa Hanuni mu ellapo ya Aamoni wi yamukhurumuse murima.

³ Koma enduna dda Aamoni ddaallota wa Hanuni wi, “Ethiyo munaganiza wi Davide aarumihalle amithenga wi yuukhurumuseni murima vawaavahani olemu attiitthaanyu? Ethiyo khewiille wi ezonde ellapo nave vatulli viwa eyaakhe?”

⁴ Sika Hanuni ahaaphara amithenga a Davide, aachema ereru ddiwa embali emoddamodda nave aaphadda variyari ddoowara ddiwa okomella muyuununi, aahokollosella owaniwa.

⁵ Davide iiwalle ddaweereyelle athwaalle, ahaaruma athu wi yakumanena vawi yaawullihiwa muru wunchichi. Vano mwene aallota wi, “Mukhalleve o Yeriko ophiyera ereru ddanyu ddimelle, vatulli viwa eweeke wuno.”

⁶ Vano Hanuni ni Aamoni yoonilliiwa wi aamullika Davide, yaarumiha makilogaramu 34,000 a siliva wi yiithanihelle magareta navettho athu oowella va akavalo a o Mesopotamiya, a o Aramaaka ni a o Zoba.

⁷ Yahiithaniha magareta 32,000 ni mwene a o Maaka ni mullokwaaye wakhoto nave etthipella misasa ddiwa vakhuviru ni Medeba. Alliwattho Aamoni yaawa ovenyera mizinda wiwa wi ewanena ekhoto.

⁸ Davide iiwalleeye ddenndda aamuruma Yowabu ni mulloko wa akhotwaaye amasiva attheene.

⁹ Vano Aamoni yaakhuma etthattana voovollowellani o muzinda. Koma mamwene mamodda yawiillaayo yaari vaweekhiiwa o nipuro noohiipittheya.

¹⁰ Yowabu oonille wi akhotwaayo yaari amodda owiitthoni waye nave amodda otulli waye, ahaatthoolla akhoto amasiva variyari va Aisraele aatthattaniha moowehana ni Asiriyaayo.

¹¹ Akhotwaaye amodda oohalla aahiyalle m'mattani mwa Abishai, mwanamunne nave yaatthattana moowehana ni Aamoni.

¹² Vano Yowabu aallota wa Abishai wi, “Asiriya yakhalla ni masiva okikhwaranya miyaano, oneerokikavihera. Koma Aamoni yakhalla ni masiva wuukhwaranya, kineerewuukavihera.

¹³ Llipa murima! Hanko nillipihelle owana ekhoto naateteze abalaahu ni mizinda dda Mullukwaahu. Nave opaalla wa Apwiya weereye.”

¹⁴ Sika Yowabu ni athu aariiyena yaawaatamella Asiriya wi yaambe owana. Nave Asiriyaayo yaathawa awoonaka.

¹⁵ Vano Aamoni yoonilliiwa wi Asiriya aathawa naalliwanittho yaathawa aphiyeeye Abishai, mwanamunne Yowabu, eya yavollowa m'muzindani. Vano Yowabu aahokollweella o Yerusalemu.

¹⁶ Koma Asiriya yoonille wi Aisraele yohaagonjiha, yahaarumiha amithenga wi yaakuse Asiriya ayo yaari vakhopella va muhinje wa Yufurate ni Shofaki, akhoto muullupalli a mwene Hadadezere a o Zoba.

¹⁷ Davide iiwalle ddenndda ahaatthukhumiha akhoto attheene a Aisraele, amullapuwa Yordani, aatthattaniha akhoto moowehana ni Asiriya yaamba owana ekhoto ni olliye.

¹⁸ Nave Asiriyaayo yahaathawa Aisraele. Davide ni akhotwaaye yaawiipha Asiriya aweetiha magareta 7,000 ni akhoto aweeta vatthi 40,000. Yaamwiiphattho Shofaki, muullupalli a mullokwiiwa wakhoto.

¹⁹ Sika enduna dda Hadadezere ddoonille wi yoogonjihiwa ni Aisraele, yaakeraatthiha murendelle ni Davide yaamba omurumeyella. Sika Asiriya kheyaapaallattho waakavihera Aamoni.