1 Epilli 17 - Mawu a Mulluku

Lonjezo na Mulluku wa Davide

¹ Davide akeraattheyille mu enyumbaaye yoomwene, nllapo nimodda aallota wa Natani, namallotella wi, “Ngoonani, miyaano kinakhalla mu enyumba yoomwene yoomakiwa ni miteekho ddamukunguza koma nibokosi na echipangano na Apwiya ninakhalla m'musasani.”

² Nave Natani aallota wa Davide wi, “Erani erive ello munapaalleenyu m'murimani mwanyu vawi Mulluku ari ni nyuwaano.”

³ Koma mahiiyu yaayo mawu a Mulluku yaawa wa Natani wi,

⁴ “Khawe wamulleelle oorumeyellaaka Davide wi mi Apwiya kinallota wi, ‘Ohikimakelle enyumba wi kikhallekemo.

⁵ Miyaano nginakhalleke mu enyumba waambeella nllapo nne kaakhumihalleemi Aisraele mu ellapo ya Iguputo ophiyera ollello. Kookhalla kiyaaka nngu ni nngu nave mookhalla mwaka mwaari m'musasani.

⁶ M'mapuroni mattheene keetilleemi ni Aisraele, ethiyo kaambilleke ollota wa mmodda a oweeruza a Aisraele, ayo kaalamulalleemi wi yaawehereke athwaaka wi kaambiiwa tini ehikimakenlliiwa enyumba ya miteekho ddamukunguza?’ ”

⁷ “Sika vano wamulleelle oorumeyellaaka Davide wi mi Apwiya Amasiva Mattheene kinallota wi, ‘Kahuukusa woochiha enkhosa wi okhalle mwene owaalamulella athwaaka Aisraele.

⁸ Nave kaari ni weyaano orive weko wayeewewo nave kahaagonjiha adanaawo attheene weyaano woonaka. Vano kineerewuuvuwiha wonanko athu oovuwesesa va ellapo yavatthi.

⁹ Nave kineerewaatthoollella nipuro athwaaka Aisraele nave kineerewaakeraatthiha wenko wi ekhalle ni nipuro nayiwanayiwa wi ehihoowekettho. Nave athu oohilungama khewa yaahoosattho wonanko khalle

¹⁰ ni ovenyera enthawi elle kaatthoollilleemi oweeruza athwaaka Aisraele nave kohaagonjiha adanaawo attheene. Sika kinimuulonjeza wi mi Apwiya kineerokeraatthiha nibanja nawo.

¹¹ Mallapwaawo yakwakhwana wi okhwe, kineeromutthoolla mmodda a anaawo wi akhalle mwene nave kineerokeraatthiha omwenaaye.

¹² Yooyo sika anaakimakelle enyumba nave kineerokeraatthiha mpando wa omwenaaye wa enthawi yoohimalla.

¹³ Miyaano kinaakhalle attiitthinnya nave olliye anaakhalle mwanaka. Sika ngivenyiha echikondaaka yoohisintheya wa olliye wonanko kamuvenyihelleemi oyo aarivo weyaano ohinakhallevo.

¹⁴ Koma kineeromukeraatthiha mu enyumbaaka ni mu omwenaaka nave omwenaaye onaakhalle wa enthawi yoohimalla.’ ”

¹⁵ Natani aallota ni Davide moollikana ni mawaalla nave ni mmo oonilleeye m'masomphenya.

Nivekello noothokoza na Davide

¹⁶ “Nyu Apwiya Mulluku, mi kiri aani nave nibanja naka tti tini wi mooniphiyiha vaava? Vano mwene Davide aavollowa m'musasani moollapellamo. Ahaamba ollapella vamiitthoni va Apwiya nave aavekella wi miyaano khe ello vooganizellani nnddo mweerilleenyu wa miyaano navettho o nibanja naka.

¹⁷ Nyu Mulluku, ddittheddenenndda ddaari ddooyeva vamiitthoni vanyu. Nyu Apwiya Mulluku mwaalonjezattho nibanja naka dda enthawi yuullupalli yamuhoollo nave mookooniha mibado ddamuhoollo, nyu Apwiya Mulluku!

¹⁸ Vano mi Davide ttuullota tini wa nyuwaano, vawi mookivaha olemu, oorumeyellaanyu? Vawi munnamudduwella phaama ddene.

¹⁹ Nyu Apwiya, ekaamba yookikonda mi oorumeyellaanyu navettho moollikana ni opaalla wa murimaanyu, moheera dduullupalli voodduwanyeyiha wa miyaano.

²⁰ Moollikana ni nnddo niiwalleehu khaavo ari oophwanaphwana ni nyuwaano nave khaavo Mulluku mmodda koma nyeeneve.

²¹ Ethiyo tti athu aavi va ellapo yavatthi enaphwanaphwana ni athwaanyu Aisraele ayo mwaavullusalleenyu wi ekhalle aanyu? Mwahaavullusa ovenyera o Iguputo nave mwaheera ddeko dduullupalli ddawoopiha voowiikarihani mitundu ddimodda vamiitthoni viwa. Mmu sika mwavuwihelleenyu nnddina nanyu.

²² Nave mwaaweera Aisraele, okhalla aanyu aanyu wa enthawi yoohimalla nave nyu Apwiya mwaakhalla Mullukwiiwa.

²³ Nyu Apwiya musungeke lonjezo nanyu mwallotilleenyu wa oorumeyellaanyu navettho dda nibanja naye wi nikeraatthihiwe wa enthawi yoohimalla nave mweere moollikana ni mmo mwallotilleenyu.

²⁴ Sika nnddina nanyu nineerovuwihiwa ni otitimihiwa wa enthawi yoohimalla voollotani wi, ‘Apwiya Amasiva Mattheene, Mulluku a Israele, tti Mulluku a Israele.’ Nave nibanja na oorumeyellaanyu Davide nineerokeraattheya vamiitthoni vanyu wa enthawi yoohimalla.

²⁵ Nyu Mullukwaaka, mookiwululella mi oorumeyellaanyu wi muneerokeraatthiha nibanja naka. Sika miyaano oorumeyellaanyu koollipa murima wi kuuvekelleni.

²⁶ Vano nyu Apwiya, nyu tti Mulluku nave moolonjeza ello yaphaameella wa oorumeyellaanyu.

²⁷ Sika vano kinuuvekani wi mudalise nibanja na mi oorumeyellaanyu wi nikhallekewo wa enthawi yoohimalla vamiitthoni va nyu, Apwiya Mulluku. Vawi eyo muyidalisalleenyu enakhalla yoodaliseya wa enthawi yoohimalla.”