1 Epilli 18 - Mawu a Mulluku

Ekhoto dda Davide ni opambana waye

¹ Vatulli viwa Davide ahaahella ekhoto Afilisti nave ahaagonjiha. Sika ahaakha muzinda wa Gati ni mizi ddaye ovenyera wa Afilisti.

² Nave ahaagonjihattho Amowabu ayo yatthattuwalle oorumeyellaaye nave yaanakhoma musonkho wa olliye.

³ O Hamati Davide aamugonjihattho Hadadezere, mwene a o Zoba, ayeeye omutundani wa muhinje wa Yufurate wi akeraatthihewo omwenaaye.

⁴ Nave Davide aamwaakha magareta 1,000, athu oowella va akavalo 7,000 ni akhoto aweeta vatthi 20,000. Eerille ddiiddo, Davide aaphadda misempha ddam'metoni dda akavalo koma aahiya akavalo ookwakhwanella magareta 100.

⁵ Vano Asiriya a o Damasiko yawiilliiwa wi emukavihere Hadadezere, mwene a o Zoba, Davide aawiiphavo athu 22,000.

⁶ Vatulli viwa Davide aatthipella misasa ddakhoto o Damasiko mu ellapo ya Siriya. Nave Asiriya yaakhalla oorumeyella a Davide nave yahaamba okhoma musonkho wa olliye. Sika Apwiya yaanampambaniha orive weko ayeeyewo.

⁷ Nave Davide aayaana o Yerusalemu ezishango ddagolide nnddo ddatukhulliwa ni oorumeyella a Hadadezere.

⁸ Nave ovenyera o Tibati ni o Kuni, mizinda ddalamulelliwa ni Hadadezere, Davide aakusa mukoko ddamukuwa ddinchichi oyo Solomoni awupharihalleeye mutteko voomakani ethanki yamukuwa ni apoto navettho eziwiya ddimodda ddamukuwa.

⁹ Tou, mwene a o Hamati, iiwalleeye wi Davide ahaagonjiha akhoto attheene a Hadadezere, mwene a o Zoba,

¹⁰ aamuruma mwanaye Hadoramu wa mwene Davide wi amullochelle. Apaallattho amullochelle ni omuthokoza ekaamba yawi aawana ekhoto ni Hadadezere nave aamugonjiha vawi Hadadezerooyo wiilliwiilli awanesa ekhoto ni Tou. Sika aamurumihella emphaso ddoopangiwa ni golide, siliva ni mukuwa.

¹¹ Ddeko ddennddo Davide aaddivelleella wa Apwiya vamodda ni siliva ni golide addaakhilleeye wa athu attheene a o Edomu, Mowabu, wa Aamoni, Afilisti ni Aamaleke.

¹² Nave Abishai, mwaana a Zeruya aawiipha Aedomu 18,000 o ntapo na Mwiinyu.

¹³ Vano aatthipella misasa ddakhoto mu Edomu virive veko mu ellapo ya Edomu nave Aedomu attheene yaakhalla oomurumeyella Davide. Vano Apwiya yaanampambaniha Davide orive weko ayeeyewo.

¹⁴ Sika Davide aalamulella ellapo ettheene ya Israele nave aaneetiha ddittheddene mweechilungamo ni moohiweha ekhove.

¹⁵ Vano Yowabu mwaana a Zeruya aari owaahoollella akhoto. Nave Yehoshafati mwaana a Ahiludi aari namalembella.

¹⁶ Nave Zadoki, mwaana a Ahitubi, ni Ahimeleki, mwaana a Abiyatara, yaari allupa mukutho. Nave Shavisha aari namalembella.

¹⁷ Benaya, mwaana a Yehoyada, aari enduna yowaawehera Akereti ni Apeleti. Nave anamwani a Davide yaari enduna dduullupalli ddoomurumeyella mwene.